កីឡាជាតិ
ជាតិ
U-19 កម្ពុជា បានមេដាយមាសក្នុងព្រឹត្តិការណ៍មិត្តភាពនៅខេត្តឈៀងរ៉ៃ ប្រទេសថៃ
× ក្រុមកីឡាបាល់ទាត់ជម្រើសជាតិយុវជនកម្ពុជាអាយុក្រោម១៩ឆ្នាំ បានទទួលជ័យជម្នះ ៥-១ លើក្រុមយុវជនឡាវ ដើម្បីក្លាយជាម្ចាស់ជើងឯកនៃព្រឹត្តិការណ៍មិត្តភាព Goodwill Mekong Games លើកទី១២ ដែលរៀបចំនៅខេត្តឈៀងរ៉ៃ ប្រទេសថៃ នៅព្រឹកថ្ងៃព្រហស្បតិ៍ ទី២៤ ខែមីនា នេះ។
ក្រុម U-19 កម្ពុជា ដែលដឹកនាំដោយ លោក Kazunori Ohara នាយកបច្ចេកទេសរបស់សហព័ន្ធកីឡាបាល់ទាត់កម្ពុជា បានចាប់ផ្តើមការប្រកួតជាមួយនឹងលទ្ធផលស្មើ ៣-៣ ជាមួយម្ចាស់ផ្ទះ U-19 ខេត្តឈៀងរ៉ៃ ហើយបន្តទៅយកឈ្នះក្រុមយុវជនមីយ៉ាន់ម៉ាយ៉ាងចាស់ដៃក្នុងលទ្ធផល ៧-០ ។
មុននឹងប៉ះកម្ពុជា នៅវគ្គផ្តាច់ព្រ័ត្រ ក្រុមឡាវ បានយកឈ្នះ U-19 ឈៀងរ៉ៃ ២-១ ឈ្នះក្រុមមីយ៉ាន់ម៉ា ៧-០ ។ ការបាន៣ពិន្ទុបន្ថែម បាននាំឲ្យក្រុម U-19 កម្ពុជាមានសរុប៧ពិន្ទុ ខណៈឡាវមាន៦ពិន្ទុ។ កម្ពុជាបានក្លាយជាម្ចាស់មេដាយមាសលើកដំបូងពីព្រឹត្តិការណ៍មិត្តភាពមួយនេះ។
គួរបញ្ជាក់ថា ព្រឹត្តិការណ៍ប្រកួតដណ្តើមពានរង្វាន់ Mekong Goodwill Games ជាព្រឹត្តិការណ៍ប្រកួតប្រចាំឆ្នាំមួយរវាងប្រទេសដែលនៅជាប់ដងទន្លេមេគង្គ រួមមាន កម្ពុជា ចិន ឡាវ វៀតណាម មីយ៉ាន់ម៉ា និងម្ចាស់ផ្ទះថៃ នេះជាលើកទី១២ហើយសម្រាប់ការប្រកួតនេះ៕
© រក្សាសិទ្ធិដោយ thmeythmey.com