វៀតណាមចង់ដាំស្រូវនៅកម្ពុជាដើម្បីនាំចេញទៅទីផ្សារអឺរ៉ុប

អន្តរជាតិ

វៀតណាមចង់ដាំស្រូវនៅកម្ពុជាដើម្បីនាំចេញទៅទីផ្សារអឺរ៉ុប

11, Mar 2016 , 1:22 pm

រូបភាព

ដោយ: ថ្មីៗ

ក្រុមហ៊ុនវៀតណាមមួយចំនួនកំពុងពិចារណាដាក់ទុនវិនិយោគដើម្បីផលិតអង្ករនៅកម្ពុជាដើម្បីឆក់ឱកាសនាំចេញអង្ករទៅកាន់ទីផ្សារអន្តរជាតិធំៗមានអាមេរិកនិងអឺរ៉ុប។ វៀតណាមពន្យល់ថា នេះក៏ដោយសារ កម្ពុជាស្ថិតនៅក្នុងចំណោមប្រទេសដែលទទួលបានការអនុគ្រោះពន្ធពិសេសពីសហភាពអឺរ៉ុប ។

វៀតណាមជាប្រទេសដែលនាំអង្ករចេញច្រើនជាងគេ ហើយអង្ករវៀតណាមនេះក៏មានគុណភាពខ្ពស់ត្រូវតាមស្តង់ដារអន្តរជាតិដែរ។ យោងតាមសហព័ន្ធអង្ករវៀតណាម មួយឆ្នាំវៀតណាមនាំអង្ករទៅទីផ្សារអន្តរជាតិ ៨លានតោន។ ប៉ុន្តែយ៉ាងណាក៏ដោយ ប្រទេសនេះមិនអាចវាយលុកចូលទីផ្សារអឺរ៉ុប ដូចប្រទេសកម្ពុជាឡើយ។

«ការដាំដុះនិងផលិតអង្ករដែលមានគុណភាពខ្ពស់មិនមែនជាការលំបាកឡើយសម្រាប់វៀតណាម តែការស្វែងរកទីផ្សារទើបវាលំបាក»។ នេះបើយោងតាមសម្តីប្រធានក្រុមហ៊ុនអង្ករម្នាក់ដែលស្រង់ដោយសារព័ត៌មានវៀតណាម Vietnamnet។

ដោយសារបញ្ហានេះហើយ ក្រុមហ៊ុនវៀតណាមកំពុងពិចារណាបណ្តាក់ទុនបើកក្រុមហ៊ុនផលិតនិងពាណិជ្ជកម្មអង្ករនៅកម្ពុជាសម្រាប់នាំចេញទៅអឺរ៉ុប ដើម្បីអាចទាញយកប្រយោជន៍នេះបាន។ លោក Nguyen Bao មន្ត្រីទូតវៀតណាមប្រចាំកម្ពុជាក៏បានផ្តល់យោបល់ថា វៀតណាមគួរតែដាំដុះស្រូវនិងផលិតអង្ករនៅកម្ពុជាដើម្បីទទួលបានការអនុគ្រោះពិសេសនេះ។

មន្ត្រីរូបនេះបន្តថា បច្ចុប្បន្ននេះកម្ពុជាកំពុងត្រូវការទុន ៣០០លានដុល្លារអាមេរិកដើម្បីវិនិយោគក្នុងវិស័យកសិកម្ម ហើយវាជាឱកាសពិសេសសម្រាប់អ្នកជំនួញវៀតណាមក្នុងការចូលរួមចំណែកជួយកម្ពុជាក្នុងការនាំអង្ករកាន់តែច្រើនទៅកាន់ទីផ្សាអឺរ៉ុបដែរ។

របាយការណ៍ឆ្នាំ ២០១៣ បង្ហាញថា កម្ពុជានាំអង្ករប្រហែល ៤សែនតោនទៅកាន់ទីផ្សារអន្តរជាតិ ហើយអង្ករប្រហែល ៦២ភាគរយនាំចេញទៅទីផ្សារសហភាពអឺរ៉ុប។ តាមពិតទៅ កម្ពុជាស្ថិតក្នុងចំណោមប្រទេសកំពុងអភិវឌ្ឍន៍ ទើបបានជាកម្ពុជាមានអាទិភាពក្នុងការនាំចេញទំនិញទៅកាន់ទីផ្សារសហភាពអឺរ៉ុបនិងសហរដ្ឋអាមេរិកបានងាយស្រួលហើយនេះជាឱកាសដែលកម្ពុជាអាចទាញប្រយោជន៍បានក្រាស់ក្រៃដែរ។ ក្រោមគោលការណ៍ពិសេស «គ្រប់យ៉ាងតែមិនមែនអាវុធ» អនុវត្តដោយសហភាពអឺរ៉ុប ទំនិញនាំចេញពីកម្ពុជាគ្មានជាប់ពន្ធ ហើយកម្ពុជានឹងបន្តទទួលប្រយោជន៍ក្រាស់ក្រែលពីគោលនយោបាយនេះរហូតដល់ឆ្នាំ ២០២០ ឯណោះ៕