ស៊ី ជិនពីង៖ ចិននិងរុស្ស៊ីគួររួមគ្នាដោះស្រោយបញ្ហាក្តៅរបស់ពិភពលោក

អន្តរជាតិ

ស៊ី ជិនពីង៖ ចិននិងរុស្ស៊ីគួររួមគ្នាដោះស្រោយបញ្ហាក្តៅរបស់ពិភពលោក

27, Mar 2016 , 1:27 pm

រូបភាព

ដោយ:

ប្រធានាធិបតីចិន លោក ស៊ី ជិនពីង បានលើកឡើងក្នុងជំនួបជាមួយតំណាងរដ្ឋបាលប្រធានាធិបតីរុស្ស៊ីថា ចិននិងរុស្ស៊ីគួរតែរឹតបន្តឹងទំនាក់ទំនងនិងកិច្ចសហប្រតិបត្តិការទ្វេភាគីក្នុងក្របខណ្ឌអន្តរជាតិនិងតំបន់ដើម្បីជួយលើកកម្ពស់និងសម្រេចបានដំណោះស្រាយនយោបាយសម្រាប់បញ្ហាធំៗរបស់ពិភពលោក។

«កិច្ចសហប្រតិបត្តិការយុទ្ធសាស្ត្ររវាងចិននិងរុស្ស៊ីបានដើរតួនាទីសំខាន់ក្នុងការការពារសន្តិភាពនិងសន្តិសុខក្នុងតំបន់និងពិភពលោកទាំងមូលផង»។ នេះជាការលើកឡើងរបស់ប្រមុខរដ្ឋចិនលោក ស៊ី ជិនពីង ក្នុងឱកាសដែលលោកជួបជាមួយមន្ត្រីជាន់ខ្ពស់នៃរដ្ឋបាលប្រធានាធិបតីរុស្ស៊ីលោក Sergei Ivanov ថ្ងៃ សុក្រទី ២៥មីនាកន្លងទៅ។

លោក ស៊ី ជិនពិង ក៏បានពន្យល់បន្ថែមទៀតថា មហាយក្សចិន និងរុស្ស៊ីអាចនិយាយបានថាជាដៃគូដ៏សំខាន់បំផុតមិនខ្វះបាន ហើយការប្រឹងប្រែងអភិវឌ្ឍភាជាដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយជាជំរើសដ៏ល្អមួយសម្រាប់ប្រទេសទាំងពីរ។ ចាប់តាំងពីរុស្ស៊ីត្រូវលោកខាងលិចធ្វើឲ្យឯកោ និងរងទណ្ឌកម្មច្រើនជំហាន រុស្ស៊ីនិងចិនកាន់តែខិតជិតគ្នាខ្លាំង ថ្វីបើប្រទេសទាំងពីរក៏មានជម្លោះជាមួយគ្នារឿងព្រំដែនក៏ដោយចុះ។ ហើយទំនាក់ទំនងល្អរវាងប្រទេសទាំងពីរបានជំរុញឲ្យការដោះស្រាយបញ្ហាប្រឈមសកល ជាពិសេសបញ្ហាសន្តិសុខអាចកើតឡើងបានរហ័សផងដែរ។

មេដឹកនាំកំពូលចិនរូបនេះក៏ឆ្លៀតឱកាសអំពាវនាវឲ្យរុស្ស៊ីជ្រើសរើសយកខួបលើកទី១៥នៃការបង្កើតសន្ធិសញ្ញាចិននិងរុស្ស៊ីស្តីពីភាពជាអ្នកជិតខាងល្អ និងកិច្ចសហប្រតិបត្តិការដ៏រាក់ទាក់ដើម្បីជំរុញបន្ថែមឲ្យកិច្ចសហប្រតិបត្តិការទ្វេភាគីរីកលូតលាស់កាន់តែរហ័សថែមទៀត។

