ថៃ រិទ្ធី ផ្តួលថៃសន្លប់ក្នុងទឹកទី១ ខណៈ សឹម ប៊ុនស្រ៊ន់ ឈ្នះពិន្ទុ នាការប្រកួតដាក់ទ្រុងនៅថៃ

កីឡាជាតិ

ជាតិ

ថៃ រិទ្ធី ផ្តួលថៃសន្លប់ក្នុងទឹកទី១ ខណៈ សឹម ប៊ុនស្រ៊ន់ ឈ្នះពិន្ទុ នាការប្រកួតដាក់ទ្រុងនៅថៃ

21, Mar 2016 , 1:38 pm

រូបភាព

ដោយ: ថ្មីៗ

ភ្នំពេញ៖ អ្នកលេងក្បាច់គុនចម្រុះ និងជាកីឡាករប្រដាល់ក្នុងទ្រុងរបស់កម្ពុជា ថៃ រិទ្ធី បានផ្តួលកីឡាករថៃ Veerayuth Uttapan ឲ្យសន្លប់ក្នុងទឹកទី១ ខណៈកីឡាករ សឹម ប៊ុនស្រន់ ឈ្នះថៃដោយពិន្ទុ នាការប្រកួតប្រដាល់ក្នុងទ្រុង Full Metal Dojo 10 នាទីក្រុងបាងកក ប្រទេសថៃ កាលពីយប់ថ្ងៃទី១៩ ខែមីនា កន្លងទៅនេះ។

អ្នកលេងក្បាច់គុនចម្រុះវ័យក្មេងរបស់កម្ពុជា ថៃ រិទ្ធី បានផ្តួលកីឡាករថៃ Veerayuth Uttapan ឲ្យសន្លប់ក្នុងទឹកទី១ ក្រោមកណ្តាប់ដៃ និងផ្លែកែងស្តាំដ៏មុតស្រួចរបស់ខ្លួន នាការប្រកួតប្រដាល់ក្នុងទ្រុង Full Metal Dojo 10 ក្នុងទីក្រុងបាងកក ប្រទេសថៃ កាលពីយប់ថ្ងៃទី១៩ ខែមីនា។ ចំណែកអ្នកលេងគុនចម្រុះដូចគ្នា សឹម ប៊ុនស្រ៊ន់ បានត្រឹមយកឈ្នះលើកីឡាករថៃ Veerayuth Priyoporn ដោយពិន្ទុ។

កីឡាករ ថៃ រិទ្ធី បានប្រើកណ្តាប់ដៃ និងផ្លែកែងស្តាំចំពេញៗទៅលើផ្ទៃកីឡាករ ថៃ អំឡុងពេលដែលរូបគេបានជិះពីលើកីឡាករថៃ នាការប្រកួតយ៉ាងស្វិតស្វាញនៅក្នុងទឹកទី១ ជាហេតុធើ្វឲ្យកីឡាករថៃរូបនេះបាត់បង់ស្មារតី រួចសន្លប់ក្នុងទឹកនោះតែម្តង។ ចំណែកកីឡាករ សឹម ប៊ុនស្រ៊ន់ បន្ទាប់ពីប្រកួតយ៉ាងស្វិតស្វាញ៣ទឹកពេញជាមួយកីឡាករថៃ Veerayuth Priyoporn ត្រូវបានគណៈកម្មាការសម្រេចឲ្យឈ្នះដោយពិន្ទុជាឯកច្ឆន្ទ។

គួរបញ្ជាក់ថា អ្នកលេងគុនចម្រុះ ថៃ រិទ្ធី និង សឹម ប៊ុនស្រ៊ន់ ក្រោមការដឹកនាំរបស់ លោក ហ៊ុន ច័ន្ទរាជ និងជាគ្រូបង្វឹកផងនោះ បានចេញពីភ្នំពេញ ដើម្បីទៅចូលរួមប្រកួតប្រដាល់ក្នុងទ្រុង Full Metal Dojo 10នាទីក្រុងបាងកក ប្រទេសថៃ កាលពីថ្ងៃទី១៧ ខែមីនា និងបានមកដក់កម្ពុជាវិញកាលពីថ្ងៃទី២០ ខែមីនា ម្សិលមិញនេះ៕