អន្តរជាតិ
សមាជិកព្រឹទ្ធសភាអាមេរិកស្នើលោក អូបាម៉ា រើសអគ្គលេខាធិការUN ជាស្ត្រី
× សមាជិកព្រឹទ្ធសភាអាមេរិកជាស្ត្រីចំនួនប្រាំពីរនាក់ បានដាក់សំណើទៅកាន់ប្រធានាធិបតីលោក បារ៉ាក់ អូបាម៉ា ដើម្បីជំរុញឲ្យមានការជ្រើសរើសស្ត្រី សម្រាប់ដំណែងជាអគ្គលេខាធិការអង្គការសហប្រជាជាតិ ជំនួសលោក បាន គីមូន។ ចាប់តាំងពីបង្កើត១៩៤៥មក អង្គការសហប្រជាជាតិ មិនដែលមានថ្នាក់ដឹកនាំកំពូលជាស្ត្រីនោះទេ ដូច្នេះបានជាមានចលនាយ៉ាងផុលផុស ធ្វើយុទ្ធនាការសម្រាប់ឲ្យដំណែងកំពូលនេះទៅស្ត្រី។
ក្រោយពេលកាន់កាប់ដំណែងអគ្គលេខាធិការអង្គការសហប្រជាជាតិរយៈពេលដប់ឆ្នាំ លោក បាន គីមូន នឹងត្រូវបញ្ចប់អាណត្តិរបស់លោកនៅចុងឆ្នាំ២០១៦នេះហើយ។ នៅពេលនេះ សមាជិកព្រឹទ្ធសភាអាមេរិកជាស្ត្រីចំនួនប្រាំពីរនាក់បានជំរុញលោក បារ៉ាក់ អូបាម៉ា ឲ្យជ្រើសរើសស្ត្រីសម្រាប់ដំណែងអគ្គលេខាធិការជាលើកដំបូងក្នុងអាណត្តិខាងមុខ បន្តពីលោក បាន គីមូន ដែលជាអតីតរដ្ឋមន្ត្រីការបរទេសកូរ៉េខាងត្បូង។
សមាជិកព្រឹទ្ធសភាទាំង៧ ដែលដឹកនាំដោយលោកស្រី Barbara Boxer សមាជិកជាន់ខ្ពស់គណៈកម្មាធិការទំនាក់ទំនងអន្តរជាតិ បានសរសេសំបុត្រស្នើសុំទៅលោក អូបាម៉ា នៅថ្ងៃព្រហស្បតិ៍ ទី៣ ខែមីនា។ តាមរយៈសំបុត្រនោះ សមាជិកព្រឹទ្ធសភាទាំង៧ បានស្នើឲ្យអាមេរិក ដើរតួនាំមុខគេក្នុងការពិចារណាលើលក្ខណៈសម្បត្តិរបស់បេក្ខភាពជាស្ត្រី។ រដ្ឋបាលលោក អូបាម៉ា បានបង្ហាញការគាំទ្រលើសំណើរនេះ ប៉ុន្តែក៏បានបញ្ជាក់ដែរថា យើងនឹងពិចារណាលើបេក្ខភាពទាំងអស់ មិនថាប្រុសឬស្រីនោះទេ។
ជាមួយគ្នានេះ ទូរទស្សន៍ Channel NewsAsia ផ្សាយថា ការលើកជាសំណើរនេះ គឺស្របពេលដែលរដ្ឋជាសមាជិកអង្គការសហប្រជាជាតិចំនួន៥៣ កំពុងធ្វើយុទ្ធនាការសម្រាប់ស្ត្រីទទួលដំណែងអគ្គលេខាធិការ។ ចំណែកក្រុមសង្គមស៊ីវិល ក៏កំពុងតែបញ្ចុះបញ្ចូលឲ្យស្ត្រីធ្វើជាមេដឹកនាំអង្គការកំពូលនេះដែរ។
បេក្ខជន៧នាក់ត្រូវបានលើកឡើង ដែលក្នុងនោះមានស្ត្រីចំនួនបីនាក់ គឺ អគ្គនាយក UNESCO លោកស្រី Irina Kobova អតីតរដ្ឋមន្ត្រីការបរទេសក្រូអាស៊ីលោកស្រី Vesna Pusic និងអតីតរដ្ឋមន្ត្រីលោក Natalia Gherman។ ក្រៅពីនោះក៏មានឥស្សរជននយោបាយសំខាន់ៗមួយចំនួនទៀតផងដែរ។
សមាជិកក្រុមប្រឹក្សាសន្តិសុខទាំង១៥ប្រទេសនឹងធ្វើជ្រើសរើសបេក្ខជនសមស្រប ដើម្បីឲ្យមហាសន្និបាតដែលប្រទេសចំនួន១៩៣ បោះឆ្នោតសម្រេចចុងក្រោយ។ ជាទម្លាប់ ដំណែងអគ្គលេខាធិការអង្គការសហប្រជាជាតិ ត្រូវផ្លាស់ប្ដូរទៅតាមតំបន់ ហើយអាណត្តិនេះ គឺត្រូវដល់វេនតំបន់អឺរ៉ុបខាងកើត។ បញ្ហារើសតាមតំបន់នេះហើយ ដែលធ្វើឲ្យសមាជិកព្រឹទ្ធសមាជិកអាមេរិកទាំង៧ខាងលើ មានការព្រួយបារម្ភ ដោយសារតែមិនមានការពិចារណាលើសមភាពប្រុសស្រីសម្រាប់ដំណែងនេះទេ៕
© រក្សាសិទ្ធិដោយ thmeythmey.com