ពេញមួយថ្ងៃ ក្រុមនិស្សិត ស្រី ចំរើន ដាក់ញត្តិបាន៤កន្លែង

ជាតិ

ពេញមួយថ្ងៃ ក្រុមនិស្សិត ស្រី ចំរើន ដាក់ញត្តិបាន៤កន្លែង

29, Mar 2016 , 10:48 pm

រូបភាព

ដោយ: ម៉ៅ សុផា

ក្រុមនិស្សិតជាង៥០នាក់ ដែលដឹកនាំដោយលោក ស្រី ចំរើន បាននាំគ្នាដាក់ញត្តិ នៅ៤កន្លែងផ្សេងគ្នា នៅថ្ងៃទី២៩ ខែមីនា ឆ្នាំ២០១៦ ។ ការដាក់ញត្តិសាជាថ្មីនេះ មានគោលបំណងដដែល គឺការទាមទារឲ្យ ឯកឧត្តម កឹម សុខា ប្រធានស្តីទីគណបក្សសង្គ្រោះជាតិ ចេញមុខបកស្រាយរឿងខ្សែអាត់សំឡេងសាសងស្នេហាជាមួយនារី។ ការព្យាយាមចង់បានបែបនេះ ព្រោះក្រុមនិស្សិតទាំងនោះ យល់ថាទង្វើរបស់ឯកឧត្តម កឹម សុខា គឺប្រាសចាកសីលធម៌ ហើយខុសនឹងច្បាប់ថែមទៀត។ យ៉ាងណាក៏ដោយចុះ ការតវ៉ារបស់ពួកគេ ចាប់ពីថ្ងៃត្រង់ដល់ពេលរសៀល មិនបានប៉ះទង្គិចអ្វីជាមួយនឹងសកម្មជនបក្សប្រឆាំង ឡើយ។ ប៉ុន្តែសកម្មជនគណបក្សសង្គ្រោះជាតិ បានបញ្ចេញសម្តីបែបផ្លែផ្កាឲ្យក្រុមនិស្សិតម្តងម្តាល ដោយសារតែពួកគេឮក្រុមនិស្សិតទាំងនោះ វាយប្រហារធ្ងន់ៗលើឯកឧត្តម កឹម សុខា ទាក់ទងនឹងខ្សែអាត់សំឡេង។

ក្រុមនិស្សិត បានចងក្រងគ្នាសាជាថ្មី ដើម្បីដាក់ញត្តិ ទាមទារឲ្យឯកឧត្តម កឹម សុខា ចេញមុខបំភ្លឺដល់ប្រជាពលរដ្ឋកម្ពុជា ជុំវិញសំឡេងសាសងស្នេហាជាមួយនារីកំណាន់ចិត្តក្នុងទូរសព្ទ ដែលពួកគេចាត់ទុកថា ទំនងជាសំឡេងពិតរបស់ប្រធានស្តីទីគណបក្សជំទាស់រូបនេះ។ ពួកគេបានចំណាយពេលតាំងពីថ្ងៃត្រង់ រហូតដល់រសៀល ដើម្បីហែញត្តិ ទៅដាក់៤កន្លែងផ្សេងគ្នា។ ដំណាក់កាលដំបូង ពួកគេបានដង្ហែញត្តិទៅដាក់នៅវិមានរដ្ឋសភា បន្ទាប់មកក៏ធ្វើដំណើរឆ្ពោះទៅកាន់ការិយាល័យឧត្តមស្នងការអង្គការសហប្រជាជាតិប្រចាំកម្ពុជា។ ក្រោយពីដាក់ញត្តិនៅការិយាល័យឧត្តមស្នងការអង្គការសហប្រជាជាតិរួច ពួកគេក៏បន្តយុទ្ធនាការតម្រង់ទៅទីស្នាក់ការកណ្តាលគណបក្សសង្គ្រោះជាតិ ហើយគោលដៅចុងក្រោយ គឺសំដៅទៅកាន់ផ្ទះ ឯកឧត្តម កឹម សុខា តែម្តង។

