ពីនេះ ពីនោះ
ព័ត៍មានសុខភាព
សុខភាព៖ មូលហេតុ៣យ៉ាងដែលអ្នកគួរឈប់ប្រើទូរសព្ទស្មាតហ្វូននៅក្នុងពេលយប់
× ជាមួយនឹងបច្ចេកវិទ្យានិងសង្គមដ៏ទាន់សម័យនាពេលបច្ចុប្បន្ននេះ មនុស្សស្ទើរតែគ្រប់គ្នា សុទ្ធតែមានទូរសព្ទស្មាតហ្វូនប្រើនៅក្នុងដៃរបស់ពួកគេ ។ វាពិតជាមានភាពងាយស្រួល និងធ្វើឲ្យមនុស្សអាចប្រើនូវកម្មវិធីផ្សេងៗបាន មិនថាលេងហ្វេសប៊ុក អានព័ត៌មាន ស្តាប់ចំរៀង ឬ ធ្វើកិច្ចការផ្សេងៗ គឺស្មាតហ្វូនអាចប្រើបានគ្រប់ពេល និងគ្រប់ទីកន្លែងណាដែលអាចភ្ជាប់ទៅនឹងប្រព័ន្ធអ៊ីនធឺណេត ។ មនុស្សជាច្រើន ហាក់នឹងមិនចាប់អារម្មណ៍នោះទេថា វាអាចផ្តល់ផលអាក្រក់ដល់សុខភាពរបស់យើងបានយ៉ាងធ្ងន់ធ្ងរ ជាពិសេសនៅពេលដែលយើងប្រើវានៅក្នុងពេលយប់ មុនពេលចូលគេងនោះ។ ពន្លឺពណ៌ខៀវ ដែលចេញពីទូរសព្ទស្មាតហ្វូននេះ គឺមានទំនាក់ទំនងជាច្រើននឹងបញ្ហាប្រឈមផ្សេងៗចំពោះសុខភាព។
ការប្រើទូរសព្ទស្មាតហ្វូននៅក្នុងពេលយប់នឹងបង្កគ្រោះថ្នាក់៣យ៉ាងដល់សុខភាពរបស់មនុស្ស៖
១.បំផ្លាញដល់សុខភាពភ្នែក
ពន្លឺខៀវ ដែលមាននៅលើកញ្ចក់អេក្រង់របស់វា គឺអាចបំផ្លាញដល់រ៉េទីណា និងម៉ាគូលែរបស់ភ្នែក។ វាគឺជាការបំផ្លាញដល់ ការមើលឃើញនៃផ្នែកកណ្តាលរបស់ភ្នែក ឬបាត់បង់សមត្ថភាព មើលឃើញនូវរបស់ដែលស្ថិតនៅខាងមុខអ្នក ។
ការវិវត្តមាននូវ ភ្នែកឡើងបាយ ក៏អាចមានទំនាក់ទំនងទៅនឹងពន្លឺខៀវនេះផងដែរ។ គ្រូពេទ្យម្នាក់ បានជួបនឹងអ្នកជំងឺអាយុ ៣៥ឆ្នាំម្នាក់ ដែលមានភ្នែកស្រអាប់ ដោយសារតែបញ្ហាភ្នែកឡើងបាយ គឺមានបញ្ហាស្រដៀងទៅនឹងមនុស្សដែលមានអាយុ៧៥ឆ្នាំ។ គ្រូពេទ្យជឿថា បញ្ហានេះអាចកើតមានដោយសារតែ ការប្រើស្មាតហ្វូន ប៉ុន្តែយើងក៏ចាំបាច់ត្រូវការ ធ្វើការសិក្សាស្រាវជ្រាវបន្ថែមទៀត ដើម្បីបញ្ជាក់ឲ្យច្បាស់ពីការសន្មត់មួយនេះផងដែរ។
២.បាត់បង់ការងងុយគេង
ដូចដែលបានរៀបរាប់ពីខាងលើមក ពន្លឺខៀវ គឺអាចនឹងរំខានដល់ការបង្កើតមេឡាតូនីន ដែលនេះជាអរម៉ូនក្នុងការលៃតម្រូវវដ្តនៃការគេងលក់របស់មនុស្ស។ ដោយមិនមានការលៃតម្រូវនេះ ឲ្យបានត្រឹមត្រូវនោះអ្នកនឹងមិនអាចគេងបានគ្រប់គ្រាន់ ទៅតាមតម្រូវការរបស់រាងកាយឡើយ ។ ហើយបញ្ហានេះការគេងមិនបានស្កប់ស្កល់នេះ នឹងធ្វើឲ្យអ្នកប្រឈមនឹងជំងឺផ្សេងៗទៀតដូចជា៖
- ជំងឺបេះដូង និងបញ្ហាបេះដូងសសៃឈាមដទៃទៀត
- មានការឆ្លើយតបទៅនឹងអ្វីមួយយឺតយ៉ាវ
- ខ្សោយក្នុងការចងចាំ
- ជំងឺធ្លាក់ទឹកចិត្ត
- ស្បែកចាស់មុនអាយុ
- កើនទម្ងន់
៣.មានអត្រាខ្ពស់ប្រឈមនឹងជំងឺមហារីក
ការបង្កើនពន្លឺនៅក្នុងពេលយប់ នឹងធ្វើឲ្យអ្នកមានបញ្ហាក្នុងការគេងលក់ ហើយវាក៏មានទំនាក់ទំនងទៅនឹងការប្រឈមដ៏ខ្ពស់ទៅនឹងការកើតជំងឺមហារីកប្រភេទណាមួយ ។ ហើយភាគច្រើន គឺអាចជាជំងឺមហារីកដោះ និងក្រពេញប្រូស្តាត ។ មេឡាតូនីន ដែលត្រូវបានទប់ស្កាត់ដោយពន្លឺពណ៌ខៀវ ក៏ជាភ្នាក់ងារអង់ទីអុកស៊ីដង់ និងត្រូវចាត់ទុកថាមានអត្ថប្រយោជន៍ជាខ្លាំងចំពោះរាងកាយ ក្នុងការប្រឆាំងនឹងជំងឺមហារីក។
ការប្រើទូរសព្ទមុនគេងម្តងម្កាល ឬរយៈពេលខ្លីមុនពេលចូលគេង អាចនឹងមិនមានផលប៉ះពាល់ធ្ងន់ធ្ងរពេកទេ តែសម្រាប់អ្នកដែលតែងតែលេងវាជាប្រចាំ និងប្រើពេលជាច្រើនម៉ោងនោះ អាចនឹងប្រឈមនូវបញ្ហាណាមួយខាងលើនេះ ៕
ផ្តល់សិទ្ធិដោយ www.health.com.kh
© រក្សាសិទ្ធិដោយ thmeythmey.com