សហព័ន្ធកីឡាសូហ្វតិន្នីសកម្ពុជានឹងសាងសង់ទីលានថ្មីតម្លៃជាង ៣០ម៉ឺនដុល្លារ

កីឡាជាតិ

ជាតិ

សហព័ន្ធកីឡាសូហ្វតិន្នីសកម្ពុជានឹងសាងសង់ទីលានថ្មីតម្លៃជាង ៣០ម៉ឺនដុល្លារ

05, Mar 2016 , 2:37 pm

រូបភាព

ដោយ:

សហព័ន្ធកីឡាសូហ្វតិន្នីសកម្ពុជា នឹងសាងសង់ទីលានថ្មីកម្រិតស្តង់ដារអាមេរិក នៅលើទីលានចាស់ ដែលមានទីតាំងស្ថិតនៅក្នុងពហុកីឡដ្ឋានជាតិ ដោយគ្រោងនឹងចំណាយថវិកាជាង ៣០ម៉ឺនដុល្លារ។ ការសាងសង់នេះក្នុងគោលបំណងសម្រាប់ប្រកួតលក្ខណៈជាតិ និងអន្តរជាតិ ជាពិសេស ដើម្បីត្រៀមធ្វើជាម្ចាស់ផ្ទះនៅឆ្នាំ២០១៧ ខាងមុខ។

សហព័ន្ធកីឡាសូហ្វតិន្នីសកម្ពុជា បន្ទាប់ពីទទួលបានការអនុញ្ញាតពីក្រសួងអប់រំ យុវជន និងកីឡា នឹងចំណាយថវិកាជាង ៣០ម៉ឺនដុល្លារ ដើម្បីសាងសង់ទីលានថ្មីកម្រិតស្តង់ដារអាមេរិកនៅលើទីលានចាស់ក្នុងពហុកីឡដ្ឋានជាតិ។ ទីលានថ្មីកម្រិតស្តង់ដារអាមេរិកនេះ នឹងចាប់ផ្តើមសាងសង់នៅថ្ងៃទី៣ ខែមេសា ឆ្នាំ២០១៦ ដែលជាថ្ងៃបិទការប្រកួតកីឡាសូហ្វតិន្នីសពានរង្វាន់សម្តេច ស ខេង លើកទី៣ ឆ្នាំ២០១៦ ហើយការសាងសង់គ្រោងនឹងបញ្ចប់ក្នុងរយៈពេល៦ខែ។ នេះបើយោងតាមលោក ជា ប៊ុន ហេង អគ្គលេខាធិការសហព័ន្ធកីឡាសូហ្វតិន្នីសកម្ពុជា និងជាប្រធានអង្គភាពកីឡាក្រសួងមហាផ្ទៃ កាលពីពេលថ្មីៗកន្លងទៅនេះ។

លោក ជា ប៊ុនហេង បញ្ជាក់ថា៖«គម្រោងអភិវឌ្ឍន៍ទីលានសូហ្វតិន្នីស និងវាយកូនបាលថ្មីនេះ យើងបានឆ្លងទៅក្រសួងរួចហើយ ដែលយើងនឹងចំណាយពេលសាងសង់យ៉ាងយូរ ៦ ខែ ដោយចំណាយថវិកាប្រមាណ ៣០ ម៉ឺនដុល្លារ ឬអាចលើសនេះ។ នៅថ្ងៃទី១ ដល់ទី៣ ខែមេសា យើងនឹងរៀបចំការប្រកួតកីឡាសូហ្វតិន្នីសពានរង្វាន់សម្តេច ស ខេង លើកទី៣ ឆ្នាំ២០១៦ ហើយនៅថ្ងៃបញ្ចប់ យើងនឹងអញ្ជើញរដ្ឋមន្ត្រីក្រសួងអប់រំ ជាអធិបតីភាព និងចូលរួមពិធីបញ្ចុះបឋមសិលានៃការសាងសង់ទីលានថ្មីនេះនាព្រឹកនោះតែម្តង»។

