កីឡាអន្តរជាតិ
អន្តរជាតិ
កីឡាករបាល់បោះជម្រើសជាតិបែលហ្ស៊ិកម្នាក់រងរបួសជើងដោយសារការបំផ្ទុះគ្រាប់បែក
× កីឡាករបាល់បោះជម្រើសជាតិបែលហ្ស៊ិក Sebastien Bellin បានរងរបួសជើងដោយសារការបំផ្ទុះគ្រាប់បែក នៅព្រលានយន្តហោះនៅព្រុចសែល។ នេះបើតាមការចុះផ្សាយរបស់ Mail Online។
ក្នុងចំណោមអ្នករងរបួស១៧០នាក់ កីឡាករបាល់បោះវ័យ៣៧រូបនេះ ត្រូវបានខ្ទាតចម្ងាយ២០ម៉ែត្រ ដោយសារការបំផ្ទុះគ្រាប់បែកនេះ ដែលបណ្ដាឲ្យមានរងរបួសជើង ហើយនៅពេលនេះក្រុមគ្រូពេទ្យកំពុងវៈកាត់ ដើម្បីជួយសង្គ្រោះជើង និងត្រគៀក កីឡាករបាល់បោះជម្រើសជាតិប៊ែលហ្ស៊ិករូបនេះ ដែលបច្ចុប្បន្នក៏កំពុងលេងឲ្យក្លឹបបែលហ្ស៊ិក Gent Hawks ។
ខណៈដែលកីឡាករបាល់បោះ Sebastien Bellin នេះកំពុងវៈកាត់គ្រូបង្វឹកនិងកីឡាកររួមអាជីព ក៏បាននាំគ្នាបន់ស្រន់ឲ្យកីឡាករនេះរួចផុតពីគ្រោះថ្នាក់ និងឆាប់ជាសះស្បើយ ដើម្បីបានបន្ដអាជីពវិញ។
ការបំផ្ទុះគ្រាប់បែកពីរកន្លែងនៅព្រលានយន្តហោះ Zaventem នៅព្រុចសែល ប្រទេសបែលហ្ស៊ិកនៅថ្ងៃអង្គារទី ២២ មីនាមកនេះ បានបណ្ដាលឲ្យមនុស្សស្លាប់៣៤នាក់ និងរងរបួស១៧០នាក់។ ហើយករណីវាយប្រហារនេះដែរកើតឡើង ៤ថ្ងៃក្រោយពេលដែលមេខ្លោងក្រុមភេរវជនដែលស្ថិតនៅពីក្រោយការវាយប្រហារនៅកណ្តាលរដ្ឋធានីប៉ារីស ត្រូវបានអាជ្ញាធរបែលហ្ស៊ិកចាប់ខ្លួន។
ក្រោយការបំផ្ទុះគ្រាប់បែក ក្រុមភេរវជនរដ្ឋឥស្លាម ឬក្រុមដែស្ហ(Daesh) បានចេញមុខទទួលខុសត្រូវ ការវាយប្រហារនៅកណ្តាលទីក្រុងព្រុចសែលប្រទេសបែលហ្ស៊ិកនេះ ដែលត្រូវបានបណ្តាមេដឹកនាំពិភពកលោកបានថ្កោលទោសការវាយប្រហារដ៏ព្រៃផ្សៃនេះ។ ហើយពួកគេបានដង្ហើយហៅឲ្យមានការរួបរួមគ្នារវាងប្រទេសទាំងអស់ដើម្បីកម្ចាត់ភេរវជន៕
© រក្សាសិទ្ធិដោយ thmeythmey.com