ក្នុងខែកក្កដាឆ្នាំ ២០០១ ចិននិងរុស្ស៊ីបានចុះហត្ថលេខាលើសន្ធិសញ្ញារួមគ្នាស្តីអ្នកជិតខាងល្អ និងសហប្រតិបត្តិការដ៏ជិតស្និទ្ធ ដោយសន្ធិសញ្ញានេះឈរលើមូលដ្ឋានច្បាប់រឹងមាំដែលវាជួយត្រួសត្រាយផ្លូវសម្រាប់គួភាគីក្នុងកសាងភាពជាដៃគូយុទ្ធសាស្ត្រផងដែរ។

លោក ស៊ី ជិនពីង ក៏បានបន្តទៀតថា ភាគីទាំងពីររុស្ស៊ីនិងចិន គួរតែបន្តរក្សានូវកិច្ចសហប្រតិបត្តិការកម្រិតខ្ពស់ក្នុងវិស័យអាទិភាពជាច្រើន និងមានការផ្លាស់ប្តូរទស្សនកិច្ចរវាងមន្ត្រីកំពូលនៃប្រទេសទាំងពីរដូចពេលបច្ចុប្បន្ន ដើម្បីឈានទៅកំណត់ឲ្យបាននូវយុទ្ធសាស្ត្រអភិវឌ្ឍន៍រៀងៗខ្លួន។

ប្រមុខរដ្ឋខាងលើក៏បានសង្កត់ធ្ងន់ផងដែរថា លោក និងប្រធានាធិបតីរុស្ស៊ី វ្ល៉ាឌីមៀ ពូទីន គាំទ្រជានិច្ចនូវការផ្លាសប្តូរទស្សនកិច្ច សហប្រតិបត្តិការ និងរៀនសូត្រពីគ្នាទៅវិញទៅមករវាងការិយាល័យកិច្ចការទូទៅនៃគណកម្មាធិការកណ្តាលនៃគណបក្សកុម្មុយនីស្តចិន និងស្ថាប័នរដ្ឋបាលប្រធានាធិបតីរុស្ស៊ី។

ចំណែកប្រធានស្ថាប័នរដ្ឋបាលប្រធានាធិបតីរុស្ស៊ីលោក Ivanov បានថ្លែងប្រាប់លោក ស៊ី ជិនពីងវិញផងដែរថា បម្លាស់ប្តូរទស្សនកិច្ចមន្ត្រីជាន់ខ្ពស់រវាងប្រទេសទាំងពីរបានក្លាយជាមគ្គុទ្ទេសន៍សម្រាប់ការអភិវឌ្ឍទំនាក់ទំនងទ្វេភាគី និងជួយឲ្យប្រទេសទាំងពីររក្សាឲ្យបាននូវកិច្ចសហប្រតិបត្តិការលើវិស័យជាច្រើនក្នុងក្របខណ្ឌអន្តរជាតិ។

លោកបានបន្តទៀតថា ស្ថាប័នរបស់លោក មានឆន្ទៈចង់ធ្វើការជាមួយការិយាល័យទូទៅនៃគណកម្មាធិការកណ្តាលបក្សកុម្មុយនីស្តចិន ដើម្បីបង្កើតនូវចំណងមិត្តភាពទ្វេភាគីដ៏ស្អិតល្មួតមួយ។ មន្ត្រីរុស្ស៊ីខាងលើនេះ ក៏បានលើកឡើងផងដែរពីចំណាត់ការកណ្តាប់ដៃដែករបស់មេដឹកនាំចិនក្នុងការកម្ចាត់អំពើពុករលួយកន្លងមក ហើយទាក់ទិនបញ្ហាកែទម្រង់រដ្ឋនិងអំពើពុករលួយនេះដែរ រុស្ស៊ីសង្ឃឹមថានឹងខ្លួនអាចផ្លាស់ប្តូរនិងរៀនសូត្រពីគ្នាទៅវិញទៅមករឿងប្រឆាំងអំពើពុករលួយនេះ៕