វិទ្យាស្ថាន និងសាលារៀន អន្ដរទ្វីប អាមេរិកាំង ប្រារព្ធទិវាជាតិអំណានលើកទី១ នៅបីទីតាំងផ្សេងគ្នា

ជាតិ

វិទ្យាស្ថាន និងសាលារៀន អន្ដរទ្វីប អាមេរិកាំង ប្រារព្ធទិវាជាតិអំណានលើកទី១ នៅបីទីតាំងផ្សេងគ្នា

14, Mar 2016 , 4:57 pm

រូបភាព

ដោយ: ថ្មីៗ

វិទ្យាស្ថាន និងសាលារៀន អន្ដរទ្វីប អាមេរិកាំង បានរៀបចំប្រារព្ធនូវទិវាជាតិអំណានលើកទី១ នៅសាខាម៉ៅសេទុង (ការិយាល័យកណ្តាល) សាខាទួលគោក និងសាខាចាក់អង្រែ ដោយមានការអញ្ជើញចូលរួមអានសៀវភៅយ៉ាងច្រើនកុះករពីសំណាក់ប្អូនៗសិស្សានុសិស្ស លោកគ្រូ អ្នកគ្រូ បុគ្គលិក និងមាតាបិតា អ្នកអាណា- ព្យាបាលសិស្ស កាលពីថ្ងៃទី១១ ខែមីនា ឆ្នាំ២០១៦ កន្លងទៅនេះ។

លោកស្រី ឡា សុភៈ នាយកចាងហ្វាង និងចាងហ្វាងមធ្យមសិក្សាទុតិយភូមិ បានឱ្យអ្នកយកព័ត៌មានដឹងថា មូលហេតុដែលវិទ្យាស្ថាន និងសាលារៀនរៀបចំប្រារព្ធនូវទិវានេះឡើងដើម្បីបន្តនូវការចូលរួមចំណែកក្នុងការបំផុស ស្មារតី និងបណ្តុះនូវទម្លាប់ដ៏ល្អក្នុងការអានសៀវភៅដល់ប្អូនៗសិស្សានុសិស្សស្របពេលដែលអ្នកសិក្សា និងមហា ជននៅទូទាំងប្រទេសកំពុងចូលរួមអបអរ និងគាំទ្រទិវាជាតិអំណានលើកទី១ នេះដែរ។

លោកស្រីបានលើកឡើងថា ការអានអាចបំបាត់ស្ត្រេស បង្កើតនូវអារម្មណ៍ល្អ ការអានគឺជាការកម្សាន្ត ដើម្បី ទទួល បាននូវចំណេះដឹង ការអានជាប្រភពនៃគំនិត ព័ត៌មាន បទពិសោធន៍ ដំណោះស្រាយ ប្រាជ្ញាឈ្លាសវៃ និងការអភិវឌ្ឍ លើគ្រប់វិស័យ អានច្រើនចេះច្រើន បើសិស្សានុសិស្សចូលរួមសកម្មភាពអានបានកាន់តែច្រើន ឱកាសជោគជ័យ ក្នុង ការសិក្សារបស់ពួកគេក៏កាន់តែច្រើនដែរ។

លោកស្រីបានបន្តទៀតថា ការអានសៀវភៅអប់រំគឺជាឧត្តមប្រយោជន៍ដ៏ល្អបំផុតសម្រាប់មនុស្ស ជាតិគ្រប់រូបមិនថាក្មេង ឬចាស់។ សៀវភៅ ឬអត្ថបទអប់រំមានគុណតម្លៃជាងឱសថទិព្វទៅទៀតព្រោះថាអ្នកសរសេរ បានចំណាយពេល ការត្រិះរិះពិចារណា និងបទពិសោធន៍ធ្លាប់ជួបប្រទះពេញមួយជីវិតរបស់ខ្លួនដើម្បីផលិតនូវសៀវភៅដ៏មានអត្ថន័យមួយក្បាលឡើង ដូចនេះជីវិតរបស់យើងត្រូវផ្សារភ្ជាប់នឹងការអានដើម្បីឱ្យខួរក្បាលពោរពេញដោយវិចារណញ្ញាណ និងវិវឌ្ឍទាន់សម័យកាល។

កញ្ញា ស៊ូ សុជាតា បណ្ណារក្សជាន់ខ្ពស់ នៃបណ្ណាល័យ ម៉េងលី ជេ. គួច បានឱ្យដឹងដែរថា នៅក្នុងព្រឹត្តការណ៍ទិវាជាតិអំណានដែលប្រព្រឹត្តទៅកន្លងទៅនេះ លោកគ្រូ អ្នកគ្រូ បុគ្គលិក មាតាបិតា អ្នកអាព្យាបាលសិស្ស ពិសេសប្អូនៗសិស្សានុសិស្សបានចូលរួមសកម្មភាពអានយ៉ាងច្រើនផុសផុល រួមមានការអានសៀវភៅដោយសេរី ការចូលរួមគូរគំនូរលើប្រធានបទ “ខ្ញុំស្រឡាញ់អំណាន” ការទទួលនិងបរិច្ចាគសៀវភៅពីសប្បុរសជន ការគូរគំនូរលើផ្ទៃមុខ ការផាត់ពណ៌ ការបត់រូបភាព និងការអានរឿងនិទានចម្រុះជាដើម។

កញ្ញាបានឱ្យដឹងដែរថា ដើម្បីបំពេញតម្រូវការអាន និងការស្រាវជ្រាវនាពេលបច្ចុប្បន្ននេះ បណ្ណាល័យ ម៉េងលី ជេ. គួច នៃវិទ្យាស្ថាន និងសាលារៀន អន្តរទ្វីប អាមេរិកាំង បានផ្តល់នូវសៀវភៅដល់ទៅជាង៦០,០០០ក្បាល (ប្រាំមួយម៉ឺនក្បាល) ក្នុងបណ្ណាល័យធំៗ ចំនួន០៨កន្លែងហើយគ្រប់បន្ទប់សិក្សាត្រូវបានបំពាក់ដោយប្រព័ន្ធអ៊ីនធឺណេតសម្រាប់ការសិក្សារបស់ សិស្សានុ- សិស្ស ផងដែរ។

កន្លងមក បណ្ណាល័យ ម៉េងលី ជេ. គួច បានលើកទឹកចិត្ត និងផ្តល់នូវបណ្ណសរសើរដល់ សិស្សានុសិស្សដែលមានសកម្មភាពអានសៀវភៅបានច្រើនជាងគេប្រចាំខែ ឆមាស និងប្រចាំឆ្នាំសិក្សាថែមទៀតផង ហើយនៅថ្ងៃអនាគតវិទ្យាស្ថាន និងសាលារៀននឹងបង្កើតនូវបណ្ណាល័យចល័ត ម៉េងលី ជេ. គួច ដើម្បីចូលរួម បំផុសស្មារតីប្អូនៗសិស្សានុសិស្ស និងមហាជនទូទៅឱ្យមានទម្លាប់ក្នុងការអាន និងស្រាវជ្រាវឱ្យបាន កាន់តែច្រើន៕

(អត្ថបទសាលា)