អន្តរជាតិ
ដូណាល់ត្រាំ ទារលុយថ្លៃការពារពីសម្ព័ន្ធមិត្តពេលក្លាយជាប្រធានាធិបតី
× បេក្ខជនប្រធានាធិបតីនាំមុខគេបក្សសាធារណរដ្ឋលោក ដូណាល់ ត្រាំ (Donald Trump) លើកឡើងថា សម្ព័ន្ធមិត្តអាមេរិកត្រូវចំណាយលុយ បើសិនចង់បានទទួលការការពារពីអាមេរិក។ ទ័ពអាមេរិកអាចនឹងត្រូវដកចេញពីកូរ៉េខាងត្បូងនិងជប៉ុនបើប្រទេសទាំងនេះមិនចំណាយលុយ ហើយអាមេរិក៏នឹងឈប់ទិញប្រេងពីអារ៉ាប៊ីសាអូឌីត បើសិនសេដ្ឋីប្រេងនេះមិនបញ្ជូនទ័ពឬផ្តល់លុយសម្រាប់កម្ចាត់ក្រុមដែស្ហ។
សូមស្ដាប់ព័ត៌មានលម្អិត៖
ក្នុងបទសម្ភាសន៍ជាមួយសារព័ត៌មាន New York Times ពាក់ព័ន្ធនយោបាយការបរទេស បេក្ខជននាំមុខបក្សសាធារណរដ្ឋ ដូណាល់ ត្រាំ បានអះអាងថា សម្ព័ន្ធមិត្តអាមេរិកគួរចំណាយថវិកាប្រសិនបើពួកគេចង់បានការការពារពីអាមេរិកដូចបច្ចុប្បន្ននេះ។ តែ លោក ដូណាល់ ត្រាំ គូសបញ្ជាក់ថា វាមិនមែនមានន័យថា នយោបាយការបរទេសរបស់លោកជានយោបាយឯកោរនិយមឡើយ។
១.បើលោកជាប់ឆ្នោត អាមេរិកឈប់ទិញប្រេងពីអារ៉ាប៊ីសាអូឌីត
សេដ្ឋីអចលនទ្រព្យរូបនេះបានពន្យល់ថា សហរដ្ឋអាមេរិកនឹងឈប់បន្តទិញប្រេងពីអារ៉ាប៊ីសាអូឌីតនិងបណ្តាប្រទេសសម្ព័ន្ធមិត្តអាមេរិកផ្សេងទៀត បើសិនបើពួកគេមិនចំណាយលុយឬបញ្ជូនកងទ័ពទៅវាយប្រហារក្រុមរដ្ឋភេរវជនឥស្លាមឬក្រុមដែស្ហ (Daesh)ទេ។
លោកថា៖« យើងមិនដែរបានទទួលលុយសងវិញឡើយ ចំពោះការចំណាយច្រើនសន្ធឹកសន្ធាប់លើសេវាការពារបណ្តាប្រទេសជាច្រើនលើពិភពលោក»។ អ្នកនយោបាយរូបនេះយល់ថា វាជារឿងមិនសមរម្យទាល់តែសោះដែលអាមេរិកត្រូវចំណាយលុយខ្លួនឯងច្រើនសន្ធឹកដើម្បីការពារប្រទេសដទៃ ហើយវាហាក់ដូចជាបណ្តាប្រទេសទាំងនោះកំពុងជិះសេះលែងដៃដូច្នេះដែរ។ ហើយការការពារពិភពលោកវាត្រូវការចំណាយច្រើន ហើយមិនបានទទួលអ្វីមកវិញសូម្បីតែការគោរព។ លោកសង្កត់ធ្ងន់ថា បើសិនគ្មានអាមេរិកខ្នងបង្អែក អារ៉ាប៊ីសាអូឌីត ប្រហែលជាមិននៅស្រួលឡើយ។
២. ជំហានបន្ទាប់គឺដកទ័ពចេញពីជប៉ុននិងកូរ៉េខាងត្បូង
ក្រៅពីបញ្ហាភេរវជន លោក ដូណាល់ ត្រាំ ក៏យល់ឃើញថា ប្រទេសសម្ព័ន្ធមិត្តអាមេរិកនៅអាស៊ីមានជប៉ុននិងកូរ៉េក៏គួរចូលរួមទទួលខុសត្រូវពីបញ្ហាសន្តិសុខខ្លួនឯងដែរ មិនមែនឲ្យអាមេរិកចំណាយលុយការពារពួកគេដូចពេលនេះទេ។ បើតាមសម្តីស្រង់ដោយ New York Times ដដែល បើករណីលោកជាប់ឆ្នោត លោក ដូណាល់ ត្រាំ នឹងដកកងទ័ពអាមេរិកចេញពីជប៉ុននិងកូរ៉េខាងត្បួង បើសិនជាពួកគេមិនចំណាយលុយសម្រាប់ដំណើរការមូលដ្ឋានយោធា និងចិញ្ចឹមកងទ័ពដែលកំពុងឈរជើងនៅប្រទេសទាំងពីរ។
ប៉ុន្តែលោក បានបង្ហាញគម្រោងថ្មីផងដែរ ដោយអនុញ្ញាតឲ្យកូរ៉េខាងត្បូងនិងជប៉ុន ផលិតអាវុធនុយក្លេអ៊ែរដើម្បីការពារខ្លួន ដោយឈប់ពឹងផ្អែកទាំងស្រុងលើសហរដ្ឋអាមេរិកទៀតដើម្បីការពារប្រឆាំងកូរ៉េខាងជើងនិងចិន។
ទាក់ទិនបញ្ហាអឺរ៉ុប លោក ដូណាល់ ត្រាំ ថា បក្សសម្ព័ន្ធយោធា ណាតូ ជាអង្គការហួសសម័យទៅហើយវាត្រូវបានបង្កើតឡើងដើម្បីប្រឆាំងសហភាពសូវៀតប៉ុណ្ណោះក្នុងឆ្នាំ ១៩៤៩ ។ អង្គការណាតូនេះ វាមិនស័ក្តិសមត្រូវគេប្រើប្រាស់ដើម្បីប្រឆាំងភេរវកម្មឡើយ។ ហើយលោកក៏ចង់កាត់បន្ថយជំនួយហិរញ្ញវត្ថុសម្រាប់បក្សសម្ព័ន្ធយោធាណាតូនេះដែរព្រោះ អាមេរិកចំណាយលុយច្រើនណាស់សម្រាប់គាំទ្របក្សសម្ព័ន្ធយោធានេះ៕
Tag:
ដូណាល់ត្រាំ
អារ៉ាប៊ីសាអូឌីត
ជប៉ុន
កូរ៉េខាងត្បូង
© រក្សាសិទ្ធិដោយ thmeythmey.com