កីឡាជាតិ
សហព័ន្ធកីឡាបាល់ទាត់កម្ពុជា នឹងសាងសង់តារាងសិប្បនិម្មិតមួយទៀតនៅបាទី
× ស្របពេលដែលវិស័យកីឡាបាល់ទាត់កម្ពុជា កំពុងមានការរីកចម្រើនយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ គេសង្កេតឃើញមាន ក្លិប- សមាគមបាល់ទាត់ជាច្រើនត្រូវបានបង្កើតឡើង អ្វីដែលសំខាន់វិស័យមួយនេះបាននិងកំពុងបង្កើនសកម្មភាពប្រកួតដណ្តើមពានរង្វាន់ផ្សេងៗជាច្រើន។ ដូច្នេះដើម្បីឆ្លើយតម នឹងបំពេញតម្រូវទាំងនេះ សហព័ន្ធកីឡាបាល់ទាត់កម្ពុជា នឹងសាងសង់តារាងបាល់ទាត់សិប្បនិម្មិតតម្លៃប្រមាណ ៦០ម៉ឺនដុល្លារបន្ថែមទៀត នៅក្នុងស្រុកបាទី ខេត្តតាកែវ ហើយគម្រោងនេះគ្រោងនឹងបញ្ចប់ក្នុងឆ្នាំ២០១៦ នេះ។
សហព័ន្ធកីឡាបាល់ទាត់កម្ពុជា នឹងសាង់សង់តារាងបាល់ទាត់សិប្បនិម្មិតតម្លៃប្រមាណ ៦០ម៉ឺនដុល្លារ នៅស្រុកបាទី ខេត្តតាកែវ ដើម្បីជួយសម្រួលដល់ការហ្វឹកហាត់ និងការប្រកួតដណ្តើមពានរង្វាន់ផ្សេងៗ ស្របពេលដែលកម្ពុជាកំពុងមានការកើនឡើងនូវកិ្លប-សមាគមបាល់ទាត់ជាច្រើនផងដែរ។ តារាងសិប្បនិម្មិតនេះសាងសង់ឡើងតាមខ្នាតដែលអាចលេងជាឈុតធំបាន(ម្ខាង១១នាក់) ហើយគ្រោងនឹងបញ្ចប់ការសាងសង់នៅក្នុងឆ្នាំ២០១៦នេះ។ នេះបើយោងតាម លោក សៅ សុខា ប្រធានសហព័ន្ធកីឡាបាល់ទាត់កម្ពុជា នាមហាសន្និបាតសហព័ន្ធកីឡាបាល់ទាត់កម្ពុជា កាលពីព្រឹកថ្ងៃទី១៦ ខែមីនា នៅសណ្ឋាគារភ្នំពេញ។
ប្រធានសហព័ន្ធកីឡាកីឡាបាល់ទាត់រូបនេះបានបញ្ជាក់ថា៖«កញ្ចប់ថវិកាក្នុងការសាងសង់តារាងបាល់ទាត់សិប្បនិម្មិតនេះគឺជាគម្រោងអភិវឌ្ឍន៍ហេដ្ឋារចនាសម្ព័ន្ធទី៦ ដែលបានមកពីFIFA គឺចំនួន ៦០ម៉ឺនដុល្លារសហរដ្ឋអាមេរិច ហើយបើយោងតាមគម្រោងសាង់សង់នេះនឹងបញ្ចប់ក្នុងឆ្នាំ២០១៦ នេះ»។
គួរបញ្ជាក់ផងដែរថា មហាសន្និបាតសហព័ន្ធកីឡាបាល់ទាត់កម្ពុជាកាលពីព្រឹកថ្ងៃទី១៦ ខែមីនា នៅសណ្ឋាគារភ្នំពេញ មានការចូលរួមពីសំណាក់ លោក សៅ សុខា ប្រធានសហព័ន្ធ លោក លោក វ៉ាត់ ចំរើន អគ្គលេខាធិការ(NOCC), លោក តែម ម៉ឺន, លោក ហ៊ុន សាមុត, លោក ដួង មាសចំរើន, លោក ឬទ្ធី សំណាង, លោក ខៀវ សាម៉េត, លោក គល់ សុផាណា, លោក អ៊ុក សិទ្ធិជាតិ, លោក ឡា ឡៃ និង លោក ខៀវ ចិន្តាវ័ន្ត។ នាឱកាសនេះដែរក៏មានការបោះឆ្នោតតែងតាំងសមាជិកគណៈកម្មការប្រតិបត្តិថ្មីផងដែរ ក្នុងនោះ លោក ហ៊ុន សាមុត និង លោក ប៉ុន សុខ បានក្លាយជាសមាជិគណៈកម្មការប្រតិបតិ្តថ្មីអាណត្តិ ២០១៦-២០២០ ប្រចាំសហព័ន្ធកីឡាបាល់ទាត់កម្ពុជានេះ៕
Tag:
បាល់ទាត់
សៅ សុខា
NOCC
© រក្សាសិទ្ធិដោយ thmeythmey.com