ទូកក្តោងបើកយុទ្ធនាការបណ្តុះបណា្តលធនធាន ប្រមូលផ្តុំកីឡាករជម្រើសជាតិ

កីឡាជាតិ

ជាតិ

ទូកក្តោងបើកយុទ្ធនាការបណ្តុះបណា្តលធនធាន ប្រមូលផ្តុំកីឡាករជម្រើសជាតិ

18, Mar 2016 , 8:59 pm

រូបភាព

ដោយ:

កីឡាទូកក្តោងជាប្រភេទកីឡាមួយដែលកំពុងមានការពេញនិយម នៅតាមបណ្តាប្រទេសជឿនលឿនមួយចំនួន ។ កីឡាមួយនេះបានបង្ហាញវត្តមានពីរដងហើយនៅកម្ពុជា ដូចជាក្នុងពិធីបុណ្យសមុទ្រ នៅខេត្តកំពត និងបុណ្យទន្លេលើកទី២ នៅខេត្តកំពង់ចាម។ សហព័ន្ធកីឡាទូកក្តោងកម្ពុជា បាននិងកំពុងបើកយុទ្ធនាការបណ្តុះបណ្តាលធនធានកីឡាករ ដើម្បីប្រមូលផ្តុំចូលជាកីឡាករជម្រើសជាតិ សម្រាប់ត្រៀមប្រកួតក្នុងព្រឹត្តិការណ៍ជាតិ និងអន្តរជាតិផ្សេងៗ ជាពិសេសដើម្បីត្រៀមប្រកួតស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។

សហព័ន្ធកីឡាទូកក្តោងកម្ពុជា ដោយទទួលបានការជួយជ្រោមជ្រែងរបស់គ្រូឧទ្ទេសជនជាតិសិង្ហបុរី សញ្ជាតិខ្មែរ លោក Meng Wang បាននិងកំពុងធ្វើយុទ្ធនាការបណ្តុះបណ្តាលធនធានកីឡាករកីឡាការិនីតាមបណ្តាខេត្តមួយចំនួនដែលនៅជាប់ទន្លេ និងសមុទ្រ។ ការបណ្តុះបណ្តាលនេះ ធ្វើឡើងក្នុងគោលបំណងដើម្បីពង្រឹងសមត្ថភាព និងបច្ចេកទេសរបស់កីឡាករ សម្រាប់ប្រមូលផ្តុំកីឡាករជម្រើសជាតិ ដើម្បីត្រៀមប្រកួតលក្ខណៈជាតិ និងអន្តរជាតិផ្សេងៗ ជាពិសេសការប្រកួតស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ នេះបើយោងតាមលោក ថោង រដ្ឋាសក្តិ អនុប្រធានសហព័ន្ធកីឡាទូកក្តោងកម្ពុជា កាលពីពេលកន្លងទៅថ្មីៗនេះ។

អនុប្រធានសហព័ន្ធរូបនេះបានបង្ហាញយុទ្ធសាស្ត្រ ក៏ដូចជាគោលដៅទៅថ្ងៃអនាគតថា ក្នុងឆ្នាំ២០១៦នេះធ្វើយ៉ាងណាត្រូវជ្រើសរើសកីឡាករជម្រើសជាតិមួយចំនួនឲ្យបាន ដើម្បីធ្វើជាតំណាងឲ្យក្រុមកីឡាករ និងសហព័ន្ធកីឡាទូកក្តោងកម្ពុជា សម្រាប់ចេញទៅហ្វឹកហាត់ជាលក្ខណៈអន្តរជាតិ ដើម្បីពង្រឹងសមត្ថភាព និងបច្ចេកទេសឲ្យកាន់តែខ្លាំងឡើងថែមទៀត។

លោកបានរៀបរាប់បែបនេះថា៖«តាមចក្ខុវិស័យរបស់សហព័ន្ធ ធ្វើយ៉ាងម៉េចក្នុងឆ្នាំ២០១៦ នេះ ជ្រើសរើសកីឡាមួយចំនួនឲ្យធ្វើជាតំណាងកីឡាករជម្រើសជាតិ បន្ទាប់មកយើងចម្រាញ់កីឡាករជម្រើសជាតិ ដើម្បីបញ្ជូនទៅហ្វឹកហាត់ជាលក្ខណៈអន្តរជាតិទៀត ព្រោះឥឡូវនេះយើងបានទំនាក់ទំនងជាមួយប្រទេសសិង្ហបុរី និង ចិន រួចរាល់ហើយ នៅពេលពួកគាត់មានធនធាន និងសក្តានុពលគ្រប់គ្រាន់ យើងនឹងបញ្ជូនពួកគាត់ទៅហ្វឹកហាត់នៅប្រទេសចិន ឫប្រទេសសិង្ហបុរី»។

