លោក អូបាម៉ា ទៅដល់ទឹកដីគុយបា សត្រូវសម័យសង្គ្រាមត្រជាក់

អន្តរជាតិ

លោក អូបាម៉ា ទៅដល់ទឹកដីគុយបា សត្រូវសម័យសង្គ្រាមត្រជាក់

21, Mar 2016 , 11:14 am

រូបភាព

ដោយ: តន ចាន់រិទ្ធារ៉ា

ប្រធានាធិបតីសហរដ្ឋអាមេរិកលោក បារ៉ាក់ អូបាម៉ា បានទៅដល់ទឹកដីគុយបាហើយនៅថ្ងៃទី២០ ខែមីនា ដើម្បីផ្ដើមទស្សនកិច្ចបីថ្ងៃនៅទីនោះ។ នេះជាដំណើរលើកទីមួយរបស់ប្រធានាធិបតីអាមេរិកទៅកាន់គុយបា ក្នុងរយៈពេលជាង៨០ឆ្នាំកន្លងមកនេះ ដែលធ្វើឡើងក្រោយពេលដែលអតីតសត្រូវទាំងពីរស្ដារទំនាក់ទំនងឡើងវិញនៅឆ្នាំ២០១៤ ។

ជាងមួយឆ្នាំក្រោយការភ្ជាប់ទំនាក់ទំនងការទូតឡើងវិញ លោក បារ៉ាក់ អូបាម៉ា បានទៅដល់គុយបា ក្នុងទស្សនកិច្ចប្រវត្តិសាស្ត្របីថ្ងៃនៅទីនោះ។ លោក អូបាម៉ា ក្លាយជាប្រធានាធិបតីអាមេរិកដំបូងគេដែលធ្វើដំណើរទៅគុយបា ចាប់តាំងពីប្រទេសទាំងពីរផ្ដាច់ទំនាក់ទំនងការទូតនៅឆ្នាំ១៩៥៩ ក្រោយពេលដែលលោក ហ្វីដែល កាស្ត្រូ ដឹកនាំបដិវត្តន៍ផ្ដួលរំលំរដ្ឋាភិបាលរណបអាមេរិក។

នៅព្រលានយន្តហោះទីក្រុងឡាហាវ៉ាន លោក អូបាម៉ា ដែលអមដំណើរដោយជំទាវទីមួយនិងកូនស្រីទាំងពីរ ត្រូវបានទទួលដោយរដ្ឋមន្ត្រីការបរទេសគុយបាលោក Bruno Rodriguez។ នេះជាការបើកសករាជនៃទំនាក់ទំនងអាមេរិកនិងគុយបា បន្ទាប់ពីលោក អូបាម៉ា និងប្រធានាធិបតីគុយបាលោក រ៉ាអ៊ូល កាស្ត្រូ ប្រកាសភ្ជាប់ទំនាក់ទំនងឡើងវិញនៅខែធ្នូ ឆ្នាំ២០១៤។ ក្រៅពីនោះ អាមេរិកនិងគុយបាក៏បានភ្ជាប់សកម្មភាពពាណិជ្ជកម្ម តាមរយៈការចុះហត្ថលេខាលើវិស័យគមនាគមន៍ ក៏ដូចជាការភ្ជាប់ជើងហោះហើរផងដែរ។

នៅថ្ងៃទី២១ ខែមីនា លោក បារ៉ាក់ អូបាម៉ា នឹងជួបជាមួយប្រធានាធិបតីគុយបា រ៉ាអ៊ូល កាស្ត្រូ នៅវិមានប្រធានាធិបតី ប៉ុន្តែលោកគ្មានគម្រោងការជួបជាមួយមេដឹកនាំបដិវត្តន៍លោក ហ្វីដែល កាស្ត្រូនោះទេ។ ម្យ៉ាងទៀត លោក អូបាម៉ា ក៏នឹងជួបជាមួយអ្នកវិនិយោគអាមេរិក និងក្រុមប្រឆាំងរដ្ឋាភិបាលគុយបា ព្រមទាំងទៅកន្លែងសំខាន់ៗនៅទីក្រុងឡាហាវ៉ានផងដែរ។

ថ្វីបើមានទំនាក់ទំនងល្អក៏ដោយ មានបញ្ហាជាច្រើនទៀតដែលត្រូវដោះស្រាយដើម្បីឲ្យទំនាក់ទំនងប្រទេសទាំងពីរកាន់តែពេញលេញ។ ការហ៊ុមព័ទ្ធផ្នែកសេដ្ឋកិច្ចដែលបានដាក់លើគុយបាអស់រយៈពេល៥៤ឆ្នាំ ជាបញ្ហាដែលត្រូវដោះស្រាយ។ កន្លងមកលោក អូបាម៉ា ក៏ធ្លាប់ស្នើទៅសភាឲ្យអនុម័តការលើកលែងការហ៊ុមព័ទ្ធ ប៉ុន្តែត្រូវបានក្រុមសាធារណរដ្ឋដែលកំពុងត្រួតត្រាសភា បដិសេដចោល។

លើសពីនេះ លោក អូបាម៉ា ក៏រងការរិះគន់ច្រើនផងដែរទាក់ទងនយោបាយការបរទេសរបស់លោកជាមួយគុយបា។ ក្រុមអ្នករិះគន់ទាំងនោះនិយាយថា លោក អូបាម៉ា បានសម្បទានយ៉ាងច្រើនដល់គុយបា តែគុយបាមិនបានផ្ដល់អ្វីជាដុំកំភួនត្រលប់មកវិញទេ។ ពួកគេចាត់ទុកដំណើររបស់លោក អូបាម៉ា ថាជាជ័យជម្នះទុកមុនពេក ដើម្បីគ្រាន់តែលម្អនយោបាយការបរទេសរបស់លោកប៉ុណ្ណោះ។

បញ្ហាមួយទៀតដែលនៅកណ្ដាលផ្លូវនៃទំនាក់ទំនងអាមេរិកនិងគុយបា គឺការកាន់កាប់គុកនៅ Guantanamo ប៉ុន្តែលោក អូបាម៉ា បញ្ជាក់ហើយថា នឹងមិនមានការពិភាក្សាលើបញ្ហានេះទេ។ ការគាំទ្ររបស់អាមេរិកចំពោះក្រុមប្រឆាំង និងការគាំទ្រលើវិទ្យុនិងទូរទស្សន៍ប្រឆាំង ក៏ជានៅតែបញ្ហាផងដែរ៕