អន្តរជាតិ
×![]()
ដោយ: ថ្មីៗ
លិខិតឆ្លងដែនរបស់អាល្លឺម៉ង់ត្រូវបានចាត់ទុកជាលិខិតឆ្លងដែនមានឥទ្ធិពលខ្លាំងជាងគេ ដោយអ្នកដែលកាន់លិខិតឆ្លងដែនប្រទេសនេះ អាចធ្វើដំណើរទៅកាន់ប្រទេសចំនួន១៧៧ ដោយមិនចាំបាច់មានវីសា។ នេះបើយោងតាមសន្ទស្សន៍ការកំណត់ទិដ្ឋាការ (Visa Restriction Index)។
កន្លងមក មនុស្សភាគច្រើនប្រហែលជាយល់ថា អ្នកដែលកាន់លិខិតឆ្លងដែនអាមេរិកឬអង់គ្លេស អាចធ្វើដំណើរទៅប្រទេសជាច្រើនបាន។ ប៉ុន្តែបើតាមសន្ទស្សន៍ថ្មី លិខិតឆ្លងដែនអាល្លឺម៉ង់ ជាលិខិតឆ្លងដែនមានឥទ្ធិពលជាងគេ។ យោងតាម សន្ទស្សន៍ការកំណត់ទិដ្ឋាការ ដែលធ្វើដោយក្រុមហ៊ុនអង់គ្លេស Henley & Partners បង្ហាញថា អ្នកដែលមានលិខិតឆ្លងដែនអាល្លឺម៉ង់ក្នុងដៃ អាចធ្វើដំណើរទៅប្រទេស១៧៧ ដោយមិនចាំចាច់មានទិដ្ឋាការ (Visa) នោះទេ។
បើតាមការផ្សាយរបស់ The Independent របស់អង់គ្លេស សន្ទស្សន៍នេះបានចាត់ចំណាត់ថ្នាក់ប្រទេសចំនួន១៩៩ ដោយផ្អែកលើសេរីភាពធ្វើដំណើររបស់ប្រជាជនរបស់ប្រទេសនីមួយៗ និងប្រើទិន្នន័យរបស់សមាគមចរាចរណ៍ផ្លូវអាកាសអន្តរជាតិ(IATA)។ សមាគមនេះជាកន្លែងផ្ទុកទិន្នន័យធ្វើដំណើរធំបំផុត។
ចំណាត់ថ្នាក់ទីពីរបានទៅលិខិតឆ្លងដែនរបស់ស៊ុយអែត ដែលអាចធ្វើដំណើរដោយមិនចាំបាច់ទិដ្ឋាការទៅប្រទេស១៧៦។ ចំណែកលិខិតឆ្លងដែន ចក្រភពអង់គ្លេស បារាំង អ៊ីតាលី ហ្វាំងឡង់ និងអេស្ប៉ាញ ស្ថិតនៅលំដាប់ទី៣ដូចគ្នា ដោយធ្វើដំណើរបាន១៧៥ប្រទេស។ លិខិតឆ្លងដែនរបស់មហាអំណាចអាមេរិក ស្ថិតនៅលំដាប់ទីបួនជាមួយប៊ែលហ្សិក ដាណឺម៉ាក និងហូឡង់ ទៅបាន១៧៤ប្រទេស។
ដោយឡែក កម្ពុជាស្ថិតនៅលំដាប់ទី៨៧ ដោយធ្វើដំណើរមិនចាំបាច់មានទិដ្ឋាការទៅ៥០ប្រទេស។ ចំណាត់ថ្នាក់របស់កម្ពុជាស្ថិតនៅពីលើប្រទេសអាស៊ានតែបីប៉ុណ្ណោះគឺឡាវនិងវៀតណាម មានលំដាប់៩០ អាចទៅបានប្រទេស៤៧ ហើយមីយ៉ាន់ម៉ាមានចំណាត់ថ្នាក់៩៥ អាចទៅបានប្រទេសចំនួន៤២៕
Tag:
លិខិតឆ្លងដែន
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 4 ថ្ងៃ