លោក ថោង រដ្ឋាសក្តិ បានបន្ថែមថា ដោយសារបច្ចុប្បន្នកម្ពុជាបានប្រារព្ធធ្វើពិធីបុណ្យសមុទ្រ និងបុណ្យទន្លេជារៀងរាល់ឆ្នាំ សហព័ន្ធនឹងបង្កើតឲ្យមានជាមូលដ្ឋានរបស់ខ្លួនដើម្បីដាក់ឧបករណ៍ហ្វឹកហាត់មួយចំនួននៅតាមខេត្ត-ក្រុង ដែលប្រារព្ធពិធីទាំងនោះ ដើម្បីឲ្យកីឡាករកីឡាការិនីដែលតំបន់នោះធ្វើការហ្វឹកហាត់។

លោកពន្យល់ថា៖«បច្ចុប្បន្នយើងមានបុណ្យទន្លេ និងបុណ្យសមុទ្រដែលធ្វើរៀងរាល់ឆ្នាំ ដូន្នេះយើងមានគោលការណ៍មួយនៅពេលមានបុណ្យទន្លេ ឬបុណ្យសមុទ្រយើងនឹងដាក់ឧបករណ៍៣, ៤, ៥ឧបករណ៍ នៅទីនោះ បន្ទាប់មកយើងនឹងបង្កើតជាមូលដ្ឋានរបស់សហព័ន្ធ ដើម្បីឲ្យកីឡាករកីឡាការិនីនៅតំបន់នោះធ្វើការហ្វឹកហាត់»។

ជាមួយគ្នានេះ លោក Meng Wang ជំនួយការសហព័ន្ធកីឡាទូកក្តោងកម្ពុជា បានមានប្រសាសន៍ថា ដើម្បីឲ្យកីឡាករកឡាការិនីមានជំនាញ និងសមត្ថភាពគ្រប់គ្រាន់ គ្រប់វិស័យទាំងអស់ ត្រូវចំណាយពេលហ្វឹកហាត់ក្នុងរយៈពេលយូរទើបទទួលបានលទ្ធផលល្អ។ យ៉ាងណាមិញដើម្បីឲ្យវិស័យកីឡាទូកក្តោងនៅកម្ពុជាមានការរីចម្រើន និងដើម្បីឲ្យកីឡាករកីឡាការិនីអាចជិះទូកក្តោងបានស្ទាត់ជំនាញត្រូវចំណាយពេលវេលាហ្វឹកហាត់ពី ៥ឆ្នាំ ទៅ៦ឆ្នាំទើបទទួលលទ្ធផលល្អ។

លោកបានបន្ថែមថា ដើម្បីពង្រឹងសមត្ថភាពត្រៀមប្រកួតស៊ីហ្គេមដែលកម្ពុជាធ្វើជាម្ចាស់ផ្ទះ សហព័ន្ធទូកក្តោងកម្ពុជា បច្ចុប្បន្នកំពុងធ្វើការបំផុសសកម្មភាពកីឡាទូកក្តោងដល់សាធារណៈជន និងមហាជន ជាពិសេសយុវជន និងយុវនារី ឲ្យចូលរួមលេងកីឡានេះទាំងអស់គ្នា។ ការធ្វើបែបនេះថក្នុងគោលបំណងដើម្បីជ្រើសរើសកីឡាករដែលមានសក្តានុពល និងសមត្ថភាពទៅហ្វឹកហាត់ ដើម្បីចម្រាញ់ជ្រើសរើសកីឡាករជម្រើសជាតិ សម្រាប់បណ្តុះបណ្តាលឲ្យមានជំនាញវិជ្ជាជីវខាងជិះទូកក្តោងដ៏ពូកែ និងដើម្បីបញ្ជូនពួកគេទៅប្រកួតស៊ីហ្គេមនៅឆ្នាំក្រោយនេះ។

លោក Meng Wang បានប្តេជ្ញាចិត្តថា លោកនឹងខិតខំប្រឹងប្រែងបង្ហាត់បង្រៀនកីឡាទូកក្តោងនេះដល់កីឡាករកីឡាការិនីកម្ពុជា រហូតដល់ពួកគេមានសមត្ថភាពគ្រប់គ្រាន់ ដើម្បីចូលរួមប្រកួតដណ្តើមយកមេដាយក្នុងព្រឹត្តិការណ៍ប្រកួតស៊ីហ្គេមលើកទី៣២ ឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ។

គួរបញ្ជាក់ថា សហព័ន្ធកីឡាទូកក្តោងកម្ពុជា ដែលទើបតែបង្កើតក្នុងឆ្នាំ២០១៥ ក្រោមការផ្តួចផ្តើមរបស់ NOCC និងលោក ហ្គោដិន តាំង ដែលជាប្រធានសហព័ន្ធ ធ្លាប់បានចូលរួមសម្តែងក្នុងព្រឹត្តិការណ៍ចំនួនពីររួចមកហើយគឺក្នុងព្រឹត្តិការណ៍បុណ្យសមុទ្រ នៅខេត្តកំពត និងបុណ្យទន្លេលើកទី២ នៅខេត្តកំពង់ចាម។ សម្រាប់ការបង្ហាញវត្តមាននេះដែរ កីឡាមួយនេះទទួលបានការគាំទ្រយ៉ាងច្រើនកុះករផងដែរ៕