កីឡាជាតិ
ជាតិ
សហព័ន្ធចំនួន៩ ទទួលបានសិទ្ធិរៀបចំកីឡាមហាជនជ្រើសរើសជើងឯកថ្នាក់ជាតិ
× ការប្រកួតកីឡាមហាជនជ្រើសរើសជើងឯកថ្នាក់ជាតិប្រចាំឆ្នាំ២០១៦ និងល្បែងកីឡាទាំង១៤ប្រភេទ ត្រូវបានក្រសួងអប់រំ យុវជន និងកីឡា បានបង្ហាញពេលវេលា ទីតាំង នៃការប្រកួត និងអង្គភាពទទួលបន្ទុករៀបចំរួចរាល់ហើយ កាលពីថ្ងៃទី២៥ ខែមីនា ខណៈកីឡា៩ប្រភេទជាបន្ទុករបស់នាយកដ្ឋានអប់រំកាយ និងកីឡា រួមជាមួយសហព័ន្ធជាតិ។
សហព័ន្ធជាតិចំនួន៩ និងនាយកដ្ឋានអប់រំកាយ និងកីឡា(អ.យ.ក) ត្រូវបានក្រសួងអប់រំ យុវជន និងកីឡាផ្តល់សិទ្ធិឲ្យរៀបចំការប្រកួតកីឡាមហាជនជ្រើសរើសជើងឯកថ្នាក់ជាតិប្រចាំឆ្នាំ២០១៦ លើប្រភេទកីឡាចំនួន៩ប្រភេទ ក្នុងនោះមាន កីឡាសីប៉ាក់តាក្រ, វូស៊ូ, សូហ្វតិនីស, យូដូ, វូវីណាម, តុងហ្គីលម៉ូដូ, ការ៉ាតេដូ, តេក្វាន់ដូI.T.F, និងកីឡាទូកប្រពៃណីខ្នាតអន្តរជាតិ និងកានូកាយ៉ាក់។ នេះបើយោងតាមរបាយការណ៍ប្រកួតរបស់ក្រសួងអប់រំយុវជន និងកីឡា កាលពីថ្ងៃទី២៥ ខែមីនា។
កីឡាទាំង៩ប្រភេទនេះនឹងធ្វើការប្រកួតទៅតាមពេលវេលា និងទីតាំងផ្សេងៗគ្នា ក្នុងនោះកីឡាសីប៉ាក់តាក្រ នឹងធ្វើការប្រកួតចាប់ពីថ្ងៃទី២០ ដល់ទី២៥ ខែមេសា ឬឯកីឡាវូស៊ូ ប្រកួតចាប់ពីថ្ងៃទី២៦ ដល់ទី៣០ ខែមេសា ខណៈកីឡាសូហ្វតិនីស ប្រកួតចាប់ពីថ្ងៃទី៤ ដល់ទី៨ ខែឧសភា ចំណែកកីឡាយូដូ ប្រកួតចាប់ពីថ្ងៃទី១៨ ដល់ទី២២ ខែឧសភា។
ទន្ទឹមនឹងនេះកីឡាវ៉ូវីណាម នឹងធ្វើការប្រកួតចាប់ពីថ្ងៃទី៧ ដល់ទី១០ ខែមិថុនា ស្របពេលកីឡាតុងហ្គីលម៉ូដូ ប្រកួតចាប់ពីថ្ងៃទី២១ ដល់ទី២៤ ខែកក្កដា ខណៈកីឡាការ៉ាតេដូ ប្រកួតចាប់ពីថ្ងៃទី២៧ ដល់ទី៣១ ខែកក្កដា ឬឯកីឡាតេក្វាន់ដូ I.T.F ប្រកួតចាប់ពីថ្ងៃទី៨ ដល់ទី១២ ខែកញ្ញា និងកីឡាទូកប្រពៃណីខ្នាតអន្តរជាតិ និងកានូ កាយ៉ាក់ នឹងធ្វើការប្រកួតចាប់ពីថ្ងៃទី២២ ដល់ទី២៨ ខែកញ្ញា។ គួរបញ្ជាក់ថា សម្រាប់ទីតាំងនៃការប្រកួតក្នុងចំណោមកីឡាទាំង៩ មានកីឡា៨ប្រភេទប្រកួតនៅរាជធានីភ្នំពេញ លើកលែងកីឡាទូកប្រពៃណីខ្នាតអន្តរជាតិប្រកួតនៅទីក្រុងតាខ្មៅ។
ជាមួយគ្នានេះ សហព័ន្ធកីឡាចំបាប់កម្ពុជា និងក្រសួងអប់រំ យុវជន និងកីឡា នឹងធ្វើជាម្ចាស់ផ្ទះរៀបចំការប្រកួតកីឡាចំបាប់ជ្រើសរើសជើងឯកអាស៊ីអាគ្នេយ៍ ចាប់ពីថ្ងៃទី១៤ ដល់ថ្ងៃទី១៩ ផងដែរ។ ហើយក្រៅពីនោះក៏មានការប្រកួតកីឡាដើម្បីយើងទាំងអស់គ្នា ក្នុងខែតុលា និងវិច្ឆិកា ជាពិសេសការប្រកួតជ្រើសរើសជើងឯកថ្នាក់ជាតិរាជធានី-ខេត្ត ដែលនឹងធ្វើការប្រកួតចាប់ពីថ្ងៃទី១ មេសា ដល់ថ្ងៃទី៣១ ខែសីហា។
ដោយឡែក ការប្រកួតល្បែងកីឡាជាតិ(National Games)ទាំង១៤ប្រភេទ រួមមាន កីឡាអត្តពលកម្ម, វាយសី, ហែលទឹក, បាល់បោះ, ប្រដាល់, បាល់ទាត់, ចំបាប់, វាយកូនឃ្លីលើតុ, តេក្វាន់ដូWTF, បាល់ទះ, វាយកូនបាល់, ប៉េតង់, ល្បុក្កតោ, និងកីឡាកាយសម្ព័ន្ធ នឹងធ្វើការប្រកួតចាប់ពីថ្ងៃទី២៦ ខែតុលា ដល់ថ្ងៃទី៥ ខែវិច្ឆិកា៕
Tag:
កីឡាមហាជន
ល្បែងកីឡា
© រក្សាសិទ្ធិដោយ thmeythmey.com