អន្តរជាតិ
កម្រាលព្រំក្រហមឆ្អៅស្វាគមន៍ លោក ស៊ី ជិនពីង ក្នុងទស្សនកិច្ចនៅ ឆែក
× ប្រធានាធិបតីចិន លោក ស៊ី ជិនពីង (Xi Jinping) ចាប់ផ្តើមដំណើរទស្សនកិច្ចរបស់លោកទៅកាន់ប្រទេសឆែកនៅថ្ងៃចន្ទនេះដើម្បីពង្រឹងចំណងការទូត ពាណិជ្ជកម្មនិងកិច្ចសហប្រតិបត្តិការសេដ្ឋកិច្ច។ ដំណើរទស្សនកិច្ចពីរថ្ងៃរបស់ប្រមុខរដ្ឋចិននឹងបញ្ចប់ទៅដោយមានការចុះកិច្ចព្រមព្រៀងវិនិយោគច្រើនផងដែរ។
រដ្ឋាភិបាលក្រុងប្រាក បានរៀបចំទទួលស្វាគមន៍ទស្សនកិច្ចរយៈពេលពីរថ្ងៃរបស់ប្រធានាធិបតីចិនលោក ស៊ី ជិនពីង យ៉ាងកក់ក្តៅនៅថ្ងៃចន្ទនេះ។ កម្រាលព្រំក្រហមឆ្អៅត្រូវបានគេក្រាលសម្រាប់ប្រមុខរដ្ឋចិន ហើយលោក ស៊ី ជិនពីង នេះក៏ក្លាយជាឥស្សរជនបរទេសដំបូងគេបំផុតដែលត្រូវបានរដ្ឋាភិបាលឆែកអញ្ជើញឲ្យទៅនិវេសនដ្ឋានពិសេសមួយកន្លែងនៅក្រៅរដ្ឋធានីប្រាក។
ដំណើរទស្សនកិច្ចរបស់ប្រមុខរដ្ឋចិន នេះធ្វើឡើងក្នុងគោលបំណងរឹតបន្តឹងកិច្ចសហប្រតិបត្តិការយុទ្ធសាស្ត្រ ចំណងការទូត សេដ្ឋកិច្ច និងពាណិជ្ជកម្មជាមួយប្រទសឆែក។ លោក ស៊ី នឹងជួបជជែកពិភាក្សាដោយផ្ទាល់ជាមួយប្រធានាធិបតីឆែកលោក Milos Zeman ផងដែរ ហើយមេដឹកនាំទាំងពីរនឹងចុះហត្ថលេខាលើកិច្ចព្រមព្រៀងវិនិយោគមួយចំនួនរួមគ្នាផងក្រោយបិទបញ្ចប់កិច្ចប្រជុំ។
មុនទស្សនកិច្ចចាប់ផ្តើមលោក ស៊ី ជិនពីង បានថ្លែថា៖« ភាគីចិននិងឆែកគួរតែបង្កើនទំនាក់ទំនងរួមគ្នា និងត្រូវមើលទំនាក់ទំនងនេះ ក្នុងទស្សនវិស័យយុទ្ធសាស្ត្រ និងវែងឆ្ងាយ»។
មហាយក្សអាស៊ីចិននេះ ជាដៃគូពាណិជ្ជកម្មដ៏ធំបំផុតរបស់រដ្ឋអឺរ៉ុប ឆែក ហើយទំនាក់ទំនងពាណិជ្ជកម្មទ្វេភាគីកើនឡើងដល់២១ ពាន់លានដុល្លារអាមេរិកហើយបច្ចុប្បន្ននេះ។
តាមពិតទៅ ប្រធានាធិបតីឆែកលោក Milos Zeman ចង់រឹតបន្តឹងចំណងមិត្តភាពនិងកិច្ចសហប្រតិបត្តិការជាមួយចិនតាំងពីពេលលោកឡើងកាន់តំណែងឆ្នាំ ២០១៣ម្ល៉េះ ថ្វីបើលោកមានតួនាទីមិនសូវសំខាន់ក្នុងការបង្កើតនយោបាយការបរទេសក៏ដោយ។ លោកមានទំនោរទៅរកការបង្កើនទំនាក់ទំនងការទូតជាមួយចិន ហើយលោក៏ធ្លាប់ទៅទស្សនកិច្ចនៅប្រទេសចិនដើម្បីរៀនសូត្រពីការរក្សាស្ថិរភាពនិងអភិវឌ្ឍសេដ្ឋកិច្ចប្រទេសជាតិប្រកបដោយនិរន្តរភាពផងដែរ។
លោក Milos Zeman បានថ្លែង ក្នុងឆ្នាំ ២០១៤ លោកបានទៅទស្សនកិច្ចប្រទេសចិន ហើយលោកបានរៀនសូត្រច្រើនពីចិនជុំវិញការបង្កើតគោលនយោបាយរក្សាស្ថិរភាពប្រទេសជាតិនិងរក្សាកំណើនសេដ្ឋកិច្ច ជាជាងផ្តោតលើសេដ្ឋកិច្ចទីផ្សារ និងបញ្ហាសិទ្ធិមនុស្ស។
កន្លងមកលោក Milos Zeman បានក្លាយជាមេដឹកនាំអឺរ៉ុបដំបូងបំផុតដែលបានអញ្ជើញទៅចូលរួមក្នុងកម្មវិធីរលឹកខួបលើកទី ៧០ នៃជ័យជម្នះសង្គ្រាមលោកលើក ទី ២ ដែលប្រារព្ធឡើងនៅក្នុងប្រទេសចិន កាលពីខែកញ្ញាឆ្នាំមុន។
ប៉ុន្តែនិន្នាការរបស់លោក ហាក់បីដូចជាផ្ទុយស្រឡះពីអតីតមេដឹកនាំឆែកលោក Vaclav Havel ដែលជាប្រធានធិបតីឆែកក្រោយសម័យកុម្មុយនីស្ត។ លោកមានទំនាក់ទំនងជិតស្និទ្ធឬអាចថាជាមិត្តរបស់មេដឹកនាំសាសនានៃតំបន់ទីបេ សម្តេចសង្ឃ ដាឡៃ ឡាម៉ា (Dalai Lama)៕
Tag:
ស៊ី ជិនពីង
Milos Zeman
ចិន
ឆែក
© រក្សាសិទ្ធិដោយ thmeythmey.com