អន្តរជាតិ
អ្នកវិភាគ៖ ជនជាតិអាមេរិកអាចក្លាយជានាយករដ្ឋមន្ត្រីអ៊ុយក្រែន ប្រៀបដូចជាការដាក់អាណានិគម
× រដ្ឋាភិបាលអ៊ុយក្រែន អាចនឹងជ្រើសរើស ជនជាតិអាមេរិកដែលបំពេញការងារជារដ្ឋមន្ត្រីហិរញ្ញវត្ថុ លោកស្រី Natalie Jaresko ជានាយករដ្ឋមន្ត្រីនៅពេលខាងមុខ។ អ្នកវិភាគអាមេរិកថា នេះជានយោបាយអាមេរិកដែលវាប្រៀបដូចជាការដាក់អាណានិគម លើអ៊ុយក្រែនដើម្បីពង្រីកឥទ្ធិពលរបស់អាមេរិកនៅអឺរ៉ុបខាងកើត បន្ទាប់ពីទម្លាក់រដ្ឋាភិបាលចាស់ដែលរណបរុស្ស៊ី។
អ្នកតាមដានស្ថានការណ៍នយោបាយអ៊ុយក្រែន បានវាយតម្លៃថា លោកស្រី Natalie Jaresko ប្រហែលជានឹងក្លាយជានាយករដ្ឋមន្ត្រីអ៊ុយក្រែនថ្មី។ មូលហេតុដែលមានការវាយតម្លៃបែបនេះដោយសារ លោកស្រីជាមនុស្សសំខាន់ក្នុងជួររដ្ឋាភិបាល ហើយក៏ជាមនុស្សម្នាក់ដែលស្និទ្ធរបស់ដឹកនាំក្រុងវ៉ាស៊ីនតោន។
បើយោងតាមសារព័ត៌មានរដ្ឋរុស្ស៊ី Sputnik លោកស្រី Natalie Jaresko ជាម្ចាស់ធនាគារវិនិយោគមួយដែលបានទទួលសញ្ជាតិអ៊ុយក្រែននៅខែធ្នូឆ្នាំ ២០១៤ បន្ទាប់ពីលោកត្រូវបានរដ្ឋាភិបាលតែងតាំងជារដ្ឋមន្ត្រីហិរញ្ញវត្ថុប្រទេសនេះ។ ពេលក្លាយជារដ្ឋមន្ត្រីហិរញ្ញវត្ថុ រឿងដំបូងដែលលោកស្រីបានធ្វើមុនគេគឺ ផ្ញើសំបុត្រលោក ប្រធានគណកម្មាធិការព្រឹទ្ធសភាទទួលបន្ទុកយោធាលោក John McCain ដើម្បីសុំសព្វាវុធបន្ថែមពីអាមេរិកដើម្បីជួយផ្គត់ផ្គង់អ៊ុយក្រែន។
វាមានភាគរយច្រើនដែរ ដែលថា លោកស្រី Jaresko នឹងក្លាយជានាយករដ្ឋមន្ត្រីបន្ទាប់ ព្រោះនាយករដ្ឋមន្ត្រីបច្ចុប្បន្ន Arseniy Yatsenyuk កំពុងប្រឈមបញ្ហាក្នុងតំណែងជាប្រមុខរដ្ឋាភិបាល។ កាលពីចុងខែមុន លោកប្រធានាធិបតី Petro Poroshenko បានស្នើសុំត្រង់ៗទៅនាយករដ្ឋមន្ត្រីខាងលើ ឲ្យចុះចេញពីតំណែងព្រោះ អសមត្ថភាព ដោះស្រាយបញ្ហានយោបាយនិងសេដ្ឋកិច្ចអ៊ុយក្រែនមិនបាន។ បញ្ហាពុករលួយនៅតែជាជំងឺដែលដោះស្រាយមិនចេញក្នុងសង្គមអ៊ុយក្រែនទោះស្ថិតក្រោមរបបដឹកនាំថ្មីក៏ដោយចុះ។
ប៉ុន្តែយ៉ាងណាក៏ដោយ អ្នកជំនាញបានលើកឡើងថាការតែងតាំងជនជាតិអ៊ុយក្រែនមានដើមកំណើតអាមេរិកជានាយករដ្ឋមន្ត្រីអ៊ុយក្រែនមិនមែនរឿងសាមញ្ញទេ។ ពួកគេហៅ បញ្ហានេះថាជាសញ្ញាមួយនៃការដាក់គោលនយោបាយដាក់អាណានិគមរបស់អាមេរិកនៅក្នុងប្រទេសអ៊ុយក្រែនរបស់ក្រុងវ៉ាស៊ីនតោន ហើយអ្វីដែលជាក្តីរំពឹងរបស់អាមេរិកគឺពង្រីកឥទ្ធិពលរបស់អាមេរិកប្រឆាំងរុស្ស៊ីប៉ុណ្ណោះ។
