ការប្រកួតបាល់ទាត់ដណ្តើមពានរង្វាន់សម្តេច ហ៊ុន សែន លើកទី១០ ឆ្នាំ២០១៦ បានបញ្ចប់វគ្គជម្រុះបឋមតាមពូលនីមួយៗរបស់ខ្លួនហើយ កាលពីថ្ងៃទី២៣ ខែមីនា ម្សិលមិញនេះ ដោយមានការប្រកួតចុងក្រោយចំនួន៥គូក្នុងពូល A,B,C និងD។ ការប្រកួតបញ្ចប់នេះ ក៏បានស្វែងរកឃើញក្រុមដែលអាចឡើងទៅប្រកួតនៅវគ្គបន្ត និងប្រកួតក្នុងពានរង្វាន់លីកលំដាប់ទី២របស់កម្ពុជាផងដែរ។
ការប្រកួតចំនួន៥គូក្នុងពូល A, B, C និងD ដែលជាការប្រកួតបញ្ចប់វគ្គជម្រុះនៃពានរង្វាន់សម្តេច ហ៊ុន សែន កាលពីម្សិលមិញនេះ បានរកឃើញក្រុមដែលមានសិទ្ធឡើងទៅប្រកួតនៅជុំបន្តហើយក្នុងនោះ ពូលA ខេត្តកំពង់ស្ពឺ និងខេត្តកណ្តាល ឬឯពូលB ខេត្តស្វាយរៀង ខេត្តព្រៃវែង ខណៈពូលC សៀមរាបអង្គរ អ.ហខេត្តកំពង់ធំ និងពូលD ខេត្តកំពង់ឆ្នាំង និងខេត្តប៉ៃលិន។
ដោយឡែក ក្រុមចំណាត់ថ្នាក់លេខ៣ យុវជនបឹងកេតកំពង់ចាម ក្នុងពូលB និងខេត្តព្រះវិហារ ក្នុងពូលC ក៏ត្រូវបានគេជ្រើសរើសឲ្យឡើងទៅប្រកួតនៅវគ្គបន្តផងដែរ ព្រោះដើម្បីបង្គ្រប់២៤ក្រុម នៅជុំផ្តាច់ព្រ័ត្រ និងដើម្បីជំនួសក្រុមបៀលប្រាយយូណាយធីត និងក្រុមគីរីវង់ ដែលបានដកខ្លួនចេញពីលីកកំពូលកម្ពុជារដូវកាល ២០១៦ ខណៈឆ្នាំនេះមានតែ១០ក្រុមប៉ុណ្ណោះ។
ចំណែក ក្រុមដែលអាចឡើងទៅប្រកួតនៅជុំបន្តក្នុងពូល E និង F ដែលបានបញ្ចប់ការប្រកួតកាលពីថ្ងៃទី២៤ ខែកុម្ភៈរួមមាន ពូលE ក្រុមកំពង់ផែស្វយ័តខេត្តព្រះសីហនុ និងខេត្តកំពត ឬឯពូលF ខេត្តស្ទឹងត្រែង និងខេត្តក្រចេះ។
សម្រាប់ការប្រកួតកាលពីថ្ងៃទី២៣ ខែមីនា ម្សិលមិញ ខេត្តកំពង់ស្ពឺ បានបំបាក់ម្ចាស់ផ្ទះខេត្តកណ្តាល ៤-០ ក្នុងពូលA ឬឯក្នុងពូលB ខេត្តស្វាយរៀង បានយកឈ្នះក្រុមយុវជនបឹងកេតកំពង់ចាម ៣-១ ខណៈខេត្តព្រៃវែង បន្តឈ្នះខេត្តត្បូងឃ្មុំ ៥-១។ ចំណែកពូលC សៀមរាបអង្គរ បានលត់ខេត្តឧត្តរមានជ័យ ៥-១ ស្របពេល ខេត្តព្រះវិហារ យកឈ្នះ អ.ហខេត្តកំពង់ធំ និងពូលD ខេត្តបាត់ដំបងស្គាល់រសជាតិឈ្នះលើ ខេត្តប៉ៃលិន ១-០ នៅកីឡដ្ឋានខេត្តប៉ៃលិន។
គួរបញ្ជាក់ថា ក្រុមទាំង៦ ដែលទទួលបានពិន្ទុខ្ពស់ជាងគេក្នុងពូលនីមួយៗ នឹងទទួលបានសិទ្ធចូលរួមប្រកួតក្នុងពានលីកលំដាប់ទី២របស់កម្ពុជាដោយស្វ័យប្រវត្តិ ចំណែកក្រុមដែលទទួលបានចំណាត់ថ្នាក់លេខ១ និងលេខ២ ត្រូវឡើងទៅប្រកួតនៅវគ្គបន្តដោយស្វ័យប្រវត្តិ និងក្រុមលេខ៣ក្នុងពូល B និងC ដែលមានពិន្ទុខ្ពស់ក៏ទទួលបានសិទ្ធឡើងទៅប្រកួតនៅវគ្គបន្តផងដែរ៕
*លទ្ធផលប្រកួតវគ្គជម្រុះបឋមកាលពីម្សិលមិញ
ពូលA
- ខេត្តកណ្ដាល ០–៤ ខេត្តកំពង់ស្ពឺ នៅកីឡដ្ឋានខេត្តកណ្ដាល
ពូលB
- ខេត្តស្វាយរៀង ៣–១ យុវជនបឹងកេតកំពង់ចាម នៅកីឡដ្ឋាន ខេត្តស្វាយរៀង
- ខេត្តត្បូងឃ្មុំ ១–៥ ខេត្តព្រៃវែង នៅកីឡដ្ឋាន ខេត្តត្បូងឃ្មុំ
ពូល C
- ខេត្តឧត្តរមានជ័យ ១–៥ សៀមរាបអង្គរ នៅកីឡដ្ឋាន ខេត្តឧត្តរមានជ័យ
- ខេត្តព្រះវិហារ ៣–០ អ.ហ កំពង់ធំ នៅកីឡដ្ឋាន ខេត្តព្រះវិហារ
ពូល D
- ខេត្តប៉ៃលិន ០–១ ខេត្តបាត់ដំបង នៅកីឡដ្ឋាន ខេត្តប៉ៃលិន៕