ក្រុមឈ្នះ-ឈ្នះ-ឈ្នះ បឹងកេត និងការពារជាតិ ប៉ះគ្នា បន្ទាប់ពីជំនួបរវាងស៊ីម៉ាក់ និងថាយហ្គឺរ

កីឡាជាតិ

ជាតិ

ក្រុមឈ្នះ-ឈ្នះ-ឈ្នះ បឹងកេត និងការពារជាតិ ប៉ះគ្នា បន្ទាប់ពីជំនួបរវាងស៊ីម៉ាក់ និងថាយហ្គឺរ

02, Apr 2016 , 1:33 pm

រូបភាព

ខ្សែប្រយុទ្ធកូរ៉េខាងជើង Choe Myon-ho របស់ការពារជាតិ ត្រូវប៉ះជាមួយបឹងកេតដែលដឹកនាំដោយលោក ប្រាក់ សុវណ្ណារ៉ា

ដោយ: រួបរួម

ពហុកីឡដ្ឋានជាតិអូឡាំពិក នឹងក្លាយជាទីលាននៃជំនួបសប្តាហ៍ទី៤ ក្របខណ្ឌមិត្តហ្វូនខេមបូឌានលីកឆ្នាំ២០១៦ រវាងក្រុមស៊ីម៉ាក់យូណាយធីត និងខេមបូឌានថាយហ្គឺរ នាវេលាម៉ោង៣ និង៣០នាទី និងការប៉ះគ្នារវាងក្រុមឈ្នះរហូតទាំងពីរ គឺបឹងកេតអង្គរ និងក្រសួងការពារជាតិ នាវេលាម៉ោង៦ល្ងាច ថ្ងៃទី២ ខែមេសា នេះ។

នៅម៉ោង៦ល្ងាច បឹងកេតអង្គរ និងក្រសួងការពារជាតិ បានចាប់ផ្តើមយុទ្ធនាការរដូវកាលថ្មីនៃក្របខណ្ឌមិត្តហ្វូនខេមបូឌាន ជាមួយនឹងជ័យជម្នះទាំង៣ប្រកួតលើកដំបូង។ ក្រុមទាំងពីរសុទ្ធមានខ្សែការពារ និងអ្នកចាំទីដ៏រឹងមាំ ដោយបីប្រកួតកន្លងមក បឹងកេតអង្គរស៊ុតបាល់បញ្ចូលទីលើគូប្រកួត១៦គ្រាប់ ហើយធ្លាយវិញតែ២គ្រាប់ប៉ុណ្ណោះ ដូចគ្នាផងដែរ ការពារជាតិទម្លាញសំណាញ់គូប្រជែង១០គ្រាប់ និងធ្លាយវិញតែ២គ្រាប់។

នេះក៏ជាការប៉ះគ្នាផងដែររវាងខ្សែប្រយុទ្ធឆ្នើម ចាន់ វឌ្ឍនាកា របស់បឹងកេត និងខ្សែប្រយុទ្ធកូរ៉េខាងជើង Choe Myong-ho នៃក្លិបក្រសួងការពារជាតិ ដោយពួកគេសុទ្ធតែបានគ្រាប់បាល់បញ្ចូលទីសរុប៦គ្រាប់។ ជ័យជម្នះរបស់ក្រុមណាមួយ នឹងនាំឲ្យពួកគេទម្លាក់ព្រះខ័នរាជស្វាយរៀងពីតំណែងលេខ១វិញ។

កាលពីថ្ងៃសុក្រ ខ្សែប្រយុទ្ធរវ៉ាន់ដា Atuheire Kipson បានស៊ុតបាល់បញ្ចូលទី២គ្រាប់ក្នុងជ័យជម្នះ ២-១ លើភ្ញៀវណាហ្គាវើល ដែលនាំឲ្យព្រះខ័នរាជស្វាយរៀង ឡើងទៅឈរលេខ១បណ្ណោះអាសន្ន ដោយមាន១០ពិន្ទុ និងលើសបឹងកេត និងការពារជាតិ១ពិន្ទុ។ Kipson មានគ្រាប់បាល់បញ្ចូលទីសរុប៦គ្រាប់ដូច វឌ្ឍនាកា និង Myong-ho ផងដែរ។

សម្រាប់ជំនួបនាវេលាម៉ោង៣ និង៣០នាទី ស៊ីម៉ាក់យូណាយធីត ត្រូវប៉ះជាមួយខេមបូឌានថាយហ្គឺរ ខណៈក្រុមទាំង២ទើបរកបាន៣ពិន្ទុរៀងៗខ្លួនពីការប្រកួត៣លើកកន្លងមក៕