លោកស្រី ស៊ូជី ហាមមន្ត្រីសារធាណៈទទួលកាដូតម្លៃលើស២១ដុល្លារ

អន្តរជាតិ

លោកស្រី ស៊ូជី ហាមមន្ត្រីសារធាណៈទទួលកាដូតម្លៃលើស២១ដុល្លារ

05, Apr 2016 , 9:39 pm

រូបភាព

ដោយ: តន ចាន់រិទ្ធារ៉ា

លោកស្រី អ៊ុងសាន ស៊ូជី បានដាក់ចេញគោលការណ៍ប្រឆាំងអំពើពុករលួយដោយតម្រូវឲ្យមន្ត្រីសាធារណៈទាំងអស់មិនត្រូវទទួលកាដូដែលមានតម្លៃលើស២៥០០០ក្យាត (Kyat) ស្មើនឹង២១ដុល្លារនោះទេ។ វិធានការណ៍នេះក៏ហាមមន្ត្រីសាធារណៈក្នុងការចុះឈ្មោះជាសមាជិកក្លឹបវាយហ្គោលផងដែរ។ វិធានការណ៍ថ្មីត្រូវដាក់ចេញពីប៉ុន្មានថ្ងៃក្រោយការចូលកាន់តំណែងរបស់រដ្ឋាភិបាលមីយ៉ាន់ម៉ាដែលដឹកនាំដោយគណបក្សសម្ព័ន្ធជាតិដើម្បីប្រជាធិបតេយ្យ។

បន្ទាប់ពីចូលកាន់តំណែងមិនមួយសប្ដាហ៍ផង លោកស្រី អ៊ុងសាន ស៊ូជី បានដាក់ចេញពីវិធានការណ៍ប្រយុទ្ធប្រឆាំងអំពើពុករលួយ ដែលនេះជាការឆ្លើយតបនឹងការសន្យាប្រឆាំងអំពើពុករលួយក្នុងយុទ្ធនាការបោះឆ្នោតឆ្នាំ២០១៥។ ក្នុងនាមរដ្ឋមន្ត្រីការិយាល័យប្រធានាធិបតី លោកស្រី ស៊ូជី ប្រាប់មន្ត្រីសាធារណៈទាំងអស់មិនត្រូវទទួលកាដូមានតម្លៃលើស២៥០០០ក្យាត ស្មើនឹង២១ដុល្លារនោះទេ។

ជាមួយនឹងការដាក់ចេញវិធានការណ៍ថ្មី គេក៏មិនទាន់ដឹងពីសកម្មភាពផ្លូវច្បាប់ចំពោះជនល្មើសនោះទេ។ ប៉ុន្តែលោកស្រីក៏បញ្ជាក់ពីករណីលើកលែងចំពោះការចូលជួបគួរសមឬជួបជាមួយមន្ត្រីទូត ដែលពេលនោះ ពួកគេអាចទទួលកាដូបានតែត្រូវរាយការណ៍ឲ្យថ្នាក់លើឬក៏ផ្ដល់ជាសប្បុរសធម៌វិញ។ ចំណែកកាដូជាផ្កាឬផ្លែឈើដែលងាយរលួយ ត្រូវចែករំលែកជាមួយបុគ្គលិក។

សារព័ត៌មាន Myanmar Time ផ្សាយដែរថា វិធានការណ៍ថ្មីនឹងបែងចែកកាដូដែលត្រូវបានផ្ដល់សម្រាប់ការងារនិងកាដូដែលមានបំណងសូកប៉ាន់។ លុយ គ្រឿងមាសប្រាក់ សំបុត្រយន្តហោះ ការទទួលទានអាហារដោយសេរី ព្រមទាំងការចូលជាសមាជិកក្លឹបវាយហ្គោល សុទ្ធតែស្ថិតក្រោមវិធានការណ៍ថ្មីទាំងអស់។ មួយវិញទៀត មន្ត្រីសាធារណៈទាំងអស់មិនត្រូវទទួលកាដូពីស្ថាប័នឬបុគ្គលដែលចង់បានប្រយោជន៍ពីខ្លួននោះទេ ទោះជាកត្តាពាណិជ្ជកម្មឬអ្វីផ្សេងក៏ដោយ។

ជាកត់សម្គាល់ ការហាមទទួលកាដូតម្លៃលើស២៥០០០ក្យាតឬ២១ដុល្លារ គឺសម្រាប់តែការទទួលកាដូមួយលើកប៉ុណ្ណោះ។ បើតាមវិធានការណ៍ថ្មី ការទទួលកាដូប្រចាំឆ្នាំតម្លៃលើស១សែនក្យាតពីអង្គការនានាឬបុគ្គលដទៃទៀត ក៏ត្រូវហាមផងដែរ។ លោកស្រី ស៊ូជី ដែលជារដ្ឋមន្ត្រីការបរទេសផងនោះ ក៏បានកំណត់វិធានការណ៍ដោយឡែកសម្រាប់ក្រសួងនេះផងដែរ។ មន្ត្រីក្រសួងនេះអាចទទួលកាដូមានតម្លៃ៤សែនក្យាត និងកាដូដែលផ្ដល់ដោយមន្ត្រីទូតនានា ប្រសិនបើការបដិសេធ ធ្វើឲ្យទំនាក់ទំនងរវាងមីយ៉ាន់ម៉ានិងប្រទេសទាំងនោះល្អក់កករ។

នេះជាសកម្មភាពថ្មីមួយទៀតរបស់រដ្ឋាភិបាលថ្មីដើម្បីបង្ហាញពីភាពស្អាតស្អំរបស់ខ្លួន ខណៈអំពើពុករលួយកំពុងក្លាយជាមូលហេតុនៅពីក្រោយការាំងស្ទះការអភិវឌ្ឍ និងការធ្វើវិនិយោគ។ នៅក្នុងអាណត្តិរបស់អតីតប្រធានាធិបតីលោក ថេន សេន ក៏ធ្លាប់មានការកំណត់តម្លៃកាដូដែលត្រូវទទួលដូចគ្នា តែមន្ត្រីពេលនោះអាចទទួលកាដូដែលមានតម្លៃបីសែនក្យាត។ យ៉ាងណាក្ដី ស្ថានភាពអំពើពុករលួយនៅតែមានកម្រិតធ្ងន់ធ្ងរក្នុងប្រទេសមួយនេះ ដែលមានចំណាត់ថ្នាក់១៤៧ក្នុងចំណោម១៦៨ប្រទេសនៃតារាងសន្ទស្សន៍អំពើពុករលួយរបស់អង្គការតម្លាភាពអន្តរជាតិ៕