អន្តរជាតិ
អាមេរិកទាមទារឲ្យកូរ៉េខាងជើងដោះលែងជនជាតិខ្លួនជាបន្ទាន់
× សហរដ្ឋអាមេរិកបានទាមទារឲ្យកូរ៉េខាងជើងដោះលែងនិស្សិតរបស់ខ្លួនជាបន្ទាន់ ក្រោយពេលតុលាការកំពូលកូរ៉េខាងជើងដាក់ទោសឲ្យធ្វើការធ្ងន់ធ្ងរនៅក្នុងគុករយៈពេល១៥ឆ្នាំ ក្រោមបទចោទប៉ុនប៉ងលួចខិត្តបណ្ណឃោសនាចេញពីសណ្ឋាគារ។ អាមេរិកក៏ចាត់ទុកការកាត់ទោសនេះ ជារឿងនយោបាយដែលកូរ៉េខាងជើងបង្កើតឡើង។
សូមស្ដាប់ព័ត៌មានលម្អិត៖
ភ្លាមៗបន្ទាប់ពីកូរ៉េខាងជើងកាត់ទោសនិស្សិតអាមេរិកជាប់គុក១៥ឆ្នាំ សហរដ្ឋអាមេរិកបានទាមទារឲ្យមានការដោះលែងជាបន្ទាន់ និងបានចោទប្រកាន់កូរ៉េខាងជើងថា ដាក់ទោសនិស្សិតរូបនេះក្រោមហេតុផលនយោបាយ។ នៅថ្ងៃទី១៦ ខែមីនា អ្នកនាំពាក្យសេតវិមានលោក Josh Earnest និយាយថា ក្រុងព្យុងយ៉ាងប្រើប្រាស់ជនជាតិអាមេរិកជាកូនអុកបម្រើផលប្រយោជន៍នយោបាយរបស់ខ្លួន។
នៅថ្ងៃពុធ ទី១៦ តុលាការកំពូលកូរ៉េខាងជើងកាត់ទោសនិស្សិតជនជាតិអាមេរិកឈ្មោះ Otto Warmbier ឲ្យធ្វើពលកម្មធ្ងន់ធ្ងររយៈពេលដល់ទៅ១៥ឆ្នាំ ក្រោមបទវិទ្ធង្សនាប្រឆាំងនឹងរបបកូរ៉េខាងជើង។ នេះក៏ដោយសាររូបគេត្រួវបានចោទថា លួចយកខិត្តបណ្ណឃោសនាចេញពីតំបន់ហាមឃាត់ក្នុងសណ្ឋាគារដែលរូបគេស្នាក់នៅក្នុងទីក្រុងព្យុងយ៉ាងកាលពីខែមករាដើមឆ្នាំ។ គេអាចមើលឃើញខិត្តបណ្ណឃោសនាជាច្រើននៅទីកន្លែងជាច្រើននិយាយពីសមិទ្ធផលរបស់កូរ៉េខាងជើង និងលើកទឹកចិត្តពលរដ្ឋកូរ៉េខាងជើងស្មោះត្រង់ប្រទេស។
ជាមួយនឹងការរិះគន់ការកាត់ទោស អ្នកនាំពាក្យរូបនេះបានស្នើឲ្យមានការលើកលែងទោសពិសេសដល់និស្សិតខាងលើ និងដោះលែងជាបន្ទាន់។ លោក Earnest និយាយទៀតថា ការចោទប្រកាន់បែបនេះ នឹងមិនត្រូវបានចាប់ខ្លួនឬដាក់ទោសនោះទេ នៅទឹកដីអាមេរិកនិងប្រទេសដទៃទៀតនៅជុំវិញពិភពលោក។
ការដាក់ទោសនេះទៀតសោត ធ្វើឡើងតែប៉ុន្មានម៉ោងក្រោយអ្នកការទូតអាមេរិកលោក Bill Richardson ជួបជាមួយមន្ត្រីការទូតកូរ៉េខាងជើងពីរនាក់នៅការិយាល័យអង្គការសហប្រជាជាតិក្នុងក្រុងញូវយ៉ក ដើម្បីឲ្យមានការដោះលែងនិស្សិតខាងលើ។ កន្លងមក កូរ៉េខាងជើងតែងចាប់ខ្លួនជនជាតិអាមេរិក ដើម្បីជាថ្នូរឲ្យមានដំណើរទស្សនកិច្ចជាន់ខ្ពស់របស់មន្ត្រីអាមេរិកទៅទឹកដីរបស់ខ្លួន ដើម្បីពិភាក្សាការដោះលែងអ្នកជាប់ទោសទាំងនោះ។ អតីតប្រធានាធិបតីអាមេរិកលោក ប៊ីល គ្លីនតុន និងលោក ជីមី កាទ័រ សុទ្ធតែធ្លាប់ទៅកូរ៉េខាងជើង សម្រាប់ដោះស្រាយបញ្ហានេះ។
មកទល់ពេលនេះ មានប្រជាជនមកពីអាមេរិកខាងជើងបីនាក់ហើយ ដែលកំពុងជាប់ឃុំខ្លួនក្នុងកូរ៉េខាងជើង។ ក្នុងនោះក៏មានអាចារ្យជនជាតិកាណដាម្នាក់ ដែលត្រូវតុលាការកូរ៉េខាងជើង កាត់ទោសជាប់គុកមួយជីវិតក្រោមបទចោទបំបះបំបោរផងដែរ៕
Tag:
កូរ៉េខាងជើង
អាមេរិក
© រក្សាសិទ្ធិដោយ thmeythmey.com