ជាតិ
នយោបាយជាតិ
លោក គាត ឈន់ លោក ហោ ណាំហុង និងលោក អ៊ឹម ឈុនលឹម នឹងបានសម្រាកច្រើន ពីឆ្វេងទៅស្តាំ៖ លោក ហោ ណាំហុង លោក គាត ឈន់ និងលោក អ៊ឹម ឈុនលឹ
× មន្ត្រីជាន់ខ្ពស់ចាស់វស្សា៣រូបរបស់រដ្ឋាភិបាល គឺលោក គាត ឈន់ លោក អ៊ឹម ឈុនលឹម និងលោក ហោ ណាំហុង នឹងបានសម្រាកកាយច្រើនពីកិច្ចការនយោបាយ បន្ទាប់ពីឥស្សរជនទាំងនេះ បានស្នើសុំបញ្ចប់មុខងាររបស់ខ្លួនពីស្ថាប័នជាតិ។ នេះបើតាមបញ្ជីឈ្មោះមួយដែលសម្តេចនាយករដ្ឋមន្ត្រី ហ៊ុន សែន ផ្ញើទៅកាន់សម្តេច ហេង សំរិន ប្រធានរដ្ឋសភា លើការសម្រួល និងបំពេញបន្ថែមនូវសមាសភាពរដ្ឋាភិបាល។
បញ្ជីឈ្មោះដែលផ្សាយដោយ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី សម្តេចនាយករដ្ឋមន្ត្រី ហ៊ុន សែន កាលពីថ្ងៃទី១៦ ខែមីនា បានសុំឲ្យសភា រៀបចំការបោះឆ្នោតផ្តល់សេចក្តីទុកចិត្តលើការសម្រួល និងបំពេញបន្ថែមនូវសមាសភាពរដ្ឋាភិបាល ដែលមានចំនួន២៤រូប។
ក្នុងចំណោមឥស្សរជនទាំងនោះ លោក គាត ឈន់ លោក អ៊ឹម ឈុនលឹម និងលោក ហោ ណាំហុង គឺជាមន្ត្រីដែលមានវ័យចំណាស់ជាងគេ ដែលមានឱកាសសម្រាកពីកិច្ចការនយោបាយបានច្រើន ប៉ុន្តែឥស្សរជនទាំងបីរូបសុទ្ធតែស្ថិតក្នុងចំណោមជាសមាជិកជាន់ខ្ពស់ជាង៣០រូបរបស់គណបក្សប្រជាជនកម្ពុជា ដែលមានសម្តេច ហ៊ុន សែន ជាប្រធាន និងសម្តេច ស ខេង និងសម្តេច សាយ ឈុំ ជាអនុប្រធាន។
យោងតាមលិខិតរបស់សម្តេច ហ៊ុន សែន លោក គាត ឈន់ វ័យ៨១ឆ្នាំ នឹងត្រូវបញ្ចប់មុខងារជាឧបនាយករដ្ឋមន្ត្រីប្រចាំការ។ លោកគឺជាអ្នកនយោបាយជើងចាស់ម្នាក់ ហើយបានកាន់កាប់តំណែងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុពីឆ្នាំ១៩៩៤ដល់ឆ្នាំ២០១៣ មុននឹងទទួលបានតំណែងជាឧបនាយករដ្ឋមន្ត្រីប្រចាំការ។ បច្ចុប្បន្នលោកក៏ជាអ្នកតំណាងរាស្ត្រមណ្ឌលភ្នំពេញ។
លោក ហោ ណាំហុង វ័យ៨០ឆ្នាំ បានស្នើបញ្ចប់មុខងារជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ដែលលោកបានកាន់កាប់តាំងពីឆ្នាំ១៩៩៨មក។ ប៉ុន្តែមុខងារជាឧបនាយករដ្ឋមន្ត្រីដែលត្រូវបានតែងតាំងចាប់ពីឆ្នាំ២០០៤មក ត្រូវរក្សានៅដដែល។ ជាមួយគ្នានេះ លោកជាអ្នកតំណាងរាស្ត្រមណ្ឌលកំពង់ចាមផងដែរ។តំណែងលោក ហោ ណាំហុង នឹងត្រូវជំនួសដោយ លោក ប្រាក់ សុខុន ដែលផ្ទេរពីក្រសួងប្រៃសណីយ៍ និងទូរគមនាគមន៍។
ដោយឡែក លោក អ៊ឹម ឈុនលឹម ដែលមានវ័យជិត៨០ឆ្នាំផងដែរនោះ នឹងត្រូវបញ្ចប់មុខងារជាទេសរដ្ឋមន្ត្រី និងជារដ្ឋមន្ត្រីក្រសួងរៀបចំដែននដីនគរូបនីយកម្ម និងសំណង់ ដែលលោកបានកាន់កាប់អស់រយៈពេលជាច្រើនឆ្នាំ ហើយតំណែងរបស់លោកនឹងត្រូវជំនួសដោយលោក ជា សុផារ៉ា ដែលផ្ទេរពីក្រសួងអភិវឌ្ឍន៍ជនបទ។
ពិធីផ្លាស់ប្តូរ និងកែសម្រួលការងារគណៈរដ្ឋមន្ត្រីនឹងប្រព្រឹត្តទៅនាថ្ងៃទី៤ ខែមេសា ខាងមុខនេះ៕
© រក្សាសិទ្ធិដោយ thmeythmey.com