កីឡាជាតិ
ជាតិ
យុវជនសាលាបាល់ទាត់ជាតិកម្ពុជា ឈ្នះU-18 Kagoshima FC ២-០ នៅទឹកដីជប៉ុន រូបថត៖ សហព័ន្ធកីឡាបាល់ទាត់កម្ពុជា
× សម្រាប់ការប្រកួតបើកឆាកក្នុងព្រឹត្តិការណ៍ 2016 J.League Under-16 Challenge League ក្រុមយុវជនសាលាកីឡាបាល់ទាត់ជាតិអាយុក្រោម១៦ឆ្នាំរបស់កម្ពុជា បានយកឈ្នះក្រុមយុវជន Kagaoshima អាយុក្រោម១៨ឆ្នាំ ក្នុងលទ្ធផល ២-០ នាជំនួបនៅទីលាន Global Arena ក្រុង Fukuoka ប្រទេសជប៉ុន នាថ្ងៃទី៣០ ខែមីនា នេះ។ នេះបើយោងតាមលទ្ធផលផ្សាយដោយសហព័ន្ធកីឡាបាល់ទាត់កម្ពុជា។
ក្នុងការប្រកួតនេះ កម្ពុជារកបាន២គ្រាប់ក្នុងរយៈពេលតែ២នាទីប៉ុណ្ណោះក្នុងតង់ទីពីរ ដោយ សេត ម៉ាន់ស៊ុត រកបាននៅនាទី ទី៦២ ហើយ ផាច សុជាវីឡា បន្ថែមគ្រាប់ទី២នៅនាទីបន្ទាប់។
ក្រុមយុវជនសាលាកីឡាបាល់ទាត់ជាតិអាយុក្រោម១៦ឆ្នាំរបស់កម្ពុជា ត្រូវបានអញ្ជើញឲ្យចូលរួមព្រឹត្តិការណ៍ J.League Under-16 Challenge League នាឆ្នាំនេះ ជាមួយក្រុមផ្សេងទៀតនៅក្នុងតំបន់អាស៊ី ដែលក្នុងនោះមាន ក្រុម Pohang Steelers របស់កូរ៉េខាងត្បូង Chonburi FC របស់ថៃ PVF របស់វៀតណាម Frenz United របស់ម៉ាឡេស៊ី។
ការប្រកួតប្រព្រឹត្តទៅពីថ្ងៃទី៣០ ខែមីនា ដល់ថ្ងៃទី៦ ខែមេសា។ ព្រឹត្តិការណ៍នេះ ធ្វើឡើងក្រោមការសហការរវាងស្ថាប័ន J.League និងមូលនិធិ Japan Foundation Asia Center ក្នុងបំណងឲ្យយុវជនក្នុងតំបន់អាស៊ី និងជប៉ុន ផ្លាស់ប្តូរបទពិសោធន៍គ្នាលើជំនាញបាល់ទាត់ និងវប្បធម៌៕
Tag:
បាល់ទាត់
យុវជនថ្នាល
© រក្សាសិទ្ធិដោយ thmeythmey.com