កីឡាជាតិ
ក្រសួងអប់រំបើកយុទ្ធនាការស្វែងរកជើងឯកសិស្សទូទាំងប្រទេសលើកីឡា៤ប្រភេទ
× ក្រសួងអប់រំ យុវជន និងកីឡា នឹងបើកយុទ្ធនាការប្រកួតកីឡាដើម្បីចម្រាញ់ស្វែងរកជើងឯកសិស្សកម្រិតវិទ្យាល័យទូទាំងប្រទេស លើវិញ្ញាសាចំនួន៤ប្រភេទ ប្រចាំឆ្នាំសិក្សា ២០១៥-២០១៦ នាខេត្តកំពតដែលប្រព្រឹត្តទៅរយៈពេល១២ថ្ងៃ ចាប់ពីថ្ងៃទី៤ ដល់ថ្ងៃទី១៥ ខែឧសភា ឆ្នាំ២០១៦។
វិញ្ញាសាចំនួន៤ប្រភេទដូចជា បាល់បោះ បាល់ទះ បាល់ទាត់ និងអត្តពលកម្ម ត្រូវបានក្រសួងអប់រំយុវជន និងកីឡា ដាក់ឲ្យសិស្សកម្រិតវិទ្យាល័យប្រកួត ដើម្បីចម្រាញ់ជ្រើសរើសជើងឯកទូទាំងប្រទេសប្រចាំឆ្នាំសិក្សា ២០១៥-២០១៦។ ការប្រកួតនេះនឹងប្រព្រឹត្តទៅរយៈពេល១២ថ្ងៃ ចាប់ពីថ្ងៃទី៤ ដល់ថ្ងៃទី១៥ ខែឧសភា ឆ្នាំ២០១៦ នាខេត្តកំពត។ នេះបើយោងតាមកម្មវិធីរបស់ក្រសួងអប់រំយុវជន និងកីឡាក្នុងន័យបំផុសចលនាកីឡាតាមសាលារៀនរដ្ឋ និងឯកជនទិសដៅឆ្នាំ២០១៦។
គួរបញ្ជាក់ថា ការប្រកួតជើងឯកសិស្សទូទាំងរាជធានីភ្នំពេញដើម្បីស្វែងរកជើងឯកចូលរួមប្រកួតជើងឯកទូទាំងប្រទេសនៅខេត្តកំពត ដែលធ្វើនៅលើទីលានវេស្ទើន បានបញ្ចប់ហើយកាលពីថ្ងៃទី១៦ ខែមីនា ខណៈម្ចាស់ជើងវិញ្ញាសារកីឡាអត្តពលកម្មកម្រិតអនុវិទ្យាល័យបានទៅអនុវិទ្យាល័យដង្កោ និងកម្រិតវិទ្យាល័យម្ចាស់ជើងឯកបានទៅ សាលាមេតូឌីស្ទកម្ពុជា។
វិញ្ញាសាបាល់ទះនារីកម្រិតអនុវិទ្យាល័យ ម្ចាស់ជើងឯកបានទៅសាលាសិលាមាស ខណៈម្ចាស់ជើងឯកបាល់ទះនារីកម្រិតវិទ្យាល័យ បានទៅវិទ្យាល័យច្បារអំពៅ។ វិញ្ញាសារបាល់បោះនារី កម្រិតអនុវិទ្យាល័យម្ចាស់ជើងឯកបានទៅអនុវិទ្យាល័យជន្លុង។ ចំណែកបាល់បោះនារីកមក្រិតវិទ្យាល័យម្ចាស់ជើងឯកបានទៅសាលាអន្តរទ្វីបអាមេរិកកាំងនិងបាល់បោះបុរសកម្រិតវិទ្យាល័យម្ចាស់ជើងឯកបានវិទ្យាល័យវត្តកោះ។
វិញ្ញាសាបាល់ទាត់បុរសកម្រិតអនុវិទ្យាល័យម្ចាស់ជើងឯកបានទៅវិទ្យាល័យចតុមុខ។ ចំណែកវិញ្ញាសាបាល់ទាត់នារីកម្រិតវិទ្យាល័យម្ចាស់ជើងឯកបានទៅវិទ្យាល័យ ជាស៊ីម សាមគ្គី ខណៈវិញ្ញាសាបាល់ទាត់បុរសកម្រិតវិទ្យាល័យបានទៅវិទ្យាល័យ ហ៊ុន សែន ជម្ពូវ័ន។
ទន្ទឹមនឹងនេះ សម្រាប់ការប្រកួតនៅលើទីលានវេស្ទើនវិទ្យាល័យដែលអាចទៅចូលរួមការប្រកួតជើងឯកទូទាំងប្រទេសបានមាន សាលាមេតូឌីស្ទកម្ពុជា, សាលាអន្តរទ្វីបអាមេរិកកាំង, វិទ្យាល័យច្បារអំពៅ, វិទ្យាល័យវត្តកោះ, វិទ្យាល័យ ជា ស៊ីម សាមគ្គី និងវិទ្យាល័យ ហ៊ុន សែន ជម្ពូវ័ន៕
© រក្សាសិទ្ធិដោយ thmeythmey.com