អ្នកជំនាញភូមិសាស្ត្រនយោបាយរុស្ស៊ី Daniel McAdams នៃវិទ្យាស្ថាន Ron Paul ដើម្បីសន្តិភាពនិងវិបុលភាព បានអះអាងថា វាមិនមែនជារឿងចម្លែកទេ ព្រោះវាការនយោបាយពង្រីកឥទ្ធិពលអាមេរិកនៅអឺរ៉ុបខាងកើតនេះឯង។ អ្នកជំនាញដែលមានទំនោររករុស្ស៊ីនេះក៏ពន្យល់ផងដែរ កន្លងមកសហរដ្ឋអាមេរិកតែងអួតថា ការទម្លាក់អតីតមេដឹកនាំអ៊ុយក្រែនរណបរុស្ស៊ី លោក Viktor Yanukovych ដើម្បីកម្ចាត់អំពើពុករលួយ កម្ចាត់របបផ្តាច់ការដើម្បីកសាងប្រជាធិបតេយ្យនិងកំណែទម្រង់របបដឹកនាំជាដើម។ អ្វីដែលគួរឲ្យសង្ឃឹ ចុងក្រោយ បន្ទាប់ពីជ្រើសរើសរដ្ឋាភិបាលក្រុងគៀវថ្មី បញ្ហានេះរឹតតែអាក្រក់ជាងមុន ហើយអំពើពុករលួយក៏រឹតតែធ្ងន់ធ្ងរជាមុនទៀត ហើយមិនដឹងថាឯណាទៅការកែទម្រង់ស៊ីជម្រៅ និងការកសាងលទ្ធិប្រជាធិបតេយ្យពេញលេញឡើយ។
លោកថា៖ « បញ្ហាពុករលួយធ្ងន់ធ្ងរណាស់ ធ្ងន់ធ្ងរជាងពេលដែលប្រទេសស្ថិតក្រោមការដឹកនាំរបស់លោក Yanukovych។ បើមើលសេដ្ឋកិច្ចវិញនៅដង្ហើមផ្តឹកៗ រង់ចាំតែលុយក្រុងវ៉ាស៊ីនតោនដើម្បីបន្តរស់។ ហើយនយោបាយវិញ អ៊ុយក្រែនធ្វើអ្វីមិនកើតសោះ ព្រោះតែបន្តវាយប្រហារគ្នាទៅវិញទៅមកក្នុងសភាក្នុងចំណោមអ្នកនយោបាយ»។
យ៉ាងណាមិញ បន្ទាប់ពីបដិវត្តន៍ម៉ៃដាន (Maidan) កើតឡើងនិងមានជម្លោះប្រដាប់អាវុធកើតឡើង រដ្ឋាភិបាលក្រុងគៀវ នៅតែប៉ុនប៉ងចង់ចូលរួមជាមួយបក្សសម្ព័ន្ធយោធាណាតូ និងរំពឹងមុតមាំថា ក្រុងវ៉ាស៊ីនតោន នឹងជួយគាំទ្រនិងការពារខ្លួនឲ្យរួចផុតពីការគំរាមកំហែងរបស់រុស្ស៊ីផង។
ប៉ុន្តែការរំពឹងនេះកំពុងក្លាយជាសុបិន្ត ព្រោះកាលពីចុងខែមុន ប្រធានគណកម្មការអឺរ៉ុបលោក ហ្សង់ក្លូ ចាំងកឺ (Jean Claude Junker) បានលើកឡើងថា អ៊ុយក្រែនត្រូវការពេលយ៉ាងហោចណាស់ ២០ ទៅ ២៥ ឆ្នាំទៀតដើម្បីក្លាយជាសមាជិកសហភាពអឺរ៉ុប និងណាតូ។ ដូច្នេះហើយ វាពិតជារឿងមួយដ៏លំបាកសម្រាប់រដ្ឋាភិបាលក្រុងគៀវបច្ចុប្បន្ន ថាតើនឹងត្រូវបន្តដើរលើផ្លូវណាទៀតដើម្បីដោះស្រាយបញ្ហាប្រឈមនានាក្នុងស្រុក ខណៈដែលឱកាសនៃការក្លាយជាសមាជិកសហភាពអឺរ៉ុបនិងណាតូ បាត់បង់អស់ទៅហើយ៕
Tag:
អ៊ុយក្រែន
រុស្ស៊ី
អាមេរិក
© រក្សាសិទ្ធិដោយ thmeythmey.com