វិស័យកីឡាយានយន្តកម្ពុជាទទួលបានជំនួយពីថៃក្នុងការពង្រឹងសមត្ថភាពឲ្យកាន់តែខ្លាំង

កីឡាជាតិ

ជាតិ

វិស័យកីឡាយានយន្តកម្ពុជាទទួលបានជំនួយពីថៃក្នុងការពង្រឹងសមត្ថភាពឲ្យកាន់តែខ្លាំង

06, Apr 2016 , 7:39 pm

រូបភាព

ដោយ:

សហព័ន្ធកីឡាយានយន្តកម្ពុជា នឹងទទួលបានការបណ្តុះបណ្តាលកីឡាករកីឡាការិនី មន្ត្រីបច្ចេកទេស និងមន្ត្រីជំនាញក្នុងការត្រួតពិនិត្យយានយន្ត ដើម្បីពង្រឹងសមត្ថភាពក្នុងការប្រកួតផ្សេងៗ និងជួយអភិវឌ្ឍន៍វិស័យមួយនេះឲ្យកាន់តែខ្លាំង។ នេះបើយោងតាមការចុះអនុសារណៈនៃការយោគយល់រវាង លោក មៀច សុផាន់ណា និងភាគីថៃ លោក Banphot Hongthong កាលពីល្ងាចថ្ងៃទី៥ ខែមេសា នៅ NOCC។

លោក មៀច សុផាន់ណា ប្រធានសហព័ន្ធកីឡាយានយន្តកម្ពុជា និងលោក Banphot Hongthong ប្រធានសមាគមរាជយានយន្តនៃប្រទេសថៃ បានចុះហត្ថលេខាលើអនុសារណៈនៃការយោគយល់(MOU)មួយ ក្នុងគោលបំណង ដើម្បីរឹតចំណងមិត្តភាពរវាងសហព័ន្ធទាំងពីរ លើកិច្ចសហប្រតិបត្តិការណ៍នានា ទាក់ទងទៅនឹងវិស័យកីឡាយានយន្ត និងវិស័យទេសចរណ៍យានយន្ត ដែលស្ថិតក្រោមក្របខណ្ឌនៃសហព័ន្ធយានយន្តអន្តរជាតិ(FIA)។

លោក មៀច សុផាន់ណា បានបញ្ជាក់ថា តាមរយៈការចុះអនុសារណៈនេះសហព័ន្ធទាំងពីរនឹងធ្វើការដោះដូរបទពិសោធន៍ផ្នែក មន្ត្រីបច្ចេកទេស អ្នកជំនាញត្រួតពិនិត្យយានយន្ត ការបណ្តុះបណ្តាលកីឡាករកីឡាការិនីប្រណាំងយានយន្ត។ ការធ្វើបែបនេះក្នុងគោលបំណង ដើម្បីអភិវឌ្ឍន៍វិស័យកីឡាយានយន្ត ចរាចរណ៍យានយន្ត និងទេសចរណ៍ ឲ្យកាន់តែមានសុវត្ថិភាព និងការការពារបិរស្ថានប្រកបដោយស្មារតីមិត្តភាព និងការយោគយល់។

លោកបន្តថា វិស័យកីឡាយានយន្តមិនត្រឹមតែជួយជំរុញវិស័យកីឡាប៉ុណ្ណោះទេ ព្រមទាំងជួយជំរុញដល់វិស័យនានាថែមទៀតផង ដូចជាវិស័យទេសចរណ៍ ទំនៀមទំលាប និងប្រពៃណី តាមរយៈការចូលរួមប្រកួត ក៏ដូចជាទស្សនារបស់បណ្តាប្រទេសផ្សេងៗ។

លោកប្រធានសហព័ន្ធរូបនេះបានបន្តថា សហព័ន្ធកីឡាយានយន្តកម្ពុជា និងភាគីថៃ ធ្លាប់បានផ្លាស់ប្តូរបទពិសោធន៍ ក៏ដូចជាព្រឹត្តិការណ៍ មុនការចុះអនុសារណៈនៃការយោគយល់នេះទៅទៀត គឺតាមរយៈការបញ្ចូនកីឡាករកីឡាការិនីចូលរួមប្រកួត និងការបង្កើតព្រឹត្តិការណ៍ប្រកួតនៅកម្ពុជា ថៃ។ ហើយក្រៅពីប្រទេសថៃ កម្ពុជា នឹងធ្វើសហប្រតិបត្តិការណ៍ជាមួយប្រទេសដែលមានបទពិសោធន៍ និងបានដើរមុនក្នុងវិស័យនេះ ដូចជា វៀតណាម ម៉ាឡេស៊ី សិង្ហបុរី និងប្រទេសជប៉ុន៕