អន្តរជាតិ
សហភាពអឺរ៉ុប ព្រួយបារម្ភពីការបំពាក់មីស៊ីលនៅសមុទ្រចិនខាងត្បូង
× បញ្ហាសមុទ្រចិនខាងត្បូងបាននិងកំពុងតែឡើងកម្តៅខ្លាំងរវាងភាគីពាក់ព័ន្ធ និងភាគីមិនពាក់ព័ន្ធជម្លោះ ជាពិសេស គឺជាការចោទប្រកាន់លើបញ្ហានៃការធ្វើយោធូបនីយកម្មនៃតំបន់ជម្លោះនោះ។ ជាមួយនេះ សហភាពអឺរ៉ុប ដែលមិនមែនជាភាគីជម្លោះ ក៏បានព្រួយចំពោះការវិវត្តកាន់ធ្ងន់ធ្ងរក្នុងជម្លោះ និងទទូចឲ្យ ភាគីពាក់ព័ន្ធដោះស្រាយជម្លោះដោយយោងតាមច្បាប់អន្តរជាតិ។
សហភាពអឺរ៉ុប បានទទួចឲ្យភាគីទាមទារសមុទ្រចិនខាងត្បូងដោះស្រាយជម្លោះដោយសន្តិវិធី បង្ហាញពីអំណះអំណាងនៃការទាមទាររបស់ភាគីនីមួយៗ និងបន្តការដោះស្រាយបញ្ហានេះដោយយោងតាមច្បាប់អន្តរជាតិដែលរាប់បញ្ចូលទាំងអនុសញ្ញាស្តីពីច្បាប់សមុទ្រ(UNCLOS) និងនីតិវិធីនៃមជ្ឈត្តការផងដែរ។ នេះបើយោងសេចក្តីប្រកាសព័ត៌មានក្រុមប្រឹក្សាអឺរ៉ុបដែលចុះផ្សាយកាលពីថ្ងៃទី១១ ខែមីនាកន្លង ទៅ។
សហភាពអឺរ៉ុប ពិតមានការព្រួយបារម្ភពីការបំពាក់មីស៊ីលនៅក្នុងសមុទ្រចិនខាងត្បូង ហើយការដាក់ ពង្រាយកម្លាំង និងសព្វាវុធបណ្តោះអាសន្ន ឬអចិន្ត្រៃយ៍នៅតំបន់ជម្លោះសមុទ្រ ដែលប៉ះពាល់ដល់សន្តិសុខក្នុងតំបន់ និងអាចគំរាមកំហែងដល់សេរីភាពនៃការធ្វើនាវាចរណ៍ និងការហោះហើរ គឺជាបញ្ហាចម្បងដែលត្រូវបានព្រួយបារម្ភ។ នេះបើយោងតាមសេចក្តីប្រកាសព័ត៌មានដដែលដែលបានបន្ថែមដែរថា សហភាពអឺរ៉ុប ក៏បានស្នើឲ្យភាគីបន្តការភ្ជាប់ទំនាក់ទំនងជាមួយគ្នាក្នុងការកសាងទំនុកចិត្តដើម្បីឈានទៅរកកសាងសេចក្តីទុកចិត្ត និងសន្តិសុខនៅក្នុងតំបន់។
ជុំវិញដំណើរនៃការចរចារបច្ចុប្បន្ន សហភាពអឺរ៉ុប បានគាំទ្រដំណើរការដែលដឹកនាំដោយអាស៊ាន និងរង់ចាំការផ្លាស់គោលជំហរក្នុងការបញ្ចប់ការចរចាលើក្រមប្រតិបត្តិសមុទ្រចិនខាងត្បូងដែលជាលិខិតូបករណ៍មួយដែលមានបំណងធានាពីសណ្តាប់ធ្នាប់ក្នុងតំបន់ និងអន្តរជាតិផងដែរនោះ។ ក្រមប្រតិបត្តិ បត្តិសមុទ្រចិនខាងត្បូងដែលធ្វើឡើងដោយអាស៊ាន កំពុងតែស្ថិតក្នុងដំណាក់ការចរចា ដ្បិតចិននៅតែ បន្តពន្យារពេលក្នុងការបញ្ចប់ ខណៈរដ្ឋអាស៊ាន បានព្រមព្រៀងជាឯកច្ឆ័នលើក្រមនេះហើយ។
សូមបញ្ជាក់ផងដែរ ជម្លោះសមុទ្រចិនខាងត្បូង គឺជាជម្លោះដែនអធិបតេយ្យដែលមានរដ្ឋពាក់ព័ន្ធ អាស៊ានរួមមានព្រុយណេ ម៉ាឡេស៊ី ហ្វីលីពីន និងវៀតណាម ជាមួយនឹងចិន។ ជម្លោះនេះ បានអូស បន្លាយដោយគ្មានដំណោះស្រាយជាច្រើនទសវត្សរ៍ហើយ ដ្បិតភាគីនីមួយៗ មានអំណះអំណាងផ្សេង ៗគ្នាទៅលើតំបន់ទាមទារដែលត្រួតស៊ីគ្នា ជាពិសេសនោះ គឺជាមួយនឹងចិនដែលបានទាមទារស្ទើរតែ ទាំងស្រុងនៃតំបន់ជម្លោះ។
រយៈពេលចុងក្រោយនេះ អាមេរិក និងតៃវ៉ាន់ បានចោទចិនថាកំពុងធ្វើយោធូបនីយកម្មនៅក្នុងតំបន់ សមុទ្រចិនខាងត្បូងតាមរយៈការបំពាក់ប្រព័ន្ធមីស៊ីល និងសព្វាវុធផ្សេងៗ ខណៈ ចិន ថាជាសកម្មភាព ការពារអធិបតេយ្យខ្លួនឯង។ បន្ថែមពីនេះចិន ក៏បានចោទអាមេរិកវិញថាជាអ្នកដែលកំពុងបង្កឲ្យមាន ភាពតានតឹងក្នុងតំបន់ជម្លោះតាមរយៈការបញ្ជូននាវាល្បាត និងយន្តហោះចម្បាំងមកកាន់តំបន់ជម្លោះម្តងហើយម្តងទៀត៕
© រក្សាសិទ្ធិដោយ thmeythmey.com