ជាតិ
នយោបាយជាតិ
ឯកឧត្តម កឹម សុខា និងសម្ដេច ហ៊ុន សែន មើលការរុះរើគណៈរដ្ឋមន្ត្រីក្នុងផ្លូវខុសគ្នា
× ប្រធានស្តីទីគណបក្សសង្គ្រោះជាតិ ឯកឧត្តម កឹម សុខា យល់ថា ការរុះរើគណៈរដ្ឋមន្ត្រីរបស់សម្ដេច ហ៊ុន សែន ពេលនេះ គឺគ្រាន់តែជាការបង្ហាញរូបភាពសើៗ ដែលមិនមែនជាការកំណែទម្រង់ ដើម្បីប្រសិទ្ធភាពការងារឡើយ។ ផ្ទុយពីឯកឧត្តម កឹម សុខា សម្ដេចនាយករដ្ឋមន្ត្រី ហ៊ុន សែន បានប្រកាសដោយភាពជឿជាក់កន្លងមកថា ការរុះរើគណរដ្ឋមន្ត្រីនេះ គឺជាបង្កើនប្រសិទ្ធភាពការងារដោះស្រាយបញ្ហាជូនប្រជាពលរដ្ឋ។
ការរុះរើគណៈរដ្ឋមន្ត្រី ដោយមានការផ្លាស់ប្ដូរមុខតំណែងមន្ត្រីតាមក្រសួង៨នេះ ក៏ជាលទ្ធផលវិជ្ជមាននៃការកែទម្រង់មួយ ដែលឯកឧត្តម កឹម សុខា ទទួលស្គាល់ថា រដ្ឋាភិបាលកំពុងព្យាយាមខំដោះស្រាយបញ្ហាប្រជាពលរដ្ឋ។ បើទោះជាមានការគាំទ្រក្តី តែប្រធានស្តីទីបក្សប្រឆាំងរូបនេះ ហាក់នៅតែបន្ដុះបង្អាប់ថា ការកំណែទម្រង់បែបនេះ គឺគ្រាន់តែជារូបភាពស្រាលៗ ដែលមិនទាន់ជារូបមន្តនៃការកែទម្រង់ឲ្យបានច្បាស់លាស់ ដើម្បីបង្កើនប្រសិទ្ធិភាពការងារឡើយ។
ថ្លែងទៅកាន់អ្នកគាំទ្រខ្លួននៅខេត្តពោធិ៍សាត់ព្រឹកនេះ ប្រធានស្តីទីបក្សប្រឆាំងរូបនេះបានបញ្ជាក់ដូច្នេះថា៖«រហូតមកដល់សព្វថ្ងៃនេះ ជាពិសេសេថ្មីៗនេះ រាជរដ្ឋាភិបាលក៏បានបង្ហាញការកែទម្រងខ្លះដែរ អ្វីដែលគេបង្ហាញនេះ ក៏មិនខុសអ្វីពីសេចក្ដីប្រាថ្នារបស់ប្រជាពលរដ្ឋដែរ។ ក៏ប៉ុន្ដែយើងនៅតាមមើលការជាក់ស្ដែង តើការបង្ហាញបែបនេះ វាបានផលប្រយោជន៍ដល់ប្រជាពលរដ្ឋ និងបានផលប្រយោជន៍ដល់ប្រទេសជាតិយើងណា? ប៉ុន្ដែការវាយតម្លៃស្ថានការណ៍នេះរបស់យើងខ្ញុំ ខ្ញុំគិតថាការបង្ហាញគ្រាន់តែជាការសើៗនៅខាងលើ មិនមានប្រព័ន្ធនៃការកែទម្រង់ច្បាស់លាស់ ខ្ញុំជឿថាមិនអាចសម្រេចតាមគោលបំណងប្រាថ្នារបស់ប្រជាពលរដ្ឋឡើយ»។
