ផែស្វយ័តព្រះសីហនុបាន៣ពិន្ទុ ការពារជាតិជោគជ័យធំ រីឯកំពង់ធំដើរចេញមុនចប់ការប្រកួត

កីឡាជាតិ

ជាតិ

ផែស្វយ័តព្រះសីហនុបាន៣ពិន្ទុ ការពារជាតិជោគជ័យធំ រីឯកំពង់ធំដើរចេញមុនចប់ការប្រកួត

31, Mar 2016 , 2:41 pm

រូបភាព

កីឡាកររបស់ក្លិបក្រសួងការពារជាតិ

ដោយ:

ជំនួបតាមពូលនៃដំណាក់កាលផ្តាច់ព្រ័ត្រពានរង្វាន់សម្តេច ហ៊ុន សែន ឆ្នាំ២០១៦ ដែលប្រព្រឹត្តទៅកាលពីថ្ងៃទី៣០ ខែមីនា ម្សិលមិញ មានការស៊ុតបាល់បញ្ចូលទីគ្រប់ការប្រកួត។ នៅក្នុងពូល A កំពង់ផែស្វយ័តខេត្តព្រះសីហនុ រកបាន៣ពិន្ទុមុនគេ ខណៈពូល B ក្រសួងការពារជាតិ និងបឹងកេតអង្គរអែហ្វស៊ី សុទ្ធតែបានទទួលជ័យជម្នះរៀងៗខ្លួន។ ស្របពេលជាមួយគ្នា ក្រុមកងរាជអាវុធហត្ថកំពង់ធំដើរចេញពីទីលាននៅ២នាទីមុនបញ្ចប់ការប្រកួតសម្រាប់ជំនួបនៅលើទឹកដីខេត្តស្ទឹងត្រែង។

ក្រៅពីបង្ហាញភាពខ្លាំងនៅក្នុងក្របខណ្ឌកំពូលមិត្តហ្វូនខេមបូឌានលីក ក្រសួងការពារជាតិ ចង់បញ្ជាក់ឲ្យដឹងថា ពួកគេក៏ជាក្រុមរឹងមាំមួយផងដែរនៅក្នុងក្របខណ្ឌកំពូល បើទោះបីជាគ្មានកីឡាករបរទេសក៏ដោយ។ នាជំនួបនៅលើទីលានកងយោធពលខេមរភូមិន្ទ កាលពីរសៀលថ្ងៃពុធ ការពារជាតិដែលជាម្ចាស់ជើងឯកឆ្នាំ២០១០ បានផ្តល់មេរៀន ៨-០ ដល់ខេត្តព្រៃវែង ក្រុមដែលឡើងពីវគ្គជម្រុះបឋម។

ក្នុងជ័យជម្នះដ៏ធំធេងរបស់ការពារជាតិនេះ ៣គ្រាប់សម្រេចបានដោយកីឡាករ រ៉ឹង ប៊ុនហៀង ខណៈកីឡាករ សុក ច័ន្ទរស្មី រកបាន២គ្រាប់ និងចូលរួមចំណែកដោយកីឡាករ ទូច រ៉ូម៉ា ច្រឹង ពលរដ្ឋ និង ភួង សុខសាណា ម្នាក់មួយគ្រាប់។ លទ្ធផលនេះបានធ្វើឲ្យក្រុមមួយនេះឈរនៅកំពូលតារាងនៃពូល B ជាបណ្តោះអាសន្ត។

នាការប្រកួតនៅលើទឹកដីនៃកីឡដ្ឋានខេត្តស្ទឹងត្រែង ក្រុមភ្ញៀវលេខ២ពូល C វគ្គជម្រុះបឋម កងរាជអាវុធហត្ថខេត្តកំពង់ធំ បានដើរចេញពីការប្រកួតអំឡុងពេលសល់២នាទីចុងក្រោយ។ ការចេញនេះ បន្ទាប់ពីមានលទ្ធផលជ័យជម្នះ ៥-២ របស់ក្រុមម្ចាស់ផ្ទះ។

