ជាតិ
នយោបាយជាតិ
គ.ជ.ប ចំណាយប្រាក់ ៤,៥ លានដុល្លារ ដើម្បីបង្រៀនពលរដ្ឋពីការបោះឆ្នោត
×
គណៈកម្មាធិការជាតិរៀបចំការបោះឆ្នោត នឹងចាប់ផ្តើមចុះបង្រៀន ប្រជាពលរដ្ឋអំពីការបោះឆ្នោត នៅខែឧសភា ឆ្នាំ២០១៦ ។ គ.ជ.ប កំណត់ទំហំទឹកប្រាក់ចំនួន ៤,៥ លានដុល្លារ សម្រាប់ចំណាយលើ បេសកកម្មដំបូងនៃការអប់រំសាធារណជន។
លោក ហង្ស ពុទ្ធា អ្នកនាពាក្យគ.ជ.ប បានលើកឡើងថា «គណៈកម្មការចំពោះកិច្ចសម្រាប់ការអប់រំសាធារណជន» បានលេចចេញជារូបរាងហើយ។ លោកបន្ថែមថា គណៈកម្មការនេះ នឹងចុះបង្រៀនប្រជាពលរដ្ឋ ចាប់ពីខែឧសភា ឆ្នាំ២០១៦ តទៅ។
ថ្លែងប្រាប់សារព័ត៌មានថ្មីៗនៅរសៀលនេះ លោក ហង្ស ពុទ្ធា បានលើកឡើងថា ប្រតិបត្តិការនៃគណៈកម្មការនេះ ទទួលការជ្រោមជ្រែងពីភាគីជប៉ុននិងអឺរ៉ុប រួមទាំងសហរដ្ឋអាមេរិកផងដែរ។ អ្នកនាំពាក្យរូបនេះ បានអះអាងថា គ.ជ.ប ត្រូវការថវិកាចំនួន ៤,៥ លានដុល្លារ សម្រាប់ដំណាក់កាលដំបូងនៃការចាប់ផ្តើមបេសកកម្មនេះ។
កន្លងមក លោកក៏ធ្លាប់បញ្ជាក់ដែរថា ការបង្កើតគណៈកម្មអប់រំសាធារណជននេះឡើង គឺដើម្បីកាត់បន្ថយភាពមិនប្រក្រតីនៃការបោះឆ្នោតនៅកម្ពុជា។ ដើម្បីនាំមកនូវប្រសិទ្ធភាពនៃការបោះ គ.ជ.ប ចាំបាច់ត្រូវអប់រំប្រជាពលរដ្ឋឲ្យមានការយល់ដឹងពីលទ្ធិប្រជាធិបតេយ្យ នីតិវិធីនៃការចុះឈ្មោះនិងការបោះឆ្នោត កាតព្វកិច្ចរបស់ប្រជាពលរដ្ឋ ព្រមទាំងច្បាប់ផ្សេងៗទៀត ទាក់ទងនឹងការបោះឆ្នោត៕
© រក្សាសិទ្ធិដោយ thmeythmey.com