ជាតិ
សង្គមជាតិ
មគ្គុទ្ទេសក៍ក្រោមដើមពោធិ៍កំពុងបង្កភាពអនាធិបតេយ្យក្នុងតំបន់អង្គរ?
× សៀមរាប៖ ក្រុមមគ្គុទ្ទេសក៍ទាំងមានអាជ្ញាបណ្ណ និងគ្មានអាជ្ញាបណ្ណ ឫហៅមគ្គុទ្ទេសក៍សេះហោះ នៅក្រោមដើមពោធិ៍មុខប្រាសាទអង្គរវត្ត កំពុងបង្កភាពអនាធិបតេយ្យនៅក្នុងតំបន់អង្គរ។ ពួកគេទាំងនោះ បានឈរចាប់ភ្ញៀវ ដែលមកជាលក្ខណៈឯកជន ហើយជារឿយៗ តែងបង្កជម្លោះនឹងភ្ញៀវទេសចរដោយប្រការផ្សេងៗ ។
ជាច្រើនឆ្នាំមកហើយ ដែលកើតមានក្រុមមគ្គុទ្ទេសក៍ក្រោមដើមពោធិ៍។ ប៉ុន្តែគេមិនទាន់ឃើញមានចំណាត់ការពីអាជ្ញាធរ ទៅលើក្រុមទាំងនោះឡើយ ដែលការណ៍នេះធ្វើឲ្យកើតមានបញ្ហាមួយចំនួនដល់ភ្ញៀវទេសចរ។ បញ្ហារួមមាន ការបង្ខំភ្ញៀវដើរជាមួយ កាប់ភ្ញៀវស៊ី (តម្លៃពេលនិយាយផ្សេង ពេលទារផ្សេងក្នុងតម្លៃខ្ពស់) ជាពិសេសនោះ មគ្គុទ្ទេសក៍ដែលគ្មានអាជ្ញាបណ្ណ ពួកគេមិនបានស៊ីជម្រៅទៅនឹងប្រវត្តិសាស្ត្រក្នុងតំបន់អង្គរនោះទេ គឺពួកគេចេះតែនិយាយតៗគ្នាតែប៉ុណ្ណោះ។
ការបើកដៃឲ្យមានមគ្គុទ្ទេសក៍គ្មានអាជ្ញាបណ្ណមានសិទ្ធិនាំភ្ញៀវដើរ គឺមិនមានភាពស្មើគ្នា។ មគ្គុទ្ទេសក៍មានអាជ្ញាបណ្ណ ខំរកទីផ្សារខ្លួនឯង ដើម្បីឲ្យបានក្លាយជាមគ្គុទ្ទេសក៍ពេញសិទ្ធិនៅក្នុងក្រុមហ៊ុនទេសចរណ៍។ ចំណែកមគ្គុទ្ទេសក៍ក្រោមដើមពោធិ៍ ដែលគ្មានអាជ្ញាបណ្ណ មិនបានឆ្លងកាត់សាលាបណ្តុះបណ្តាល និងឈរចាប់ភ្ញៀវរញ៉េរញ៉ៃ ដែលបង្កភាពអសណ្តាប់ធ្នាប់នៅមុខអង្គរ។ នេះជាការយល់ឃើញរបស់លោក រស់ សណ្តាន ប្រធានសមាគមមគ្គុទ្ទេសក៍ទេសចរណ៍ និងជនជាតិខ្មែរនិយាយភាសារុស្ស៊ី។ លោក សណ្តាន បន្តថាសកម្មភាពមគ្គុទ្ទេសក៍ក្រោមដើមពោធិ៍ បានធ្វើឲ្យមានរូបភាពមិនល្អ និងប៉ះពាល់ដល់មគ្គុទ្ទេសក៍ផ្សេងទៀត។
លោក សណ្តាន បន្ថែមថា៖ «បើនិយាយពីរឿងស្លែវិញ វាដុះជិត២ម៉ែត្រហើយ។ វាយូរយារមកហើយអារឿងហ្នឹង នៅតែខាងប៉ូលិស នៅតែខាងមន្ទីរជំនាញធ្វើអត់បាន ព្រោះថានៅពេលចុះទៅចាប់ អត់ឃើញ តែពេលប៉ូលិសត្រឡប់មកវិញ គឺចេញមគ្គុទ្ទេសក៍នោះមកវិញ។ ចឹងខ្ញុំគិតថា ប្រហែលមានអ្នកណាគេឲ្យព័ត៌មាន ឫក៏មានអ្នកណាគេខ្សឹបដាក់មេក្រូប្រាប់...»។ លោក សណ្តាន ស្នើឲ្យមានការដោះស្រាយ និងរឹតបន្តឹងលើបញ្ហានេះ ដើម្បីលុបបំបាត់មគ្គុទ្ទេសក៍កាប់ភ្ញៀវ និងមគ្គុទ្ទេសក៍ក្រោមដើមពោធិ៍ឲ្យអស់ពីតំបន់អង្គរ។
