ការប្រកួតតាមពូលនៃដំណាក់កាលផ្តាច់ព្រ័ត្រពានរង្វាន់សម្តេច ហ៊ុន សែន ឆ្នាំ២០១៦ ប្រព្រឹត្តទៅនៅថ្ងៃពុធ ទី៦ ខែមេសា នេះ ដោយមានជំនួប៣គូនៅក្នុងពូល C និង៣គូនៅក្នុងពូល D។ ក្រុមនៅក្របខណ្ឌកំពូលមិត្តហ្វូនខេមបូឌានលីកចាប់ផ្តើមយុទ្ធនាការរបស់ខ្លួន ដោយវេស្ទើនភ្នំពេញ ប៉ះភ្នំពេញក្រោន ខណៈ ណាហ្គាវើល ស៊ីម៉ាក់ និងប៉ូលិស ជួបប្រកួតជាមួយក្រុមដែលឡើងពីវគ្គជម្រុះបឋម។
ក្នុងពូល C ជាជំនួបរវាងក្រុមនៅក្នុងក្របខណ្ឌកំពូលមិត្តហ្វូនខេមបូឌានលីក ដោយក្រុម វេស្ទើនភ្នំពេញ នឹងបើកទ្វារកីឡដ្ឋានរបស់ខ្លួន ស្វាគមន៍ក្រុមភ្ញៀវ ភ្នំពេញក្រោន ដែលទើបនឹងប៉ះគ្នាជាមួយលទ្ធផល ២-២ ក្នុងក្របខណ្ឌមិត្តហ្វូនខេមបូឌានលីក។ ក្រុមលេខ១ក្នុងពូល A ខេត្តកំពង់ស្ពឺ នឹងប្រើកីឡដ្ឋានរបស់ខ្លួនទទួលក្រុមលេខ២ក្នុងពូលE ខេត្តកំពត ក្រុមទាំងពីរនេះមកពីវគ្គជម្រុះបឋមដូចគ្នា។
នាការប្រកួតក្នុងពូល C ដដែល ពហុកីឡដ្ឋានជាតិ នឹងក្លាយជាទីតាំងនៃជំនួបរវាងក្រុមមជ្ឈមណ្ឌលកំចាត់មីនកម្ពុជា(ស៊ីម៉ាក់) និងក្រុមលេខ២ ពូល D នៃវគ្គជម្រុះបឋម ខេត្តប៉ៃលិន។
សម្រាប់ពូល D ក្រុមអគ្គស្នងការនគរបាលជាតិ(ប៉ូលិស) នឹងធ្វើដំណើរទៅកាន់ខេត្តព្រះវិហារ ដើម្បីជួបប្រកួតជាមួយក្រុមម្ចាស់ផ្ទះលេខ ៣ ពូល C នៃវគ្គជម្រុះបឋម ខេត្តព្រះវិហារ ខណៈក្រុមលេខ២ក្នុងពូល F នៃវគ្គចម្រុះបឋម នឹងប្រើកីឡដ្ឋានខេត្តក្រចេះ ដើម្បីស្វាគមន៍ក្រុមលេខ ១ ពូល C នៃវគ្គជម្រុះបឋមដូចគ្នា សៀមរាបអង្គរ។
ដោយឡែក ជើងឯករងរដូវកាល ២០១៥ ណាហ្គាវើល នឹងត្រូវជួបប្រកួតជាមួយក្រុមលេខ១ ពូល B នៃវគ្គជម្រុះបឋម ខេត្តស្វាយរៀង នៅពហុកីឡដ្ឋានជាតិ នាវេលាម៉ោង ៦លា្ងច៕
កម្មវិធីប្រកួតពានរង្វាន់សម្តេច ហ៊ុន សែន ថ្ងៃទី៦ ខែមេសា នេះ៖
ពូល C៖
-ម៉ោង៣:៣០-វេស្ទើនភ្នំពេញ ជួប ភ្នំពេញក្រោន នៅកីឡដ្ឋានវេស្ទើន
-ម៉ោង៣:៣០-ខេត្តកំពង់ស្ពឺ ជួប ខេត្តកំពត នៅកីឡដ្ឋានខេត្តកំពង់ស្ពឺ
-ម៉ោង៣:៣០-មជ្ឈមណ្ឌលកំចាត់មីនកម្ពុជា ជួប ខេត្តប៉ៃលិន នៅពហុកីឡដ្ឋានជាតិ
ពូល D៖
-ម៉ោង៣:៣០-ខេត្តក្រចេះ ជួប សៀមរាបអង្គរ នៅកីឡដ្ឋានខេត្តក្រចេះ
-ម៉ោង៣:៣០-ខេត្តព្រះវិហារ ជួប អគ្គស្នងការនគរបាលជាតិ នៅកីឡដ្ឋានខេត្តព្រះវិហារ
-ម៉ោង១៨:០០-ណាហ្គាវើល ជួប ខេត្តស្វាយរៀង នៅពហុកីឡដ្ឋានជាតិ