ពីនេះ ពីនោះ
ជឿលើសាសនា តែកុំធ្វើជាទាសកសាសនា
× ភ្នំពេញ៖ សាសនា គឺជាកម្លាំងជំនួសផ្នែកស្មារតី នៅពេលដែលមនុស្សមិនអាចយលដល់ នៅរឿងរាវនៅក្នុងលោក និងមាគ៌ាជីវិតរបស់ខ្លួនដែលខ្លួនមិនអាចមើលឃើញក្នុងពេលបច្ចុប្បន្ន អនាគត និងក្រោយពេលដែលែងមានអត្ថិភាពជីវិតនៅលើសកលលោកនេះ។ ព្រោះតែមិនអាចយល់បែបនេះហើយ ទើបមនុស្សបង្កើតសាសនា និងអាទិទេពតំណាងនូវទីតាំងនៃសេចក្ដីសុខ កន្លែងជោគជ័យ អ្នកផ្ដល់ពរគ្រប់បែបយ៉ាង និងចាត់ទុកថា សាសនាមានអាទិទេព ចាំជួយខ្លួនគ្រប់ពេលវេលា។
នៅក្នុងមាគ៌ា ឬ ច្បាប់ វិន័យ របស់សាសនានីមួយៗ សុទ្ធតែមានចែងពី ហេតុនិងផល នៃការគោរពប្រណិប័តន៍ចំពោះសាសនានោះ។ ប៉ុន្តែក្នុងនាមជាអ្នកដែលមានជំនឿទៅលើសាសនាទៅហើយ ត្រូវដឹងខ្លួនឯងថា ខ្លួនត្រូវតែជឿប្រកបដោយបញ្ញា។ សាសនាចង្អុលបង្ហាញផ្លូវត្រូវ ផ្លូវល្អ មាគ៌ាសន្តិភាព អហិង្សា ចេះជួយ ចេះគោរព ស្គាល់បុណ្យ ស្គាល់បាប ស្គាល់គុណ ស្គាល់ទោស អំពើល្អ អំពើអាក្រក់ និងស្គាល់ពីតម្លៃរបស់មនុស្ស។ ប៉ុន្តែនៅពេលដែលសាវកដែលមានជំនឿលើសាសនាមានបញ្ហា អាទិទេពនៅក្នុងសាសនាមិនដែលចេញមុខមកដោះស្រាយជូនឡើយ នោះគឺមានន័យថា អ្នកខ្លួនឯងជាអ្នកធ្វើសេចក្ដីសម្រេចលើវាសនា ដោយខ្លួនឯង។
មនុស្សគ្រប់រូបត្រូវចាំថា គ្មានអាទិទេពណាមួយឲ្យអាហារអ្នកបរិភោគឡើយ នៅពេលដែលអ្នកឃ្លាន។ នៅពេលអ្នកឈឺគ្មានអាទិទេព ឬបុគ្គលសំខាន់ណាមួយនៅក្នុងសាសនាណាមួយ មកជួយព្យាបាលជំងឺរបស់អ្នកឲ្យជាសះស្បើយឡើយ។ ប៉ុន្តែ មានតែអ្នកខ្លួនឯងទេ ដែលត្រូវតស៊ូក្នុងជីវិតខ្លួនឯងដើម្បីព្យាបាលថែរក្សាសុខភាពរបស់ខ្លួនដោយខ្លួនឯង។ នៅពេលដែលអ្នកធ្វើអំពើអាក្រក់ សាសនាមិនអាចជួយអ្នកបាននោះទេ ព្រោះនោះគឺជាអំពើអសីលធម៌មួយដែលអ្នកបានប្រព្រឹត្ត ហើយវានឹងតាមអន្ទោលវិញាណរបស់អ្នក តាមលងបន្លាចវិញាណ និងស្មារតីរបស់អ្នកជាប្រចាំ។ ប៉ុន្តែអាទិទេពមិនអាចមកបញ្ចប់ការលងបន្លាចទាំងនោះបានទេ ព្រោះអាទិទេពគ្រាន់តែជាអ្នកជួយខាងផ្នែកសីលធម៌ និងបំពេញភាពកកក្ដៅខាងផ្នែកផ្លូវអារម្មណ៍ដែលអ្នកបានសាងល្អប៉ុណ្ណោះ ។
ដូច្នេះ សូមកុំមានជំនឿសប់ គ្មានមូលដ្ឋានហេតុនិងផល ច្បាស់លាស់ និងប្រកបដោយបែបផែននៃវិចារណញ្ញាណ៕
© រក្សាសិទ្ធិដោយ thmeythmey.com