ជប៉ុនផ្តល់ថវិកាជាង ២សែនដុល្លារដល់អាជ្ញាធរខេត្តចំនួន៣ សម្រាប់ស្តារប្រឡាយ និងសង់មជ្ឈមណ្ឌលកសិកម្ម

ជាតិ

សង្គមជាតិ

ជប៉ុនផ្តល់ថវិកាជាង ២សែនដុល្លារដល់អាជ្ញាធរខេត្តចំនួន៣ សម្រាប់ស្តារប្រឡាយ និងសង់មជ្ឈមណ្ឌលកសិកម្ម

10, Mar 2016 , 11:08 pm

រូបភាព

ដោយ:

ភ្នំពេញ៖ រដ្ឋាភិបាលជប៉ុន តាមរយៈស្ថានទូតជប៉ុនប្រចាំកម្ពុជា បានផ្តល់ថវិកាសរុបចំនួន ២៦៣,៦៥៥ ដុល្លារអាមេរិក ដល់មន្ទីរធនធានទឹក និងឧតុនិយមខេត្តបាត់ដំបង មន្ទីរកសិកម្ម ខេត្តព្រះវិហារ និងមន្ទីរធនធានទឹក និងឧតុនិយមខេត្តស្វាយរៀង សម្រាប់គម្រោងស្តារប្រព័ន្ធធារាសាស្ត្រប្រឡាយ និងការសាងសង់មជ្ឃមណ្ឌលសហគមន៍កសិកម្មក្នុងខេត្តព្រះវិហារ។

ថវិកានេះ គឺជាជំនួយឥតសំណងរបស់រដ្ឋាភិបាលជប៉ុន សម្រាប់គម្រោងទ្រង់ទ្រាយតូច សន្តិសុខមនុស្សជាតិ (ជំនួយគូសាណួណ៌) ក្រោមគ្រោងការណ៍នៃកិច្ចសហប្រតិបត្តិការសេដ្ឋកិច្ចរបស់ជប៉ុន។

លោក គូម៉ាម៉ារ៉ូ យូជិ ឯកអគ្គរដ្ឋទូតជប៉ុនប្រចាំកម្ពុជា បានថ្លែងទៅកាន់ប្រធានមន្ទីរ និងសមាជិកមន្ទីរមកពីខេត្តទាំង ៣ ក្នុងពិធីចុះហត្ថលេខាផ្តល់ជំនួយនេះថា រដ្ឋាភិបាលជប៉ុន បាន និងកំពុងបន្តផ្តល់ការគាំទ្រដល់ កិច្ចខិតខំប្រឹងប្រែងរបស់ប្រជាជនកម្ពុជា តាមរយៈការគាំទ្រនូវគម្រោងអភិវឌ្ឍជាច្រើន ក្នុងនោះ រួមមាន កាស្តារឡើងវិញនូវប្រព័ន្ធធារាសាស្ត្រ និងការលើស្ទួយសហគមន៍កសិកម្ម ជាដើម។

លោកបន្តថ្លែងក្នុងពិធីដែលប្រព្រឹត្តឡើង នៅថ្ងៃទី១០ មីនានេះ ក្នុងស្ថានទូតជប៉ុនប្រចាំកម្ពុជាថា គម្រោងទាំងនេះ ធ្វើឡើងស្របតាមគោលការណ៍នៃយុទ្ធសាស្ត្រ ផ្តល់ជំនួយរបស់ជប៉ុនសម្រាប់កម្ពុជា ស្របតាមផែនការជំនួយឧបត្ថម្ភឥតសំណងទ្រង់ទ្រាយ តូចសន្តិសុខមនុស្សជាតិ ដើម្បីលើកស្ទួយសន្តិសុខមនុស្សជាតិងាយរងគ្រោះ។

ជាមួយគ្នាដែរ លោកសង្ឃឹមថា គម្រោងទាំងបីនេះ នឹងត្រូវបានអនុវត្តដោយរលូន និងមានប្រសិទ្ធភាពខ្ពស់ ព្រមទាំងសំណង់ខាងលើ ត្រូវបានថែទាំយ៉ាងត្រឹមត្រូវ ដើម្បីឲ្យប្រជាជនកាន់តែច្រើន អាចទទួលបានអត្ថប្រយោជន៍ពីគម្រោង។

បើតាមលោក គូម៉ាម៉ារ៉ូ យូជិ គម្រោងទី១ គឺការស្តារប្រឡាយ១ខ្សែប្រវែង១៤០០ម៉ែត្រ និងសំណង់ស្ទាក់ទឹកលើប្រឡាយ១កន្លែង ត្រូវចំណាយថវិកា ៨៩៣៩២ដុល្លារ ដើម្បីពង្រីកផ្ទៃដីស្រោចស្រពលើដីស្រែរបស់ប្រជាកសិករជិត៧០០នាក់ ក្នុងស្រុកថ្មគោល ខេត្តបាត់ដំបង។ គម្រោងទី២ គឺការសាងសង់មជ្ឃមណ្ឌលសហគមន៍កសិកម្មចំនួន៣កន្លែង ព្រមទាំងផ្តល់នូវម៉ាស៊ីនគោយន្ត៣គ្រឿង ម៉ាស៊ីនបោកស្រូវចំនួន២គ្រឿង ម៉ាស៊ីនបោក សណ្តែក១គ្រឿង និងឡសម្ងួតស្រូវ១គ្រឿងផងដែរ ដែលត្រូវចំណាយថវិកាជាង ៨ម៉ឺន៤ពាន់ដុល្លារ សម្រាប់បម្រើអត្ថប្រយោជន៍ដល់កសិករជាង៨៨០នាក់ នៅខេត្ត ព្រះវិហារ។ និងគម្រោងទី៣ គឺការស្តារប្រឡាយមេ១ខ្សែប្រវែង ១៤២០ម៉ែត្រ និងសំណង់ស្ទាក់ទឹក១កន្លែង ដែលត្រូវចំណាយថវិកាចំនួន ៨៩.៦០១ ដុល្លារអាមេរិក សម្រាប់សម្រួលដល់ការទទួលទឹកធ្វើស្រែរបស់កសិករចំនួន ១៦៧០នាក់ នៅក្នុងស្រុកកំពង់រោទិ៍ ខេត្តស្វាយរៀង។

លោក ឡុង ផលគុណ ប្រធានមន្ទីរធនធានទឹក និងឧតុនិយមខេត្តបាត់ដំបង និយាយថា គម្រោងស្តារប្រព័ន្ធប្រឡាយទឹក នឹងរួមចំណែកកាត់បន្ថយភាពក្រីក្ររបស់ប្រជាជន ព្រោះវានឹងធានាទឹកគ្រប់គ្រាន់សម្រាប់ស្រោចស្រពដំណាំស្រូវ បង្កើន ទិន្នផលស្រូវលើកស្ទួយជីវភាពរបស់ប្រជាជន។ លោកបានធានាថា អាជ្ញាធរនឹងថែទាំគ្រប់គ្រងសមិទ្ធផលគម្រោង ប្រកបដោយប្រសិទ្ធភាព និងនិរន្តរភាព៕