ពាក់ព័ន្ធនឹងការដើរចេញពីការប្រកួតនេះ លោក ជា ប៊ុនតៃ ស្នងការប្រកួតមិនធ្វើការអធិប្បាយប្រាប់មូលហេតុនោះទេ ដោយលោកគ្រាន់តែបញ្ជាក់ថា៖«ខ្ញុំមិនអាចប្រាប់អ្នកសារព័ត៌មានមុនបានទេពាក់ព័ន្ធទៅនឹងបញ្ហានេះ ព្រោះខ្ញុំត្រូវប្រជុំផ្ទៃក្នុងជាមុនសិន»។

នៅក្នុងពូល B ដដែល ក្រុមខ្លាំងបឹងកេតអង្គរអែហ្វស៊ី បានយកឈ្នះក្រុមអាស៊ីអឺរ៉ុបដែលមកពីក្របខណ្ឌកំពូលដូចគ្នាក្នុង ២-១ នៅពហុកីឡដ្ឋានជាតិ។ អតីតកីឡាករណាហ្គាវើលពីររូប គឺ ទៀប វឌ្ឍនៈ និងជិន ជុំ បានស៊ុតបាល់បញ្ចូលទីឲ្យក្រុមថ្មីរៀងៗខ្លួន។

ការប្រកួតដំណើរការបាន៧នាទី ខ្សែប្រយុទ្ធ ទៀប វឌ្ឍនៈ រកគ្រាប់បើកឆាកឲ្យបឹងកេត មុនពេលខ្សែការពារអាស៊ីអឺរ៉ុប យ៉ោម វណ្ណា ភ្លាត់ស្នៀតធ្វើឲ្យបាល់ចូលទីខ្លួនឯងក្នុងនាទី ទី២៣ ។ នៅពេលដែលការប្រកួតដំណើរការបានជាង១ម៉ោង ជិន ជុំ បានវាយបកវិញសម្រាប់អាស៊ីអឺរ៉ុប ប៉ុន្តែលទ្ធផល ២-១ ត្រូវបានរក្សារហូតដល់បញ្ចប់ការប្រកួត។

សម្រាប់ជំនួបនៅក្នុងពូល A ក្រុម កំពង់ផែស្វយ័តខេត្តព្រះសីហនុ បានយកឈ្នះក្រុម យុវជនបឹងកេត ១-០ នៅកីឡដ្ឋាននៃសាកលវិទ្យាល័យឡាយហ្វ ខេត្តព្រះសីហនុ ខណៈខេមបូឌានថាយហ្គឺរដែលលេងនៅក្របខណ្ឌកំពូល បានត្រឹមបញ្ចប់លទ្ធផលស្មើ ២-២ ជាមួយម្ចាស់ផ្ទះកំពង់ឆ្នាំង៕

លទ្ធផលការប្រកួតថ្ងៃទី៣០ ខែមីនា ៖

ពូល A៖

- ខេត្តកំពង់ឆ្នាំង ២-២ ខេមបូឌានថាយហ្គឺរ នៅកីឡដ្ឋានខេត្តកំពង់ឆ្នាំង

- កំពង់ផែស្វយ័តខេត្តព្រះសីហនុ ១-០ យុវជនបឹងកេតអង្គរ នៅសាកលវិទ្យាល័យឡាយហ្វ ខេត្តព្រះសីហនុ

ពូល B៖

- ខេត្តស្ទឹងត្រែង ៥-២ កងរាជអាវុធហត្ថខេត្តកំពង់ធំ នៅកីឡដ្ឋានខេត្តស្ទឹងត្រែង

- ក្រសួងការពារជាតិ ៨-០ ខេត្តព្រៃវែង នៅកីឡដ្ឋានកងយោធពលខេមរភូមិន្ទ

- អាស៊ីអឺរ៉ុបយូណាយធីត ១-២ បឹងកេតអង្គរអែហ្វស៊ី នៅពហុកីឡដ្ឋានជាតិ