គ្រាន់តែដល់មុខរបងផ្ទះឯកឧត្តម កឹម សុខា ភ្លាម សំឡេងកងរំពងរបស់ក្រុមនិស្សិត បានបន្លឺឡើងយ៉ាងខ្លាំងៗ។ និស្សិតមួយរូបបានកាន់ឧគ្ឃោសនាសព្ទ ហើយស្រែកខ្លាំងៗបែបនេះថា៖«កឹម សុខា! កឹម សុខា កំសាកខ្លាំងណាស់។ បើបុគ្គលមិនខូច មិនខ្លាចទេ! មាសសុទ្ធមិនខ្លាចភ្លើងទេ តែបុគ្គលហ្នឹង (ឯកឧត្តម កឹម សុខា) ជាមនុស្សខូច មានស្រី ហើយជាស្រីយួនទៀត។ ដូរ មិនដូរ! ដូរ! ដូរអ្វី! ដូរស្រី»។ និស្សិតរូបនោះ បានស្រែកពាក្យចំអកឡកឡឺយទាំងនោះជាច្រើនដងច្រើនសា ទៅកាន់តួអង្គ ឯកឧត្តម កឹម សុខា។ ចំណែកឯ និស្សិតផ្សេងៗទៀត បានស្រែកបន្ទរនូវអ្វីដែលនិស្សិតរូបនេះបានលើកឡើង។

តំណាងនិស្សិត លោក ស្រី ចំរើន បានថ្លែងទៅកាន់ក្រុមអ្នកសារព័ត៌មាននៅមុខរបងផ្ទះឯកឧត្តម កឹម សុខា ថា ក្រុមនិស្សិត យល់ថា ទង្វើរបស់ប្រធានស្តីទីគណបក្សសង្គ្រោះជាតិរូបនេះ គឺប្រាសចាកក្រមសីលធម៌ និងឆ្គាំឆ្គងចំពោះប្រពៃណី ព្រមទាំងខុសនឹងច្បាប់ ផងដែរ។ លោកបន្ថែមថា ស្ថិតនៅក្រោមហេតុផលបែបនេះហើយ ទើបពួកគេព្យាយាមម្តងហើយម្តងទៀត ឲ្យឯកឧត្តម កឹម សុខា បង្ហាញភាពក្លាហាន ដើម្បីចេញមុខមកស្រាយបំភ្លឺ ចំពោះខ្សែអាត់សំឡេងនេះ។

យ៉ាងក៏ដោយចុះ សកម្មជនបក្សសង្គ្រោះជាតិមួយចំនួន បានស្រែកឌឺដងទៅកាន់ក្រុមនិស្សិតទាំងនោះនូវពាក្យអសុរោះម្តងម្កាល។ ពាក្យទាំងនោះ ដូចជា៖«ក្រុមនិស្សិតពួកឯងរៀនចេះតែរឿងឆ្កួតៗ» ជាដើម។ តែការស្រែកបែបនេះមិនបានបង្កឲ្យមានជម្លោះអ្វីនោះទេ។

តាមពិតទៅ សកម្មជនគណបក្សសង្គ្រោះជាតិ៤ទៅ៥នាក់ បានដើរប្រាប់សកម្មជនទាំងអម្បាលម៉ានដែលមកផ្ទះឯកឧត្តម កឹម សុខា ឲ្យរក្សាភាពស្ងៀមស្ងាត់ មិនត្រូវឆ្លើយតបអ្វីឡើយ។ ពួកគេថាប្រាប់តៗគ្នាថា៖«អ្វីៗគ្រប់យ៉ាងទុកឲ្យអ្នកសារព័ត៌មានជាអ្នកសួរនិងឆ្លើយឆ្លងចុះ។ យើងនៅឲ្យតែស្ងៀមទៅ»។

ដោយសារតែការអត់ធ្មត់របស់អ្នកគាំទ្របក្សជំនាស់បែបនេះហើយ ទើបការតវ៉ារបស់ក្រុមនិស្សិតនៅថ្ងៃនេះ មិនបានបង្កអំពើហិង្សាណាមួយ បើទោះបីជាក្រុមនិស្សិតទាំងនោះ បញ្ចេញវាចាមិនគប្បី ទៅកាន់ឯកឧត្តម កឹម សុខា ក៏ដោយ។

បន្ទាប់ពីបុរសម្នាក់ ដែលអះអាងថាខ្លួនជាសន្តិសុខមើលការខុសត្រូវផ្ទះឯកឧត្តម កឹម សុខា ចេញមកទទួលញត្តិ ក្រុមនិស្សិតទាំងនោះ ក៏សម្រេចចិត្តបញ្ចប់យុទ្ធនាការរបស់ខ្លួន និងត្រឡប់ទៅលំនៅដ្ឋានវិញ នៅម៉ោង ជាង៥រសៀល៕