ពីនេះ ពីនោះ
លោក ជា សុផារ៉ា សូមជួយដោះស្រាយការចតរថយន្តរំលោភលើចំណីផ្លូវមុខក្រសួងផង!
នេះជារូបដែល google map ថតតាំងពីឆ្នាំ២០១៤ ប៉ុន្តែមកដល់ពេលនេះ មិនសូវមានការខុសប្លែកប៉ុន្មានឡើយ
×![]()
ដោយ: ថ្មីៗ
វាជារឿងគួរឲ្យហួសចិត្ត ដែលក្រសួងដែនដី នគរូបនីយកម្ម និងសំណង់ ឬគេហៅសាមញ្ញថា ក្រសួងគ្រប់គ្រងដែនដីនោះ បែរជាគ្មានដីគ្រប់គ្រាន់ឲ្យបុគ្គលិកចតរថយន្ត។ មនុស្សមិនតិចទេដែលធុញទ្រាន់នឹងការកកស្ទះចរាចរណ៍នៅមុខក្រសួងមួយនេះ។
លោក ជា សុផារ៉ា ដែលជាមន្ត្រីដ៏ល្បីល្បាញ និងដ៏មានប្រជាប្រិយម្នាក់ក្នុងការរៀបចំរាជធានីភ្នំពេញ នៅពេលដែលធ្វើជាអភិបាលនោះ ទើបតែឡើងកាន់តំណែងជាផ្លូវការជារដ្ឋមន្ត្រីក្រសួងដែនដី នគរូបនីយកម្ម និងសំណង់ បន្តពីលោក អ៊ឹម ឈុនលឹម កាលពីថ្ងៃទី៥ ខែមេសា។
កន្លងមក អ្នកដំណើរតែងតែត្អូញត្អែរចំពោះការកកស្ទះចរាចរណ៍នៅមុខក្រសួង ដោយសារមានរថយន្តចតពេញផ្លូវ ពោលគឺលើផ្លូវថ្មើរជើង បើទោះបីជារយៈពេលចុងក្រោយនេះ គេសង្កេតឃើញមានការដាក់សញ្ញា «ហាមចត» ក៏ដោយ។
ផ្លាកសញ្ញា «ហាមចត» អាចមានប្រសិទ្ធភាពខ្លះនៅមុខក្រសួង តែនៅលើផ្លូវម្ខាងទៀត គេសង្កេតឃើញរថយន្តនៅតែមានការចតពាសពេញផ្លូវដដែល ហើយមួយចំនួនជារថយន្តរបស់មន្ត្រីដែលធ្វើការនៅទីនោះ។ រឿងតូចតាចបែបនេះ ប្រហែលជាមិនពិបាកខ្លាំងនោះឡើយសម្រាប់លោក ជា សុផារ៉ា។
គេសង្ឃឹមថា លោក ជា សុផារ៉ា ដែលជាមន្ត្រីដ៏គំរូម្នាក់នឹងដោះស្រាយបញ្ហានេះ ដើម្បីកុំមានការរិះគន់ ក្រសួងដែលទទួលបន្ទុករៀបចំដែនដី បែរជាមិនអាចមានគ្រប់គ្រងសណ្តាប់ធ្នាប់នៅមុខក្រសួងខ្លួន។ មន្ត្រីខ្មែរក៏គួរឲ្យប្រើប្រាស់សេវារថយន្តសាធារណៈផងដែរ ដើម្បីកាត់បន្ថយការកកស្ទះចរាចរណ៍ និងលើកកម្ពស់សេវារថយន្តសាធារណៈ៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 4 ថ្ងៃ
