ពីរដ្ឋមន្ត្រីទៅរដ្ឋមន្ត្រី...!

ជាតិ

នយោបាយជាតិ

ពីរដ្ឋមន្ត្រីទៅរដ្ឋមន្ត្រី...!

18, Mar 2016 , 4:05 pm

រូបភាព

ដោយ: រួបរួម

ក្រសួងចំនួន៨ នឹងមានរដ្ឋមន្ត្រីថ្មី ដែលត្រូវចូលកាន់តំណែងនាថ្ងៃទី៤ ខែមេសា ឆ្នាំ២០១៦ ខាងមុខ។ ក្រសួងចំនួន២នឹងដឹកនាំដោយឥស្សរជនដែលធ្លាប់មានតំណែងជារដ្ឋលេខាធិការ រីឯក្រសួង៦នឹងដឹកនាំដោយរដ្ឋមន្ត្រីមកពីក្រសួងផ្សេង ហើយរដ្ឋមន្ត្រីមួយចំនួនឡើងមុខងារជា «ទេសរដ្ឋមន្ត្រី» ។

លោក ប្រាក់ សុខុន នឹងត្រូវបានតែងតាំងជាទេសរដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ដើម្បីជំនួសលោក ហោ ណាំហុង ដែលស្នើសុំបញ្ចប់តំណែង ដោយរក្សាទុកមុខងារជាឧបនាយករដ្ឋមន្ត្រី។

តំណែងជារដ្ឋមន្ត្រីក្រសួងប្រៃសណីយ៍ និងទូរគមនាគមន៍របស់លោក ប្រាក់ សុខុន នឹងត្រូវជំនួសដោយ លោក ត្រាំ អ៊ីវតឹក។ ស្របពេលដែលលោក ស៊ុន ចាន់ថុល ដែលមានមុខងារជាទេសរដ្ឋមន្ត្រីផងដែរនោះ វិលត្រឡប់ទៅគ្រប់គ្រងក្រសួងសាធារណការ និងដឹកជញ្ជូន ជំនួសលោក ត្រាំ អ៊ីវតឹក វិញ។

ការចាកចេញរបស់លោក ស៊ុន ចាន់ថុល នាំឲ្យលោក ប៉ាន សូរស័ក្ត ឡើងតំណែងពីរដ្ឋលេខាធិការ ទៅជារដ្ឋមន្ត្រីក្រសួងពាណិជ្ជកម្ម។ លោក ជា សុផារ៉ា នឹងមានមុខងារជាទេសរដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលលោកធ្លាប់ធ្វើជារដ្ឋលេខាធិការ។

វត្តមានរបស់លោក ជា សុផារ៉ា គឺដើម្បីជំនួសលោក អ៊ឹម ឈុនលឹម ដែលបានស្នើសុំបញ្ចប់មុខងារ ខណៈតំណែងជារដ្ឋមន្ត្រីក្រសួងអភិវឌ្ឍន៍ជនបទរបស់លោក ជា សុផារ៉ា នឹងត្រូវជំនួសដោយ លោក អ៊ុក រ៉ាប៊ុន។ ជាមួយគ្នានេះ លោក វេង សាខុន រដ្ឋលេខាធិការក្រសួងធនធានទឹក និងឧតុនិយម នឹងឡើងកាន់តំណែងជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជំនួសលោក អ៊ុក រ៉ាប៊ុន។

លោក ហ៊ឹម ឆែម អតីតរដ្ឋមន្ត្រីក្រសួងវប្បធម៌ និងវិចិត្រសិល្បៈ នឹងកាន់តំណែងជារដ្ឋមន្ត្រីក្រសួងធម្មការ និងសាសនា បន្តពីលោក មិន ឃិន ខណៈដែលលោក មិន ឃិន ឡើងមុខងារជាទេសរដ្ឋមន្ត្រីទទួលបន្ទុកបេសកកម្មពិសេស។

លោក អូន ព័ន្ធមុនីរ័ត្ន រក្សាតំណែងរបស់ខ្លួនជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ប៉ុន្តែលោកបានឡើងមុខងារ ជាទេសរដ្ឋមន្ត្រី បន្ថែមពីលើ៕