ដូចគ្នានេះ លោក យឿង វ៉ាន់យុង ប្រធានសមាគមមគ្គុទ្ទេសក៍ទេសចរណ៍ភាសាចិន-កម្ពុជា ក៏មិនគាំទ្រឲ្យមានមគ្គុទ្ទេសក៍គ្មានអាជ្ញាបណ្ណក្នុងតំបន់អង្គរផងដែរ។ យ៉ាងណា លោក យុង យល់ថា វិស័យទេសចរណ៍ គឺជាទីផ្សារសេរី ដែលពេលខ្លះមានក្រុមមគ្គុទ្ទេសក៍ ឈរចាប់ភ្ញៀវដោយខ្លួនឯង ដោយមិនបានជ្រកកោនក្រោមស្លាកក្រុមហ៊ុនទេសចរណ៍។ លោក យុងបន្ថែម «វាពិបាកដែរ ក្រុមហ៊ុនទេសចរណ៍ខ្លះទាល់តែប្រើខ្សែទើបបានចូល ទើបមានមគ្គុទ្ទេសក៍ខ្លះ គាត់សម្រេចចិត្តរកភ្ញៀវដោយខ្លួនឯង»។ ត្រង់ចំណុចនេះលោក យុង ចង់សំដៅតែមគ្គុទ្ទេសក៍ដែលមានអាជ្ញាបណ្ណតែប៉ុណ្ណោះ សម្រាប់មគ្គុទ្ទេសក៍ដែលគ្មានអាជ្ញាបណ្ណ ដែលលោក យុង ហៅថា មគ្គុទ្ទេសក៍សេះហោះ ឫមគ្គុទ្ទេសក៍ងងឹតនោះ លោកថា មិនគួរឲ្យមាននៅតំបន់អង្គរនោះទេ។
ប្រធានសមាគមទីភ្នាក់ងារទេសចរណ៍កម្ពុជាប្រចាំខេត្តសៀមរាប ក៏មិនគាំទ្រឲ្យមានមគ្គុទ្ទេសក៍ក្រោមដើមពោធិ៍នោះដែរ។ លោក ផាវ ព្រឿន អះអាងថា មគ្គុទ្ទេសក៍ដែលគ្មានអាជ្ញាបណ្ណ គឺមិនមានចំណេះដឹងខាងប្រវត្តិសាស្ត្រត្រឹមត្រូវ ចង់មិនចង់ គឺវាបានធ្វើឲ្យប៉ះពាល់វប្បធម៌ជាតិមួយចំណែកទៅហើយ។ លោកបន្តថា៖« គាត់ចេះតែនិយាយឲ្យតែបានលុយ មិនច្បាស់ពីប្រវត្តិសាស្ត្រ ហើយវាអាចធ្វើឲ្យមគ្គុទ្ទេសក៍ផ្សេងបាត់អាជីព។ ខ្ញុំគិតថា មិនគួរឲ្យមានទេ វាបង្ហាញពីការគ្រប់គ្រងមិនបានល្អ ដែលកន្លែងបេតិកភណ្ឌពិភពលោកទាំងមូល បណ្តោយឲ្យមានករណីនេះកើតឡើង។ ខ្ញុំសង្ឃឹមថា មន្ទីរគួរសហការជាមួយអាជ្ញាធរអប្សរា ជាមួយខាងប៉ូលិស ដើម្បីដោះស្រាយរឿងនេះ មិនត្រូវបណ្តោយទៀតទេ»។
តាមការបញ្ជាក់ពី ប្រធានសមាគមទីភ្នាក់ងារទេសចរណ៍កម្ពុជាប្រចាំខេត្តសៀមរាប គឺធ្លាប់មានការចោទប្រកាន់ថាខាងប៉ូលិស ជាអ្នកឃុបឃិតលើការអនុញ្ញាតឲ្យមានមគ្គុទ្ទេសក៍ក្រោមដើមពោធិ៍ ឫមគ្គុទ្ទេសក៍គ្មានអាជ្ញាបណ្ណ មានសិទ្ធិនាំភ្ញៀវដើរក្នុងតំបន់អង្គរ ប៉ុន្តែលោក ព្រឿន យល់ថា វាកើតឡើងដោយសារការគេចវេសរបស់មគ្គុទ្ទេសក៍ច្រើនជាង។ ផ្ទុយពីនេះ លោក រស់ សណ្តាន បែរជាគិតថា វាបណ្តាលមកពីការឃុបឃិតគ្នា រវាងមគ្គុទ្ទេសក៍ ជាមួយក្រុមអ្នកឆែកសំបុត្រ ប៉ូលិសបេតិកភណ្ឌ និងប៉ូលិសទេសចរណ៍ ជាអ្នកបោះដៃឲ្យគ្នា។
ក្រុមមគ្គុទ្ទេសក៍ក្រោមដើមពោធិ៍ខ្លះស្លៀកឯកសណ្ឋានជាមគ្គុទ្ទេសក៍ និងខ្លះទៀតដែលគ្មានអាជ្ញាបណ្ណ គឺស្លៀកពាក់ធម្មតា។ ខេត្តសៀមរាប មានមគ្គុទ្ទេសក៍ទេសចរណ៍ប្រមាណជាង៣ពាន់នាក់ ហើយក្រុមមគ្គុទ្ទេសក៍ក្រោមដើមពោធិ៍មានប្រមាណជាង១០នាក់ ដោយមិនរាប់បញ្ចូលអ្នកចល័តនៅកន្លែងផ្សេងទៀតក្នុងអង្គរ មាននៅកន្លែងអុជធូបជាដើមនោះទេ។ បើយោងតាមការអះអាងរបស់មគ្គុទ្ទេសក៍មួយរូបដែលសុំមិនបញ្ចេញឈ្មោះ ក្រុមមគ្គុទ្ទេសក៍ក្រោមដើមពោធិ៍ទាំងមានអាជ្ញាបណ្ណ និងគ្មាន ត្រូវបង់កំរៃដល់ប៉ូលិសក្នុងមួយថ្ងៃ ២ដុល្លារជាប្រចាំជាថ្នូរនឹងការមានសិទ្ធិឈរចាប់ភ្ញៀវនៅមុខអង្គរ បើទោះជាថ្ងៃខ្លះ ពួកគេគ្មានភ្ញៀវដើរក៏ដោយចុះ៕
Tag:
មគ្គុទ្ទេសក៍ទេសចរណ៍
សៀមរាប
© រក្សាសិទ្ធិដោយ thmeythmey.com