ផ្ទុយពីការយល់ឃើញរបស់ឯកឧត្តម កឹម សុខា សម្ដេចនាយករដ្ឋមន្ត្រី ហ៊ុន សែន ដែលបានដឹងពីការអសមត្ថភាពរបស់រដ្ឋមន្ត្រីមួយចំនួននោះ បានពិចារណាច្រើនដងហើយដែរ មុននឹងលោកសម្រេចចិត្តរុះរើគណៈរដ្ឋមន្ត្រីក្នុងរយៈពេលជាង២ឆ្នាំ នៃអាណត្តិទី៥នេះ។ ថ្លែងក្នុងពិធីចែកសញ្ញាបត្រដល់និស្សិតវិទ្យាល័យន័រតុនកាលពីពេលថ្មីៗនេះ សម្ដេច ហ៊ុន សែន បានអះអាងដោយភាពជឿជាក់ថា ការរុះរើគណរដ្ឋមន្ត្រីនេះ គឺជាការបង្កើនប្រសិទ្ធភាពការងារដោះស្រាយបញ្ហាជូនប្រជាពលរដ្ឋ ។ ហើយមន្ត្រីដែលបានផ្លាស់ប្ដូរតំណែង និងបញ្ចប់តួនាទីនោះ មិនមែនជាមនុស្សដែលសម្ដេច ចង់កម្ចាត់ចោលនោះឡើយ។
សូមស្ដាប់ប្រសាសន៍សម្ដេច ហ៊ុន សែន ដែលថ្លែងអះអាងក្នុងពិធីចែកសញ្ញាបត្រកន្លងមក៖
ជុំវិញការរុះរើគណៈរដ្ឋមន្ត្រីនេះ ក្រៅពីលោក អូន ព័ន្ធមន្នីរត្ន ដែលកាន់តំណែងដដែលនោះ អ្នកវិភាគ យល់ឃើញថា ការផ្លាស់ប្តូររដ្ឋមន្ត្រីនេះគឺមានតែលោក ស៊ុន ចាន់ថុល និងលោក ជា សុផារ៉ា ទេ ដែលអាចជួយដោះស្រាយបញ្ហាជម្លោះដីធ្លី និងផ្ទះសម្បែងប្រជាពលរដ្ឋនិងរៀបចំរបៀបរៀបរយក្នុងសង្គម។ចំណែករដ្ឋមន្ត្រីចាស់ៗ ដែលអនុវត្តការងារគ្មានប្រសិទ្ធិភាព ទោះបីជាដាក់បញ្ជូនទៅក្រសួងណាក៏មិនអាចអនុវត្តបានល្អដែរ។អ្នកវិភាគទាំងនោះ ក៏រិះគន់ដែរថា ការផ្លាស់ប្ដូរតំណែងរដ្ឋមន្ត្រីទាំងនេះ គឺគ្រាន់តែជាការផ្លាស់ប្ដូរតួនាទីនិងចែកអំណាចគ្នាកាន់ការងារតាមក្រសួងនីមួយៗដដែលប៉ុណ្ណោះ ដោយមិនមែនជាការកំណែទម្រង់ឲ្យបានល្អ និងមានប្រសិទ្ធភាពឡើយ។
គួរបញ្ជាក់ថា សមាជិកគណៈរដ្ឋមន្ត្រីដែលត្រូវគណៈរដ្ឋមន្ត្រីរបស់សម្តេច ហ៊ុន សែន បញ្ចប់តួនាទី ផ្លាស់ប្តូរ និងតែងតាំងបន្ថែមទាំង ២៤ រូប ។ លោក គាត ឈន់ ត្រូវបានរដ្ឋាភិបាលបញ្ចប់មុខងារជាឧបនាយករដ្ឋមន្ត្រីប្រចាំការ តាមសំណើរបស់សាមីខ្លួន ឯលោក ហោ ណាំហុង រដ្ឋាភិបាលបញ្ចប់មុខងារជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ តែរក្សាទុកតំណែងជាឧបនាយករដ្ឋមន្ត្រីដដែល ទៅតាមសំណើរបស់សាមីខ្លួន។ ចំណែក លោក អ៊ឹម ឈុនលឹម បាត់បង់មុខងារ ជាទេសរដ្ឋមន្ត្រី និងជារដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ តាមសំណើសាមីខ្លួន៕
Tag:
សម្តេច ហ៊ុន សែន
ឯកឧត្តម កឹម សុខា
© រក្សាសិទ្ធិដោយ thmeythmey.com