ជាតិ
លោក ហោ ណាំហុង៖ ការប្រើពាក្យមិនគួរសមខ្លះលើមន្ត្រីដោយសារសម្ពាធការងារ
× លោក ហោ ណាំហុង ឧបនាយករដ្ឋមន្ត្រីបានសុំការអធ្យាស្រ័យចំពោះការប្រើពាក្យសម្តីមិនគួរសមខ្លះ ទៅកាន់មន្ត្រីរបស់ខ្លួន នៅពេលដែលលោកកាន់តំណែងជារដ្ឋមន្ត្រីក្រសួងការបរទេស និងសហប្រតិបត្តិការកន្លងមក។
នាពិធីផ្ទេរតំណែងរដ្ឋមន្ត្រីក្រសួងការបរទេសថ្មី ទៅឲ្យលោក ប្រាក់ សុខុន នារសៀលថ្ងៃទី៥ខែមេសា លោកហោ ណាំហុង បានថ្លែងថា៖«ខ្ញុំក៏សូមលោកជំទាវ ឯកឧត្តម លោក លោកស្រី នាងកញ្ញា មេត្តាអធ្យាស្រ័យឲ្យខ្ញុំដែលនៅពេលខ្លះបានប្រើពាក្យមិនគួរសមខ្លះ ចំពោះលោកជំទាវ ឯកឧត្តម លោក លោកស្រី នាងកញ្ញា កន្លងមក»។ លោកបានបន្តដោយពន្យល់ពីមូលហេតុនៃការប្រើពាក្យពេចន៍មិនសមរម្យទាំងនោះថា៖«នេះគឺពុំមែនជាចេតនាខ្ញុំទេ តែខ្ញុំសង្ឃឹមថា លោកជំទាវ ឯកឧត្តម លោក លោកស្រី នាងកញ្ញា យល់ថានេះ គឺបណ្តាលមកពី សម្ពាធការងារ ដូចលោកជំទាវ ឯកឧត្តម លោក លោកស្រី នាងកញ្ញាបានឃើញជាសក្ខីកម្មស្រាប់»។
ក្រៅពីសុំការអធ្យាស្រ័យ លោកក៏មិនភ្លេចរំឮកពីកិច្ចការងារដែលលោកបានបំពេញអស់រយៈ៣៧ឆ្នាំមកហើយនោះ។ លោកបញ្ជាក់ថា ក្នុងរយៈពេលជាង៣ទស្សវត្សរ៍នេះ លោកបានខិតខំអស់ពីកម្លាំងកាយ និងស្មារតីបម្រើជាតិ និងជាតិ បំពេញភារកិច្ចដែល សម្តេចនាយករដ្ឋមន្ត្រីហ៊ុន សែន ប្រគល់ឲ្យ ដោយពុំបានធ្វើអ្វីឲ្យប៉ះពាល់ដល់ផលប្រយោជន៍ជាតិ និងបក្សឡើយ។
មុនពេលបញ្ចប់សុន្ទរកថា លោក ហោ ណាំហុង ជឿជាក់ថា លោក ប្រាក់ សុខុន នឹងសម្រេចបានលទ្ធផលដ៏សំខាន់ៗថែមទៀត ក្នុងតំណែងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ។ ជាមួយគ្នានោះ លោក ក៏អំពាវនាវឲ្យមន្ត្រីរបស់ក្រសួងការបរទេសទាំងអស់ បន្តខិតខំបំពេញភារកិច្ច ក្រោមការដឹកនាំរបស់លោកប្រាក់ សុខុន រកផលប្រយោជន៍ជូនជាតិ ការពារកិត្តិយស កិត្យានយភាព និងផ្សព្វផ្សាយការរីកចម្រើនដ៏ធំធេងរបស់ជាតិយើងលើគ្រប់វិស័យ៕
Tag:
ហោ ណាំហុង
ប្រាក់ សុខុន
© រក្សាសិទ្ធិដោយ thmeythmey.com