លោកអគ្គលេខាធិការរូបនេះបានបញ្ជាក់ទៀងថា តាមរយៈកិច្ចព្រមព្រៀងរបស់សហព័ន្ធកីឡាសូហ្វតិន្នីសកម្ពុជា និងសមាគមកីឡាវាយកូនបាល់ស្ម័គ្រចិត្តកូរ៉េ ថវិកាដែលគ្រោងនឹងចំណាយលើការសាងសង់ទីលានថ្មីនេះ នឹងមានការឧបត្ថម្ភចូលរួមចំណែកពីភាគីកូរ៉េប្រហែលជា ១៥ម៉ឹន ទៅ២០ម៉ឺនដុល្លារ ហើយនៅសល់ប៉ុន្មាន សហព័ន្ធនឹងធ្វើសំណើរដាក់ទៅសម្តេច ស ខេង ដើម្បីបំពេញបន្ថែម។ ទីលានថ្មីកម្រិតស្តង់ដាអាមេរិកនេះ មានទំហំ ៣,២០០ម៉ែត្រការ៉េ កម្ពស់ ១៣ម៉ែត្រ ហើយដំបូលទីលានទំហំ ៤២០០ ម៉ែតការ៉េ។ នៅចំកណ្តាលទីលាននេះ នឹងសាងសង់អគារការិយាល័យ ២ជាន់ ដោយមានទទឹង ៩ម៉ែត្រ នឹងបណ្តោយ ៤០ម៉ែត្រ។

ពាក់ព័ន្ធទៅនឹងគោលបំណង និងការប្រើប្រាស់ទីលានថ្មីកម្រិតស្តង់ដារអាមេរិកនេះ លោក ជា ប៊ុនហេង បានរៀបរាប់ថា ទីលានថ្មីនេះប្រើប្រាស់សម្រាប់ទាំងការហ្វឹកហាត់កីឡាសូហ្វតិន្នីស និងវាយកូនបាល់ ចំណែកអគារការិយាល័យជាន់ផ្ទាល់ដីជាទីតាំងរបស់សហព័ន្ធកីឡាសូហ្វតិន្នីសកម្ពុជា ឬឯជាន់ទី១កន្លែងរបស់អង្គភាពកីឡាក្រសួងមហាផ្ទៃ។ សហព័ន្ធសូហ្វតិន្នីសកម្ពុជា ទៅថ្ងៃអនាគតគ្រោងនឹងបង្កើតសហព័ន្ធកីឡាយុទ្ធសិល្ប៍នគរបាលអន្តរជាតិមួយទៀត ដូច្នេះដំបូលអគារ នឹងរៀបចំបន្ថែមដើម្បីផ្តល់ជាកន្លែងហ្វឹកហាត់សម្រាប់កីឡាតេក្វាន់ដូ ការ៉ាតេដូ និងយូដូ ជាដើម។

ទីលានថ្មីកម្រិតស្តង់ដារអន្តរជាតិនេះ នឹងប្រើសម្រាប់ឆ្នាំ២០១៧ ដែលសហព័ន្ធកីឡាសូហ្វតិន្នីសកម្ពុជា នឹងធ្វើជាម្ចាស់ផ្ទះនៃការប្រកួតកីឡាសូហ្វតិន្នីសជើងឯកអាស៊ានឆ្នាំ២០១៧។ ជាពិសេសផ្តល់ជាកន្លែងហ្វឹកហាត់សម្រាប់អត្តពលិកកីឡាសូហ្វតិន្នីស ដើម្បីពង្រឹងថ្នាល ត្រៀមការប្រកួតស៊ីហ្គេម ឆ្នាំ២០២៣ ដែលកម្ពុជាត្រូវធ្វើជាម្ចាស់ផ្ទះ ដោយខាងកូរ៉េ នឹងជួយពង្រឹងគុណភាពគ្រូបង្វឹក ក្រុមអាជ្ញាកណ្តាល និងកីឡាករ ហើយកីឡាសូហ្វតិន្នីស អាចនឹងដាក់បញ្ចូលជាប្រភេទកីឡារអូឡាំពិកនៅឆ្នាំ២០២០ខាងមុខនេះ៕