លោក ហោ ណាំហុង ចង់ឈប់ពីការងារទាំងអស់ ប៉ុន្តែសម្តេច ហ៊ុន សែន រក្សាទុកតំណែងឧបនាយករដ្ឋមន្ត្រី

ជាតិ

នយោបាយជាតិ

លោក ហោ ណាំហុង ចង់ឈប់ពីការងារទាំងអស់ ប៉ុន្តែសម្តេច ហ៊ុន សែន រក្សាទុកតំណែងឧបនាយករដ្ឋមន្ត្រី

04, Apr 2016 , 9:59 pm

រូបភាព

ដោយ: ថ្មីៗ

លោក ហោ ណាំហុង វ័យ៨០ឆ្នាំ បានបញ្ចប់មុខងារជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ដែលលោកបានកាន់កាប់តាំងពីឆ្នាំ១៩៩៨មក។ ប៉ុន្តែមុខងារជាឧបនាយករដ្ឋមន្ត្រីដែលត្រូវបានតែងតាំងចាប់ពីឆ្នាំ ២០០៤មក ត្រូវរក្សានៅដដែល។ ជាមួយគ្នានេះ លោកជាអ្នកតំណាងរាស្ត្រមណ្ឌលកំពង់ចាមផងដែរ។តំណែងលោក ហោ ណាំហុង ត្រូវបានជំនួសដោយ លោក ប្រាក់ សុខុន ដែលផ្ទេរពីក្រសួងប្រៃសណីយ៍ និងទូរគមនាគមន៍។

នាកិច្ចប្រជុំសភា កាលពីព្រឹកថ្ងៃទី៤ ខែមេសា សម្តេចនាយករដ្ឋមន្ត្រី ហ៊ុន សែន បានមានប្រសាសន៍ថា លោក ហោ ណាំហុង បានស្នើលាលែងពីការងារទាំងអស់ក្នុងរដ្ឋាភិបាល ប៉ុន្តែសម្តេចស្នើឲ្យរក្សាតំណែងឧបនាយករដ្ឋមន្ត្រី ដើម្បីផ្តល់ការប្រឹក្សាយោបល់នានា។

សូមស្តាប់ប្រសាសន៍សម្តេច ហ៊ុន សែន៖

ក្រៅពីលោក ហោ ណាំហុង ឥស្សរជននយោបាយជើងចាស់ពីររូបទៀត គឺ លោក គាត ឈន់ និងលោក អ៊ឹម ឈុនលឹម បាន ស្នើសុំបញ្ចប់មុខងាររបស់ខ្លួនពីស្ថាប័នជាតិ។ លោក គាត ឈន់ វ័យ៨១ឆ្នាំ បានបញ្ចប់មុខងារជាឧបនាយករដ្ឋមន្ត្រីប្រចាំការ។ លោកគឺជាអ្នកនយោបាយជើងចាស់ម្នាក់ ហើយបានកាន់កាប់តំណែងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុពីឆ្នាំ១៩៩៤ដល់ឆ្នាំ២០១៣ មុននឹងទទួលបានតំណែងជាឧបនាយករដ្ឋមន្ត្រីប្រចាំការ។ បច្ចុប្បន្នលោកក៏ជាអ្នកតំណាងរាស្ត្រមណ្ឌលភ្នំពេញ។

ដោយឡែក លោក អ៊ឹម ឈុនលឹម ដែលមានវ័យជិត៨០ឆ្នាំផងដែរនោះ បានបញ្ចប់មុខងារជាទេសរដ្ឋមន្ត្រី និងជារដ្ឋមន្ត្រីក្រសួងរៀបចំដែននដីនគរូបនីយកម្ម និងសំណង់ ដែលលោកបានកាន់កាប់អស់រយៈពេលជាច្រើនឆ្នាំ ហើយតំណែងរបស់លោកត្រូវបានជំនួសដោយលោក ជា សុផារ៉ា ដែលផ្ទេរពីក្រសួងអភិវឌ្ឍន៍ជនបទ។ លោក អ៊ឹម ឈុនលឹម ត្រូវបានជ្រើសតាំងជាសមាជិកក្រុមប្រឹក្សាធម្មនុញ្ញ តាមរយៈក្រុមប្រឹក្សានៃអង្គចៅក្រម៕