ការងារឧបនាយករដ្ឋមន្ត្រី និងទេសរដ្ឋមន្ត្រី ទទួលបន្ទុកបេសកកម្មពិសេសមួយចំនួន

ជាតិ

នយោបាយជាតិ

ការងារឧបនាយករដ្ឋមន្ត្រី និងទេសរដ្ឋមន្ត្រី ទទួលបន្ទុកបេសកកម្មពិសេសមួយចំនួន

06, Apr 2016 , 8:39 pm

រូបភាព

ដោយ: រួបរួម

សម្តេចនាយករដ្ឋមន្ត្រី ហ៊ុន សែន កាលពីថ្ងៃទី៥ ខែមេសា បានចេញសេចក្តីសម្រេចស្តីពីការកែសម្រួលរបៀបរបបការងារ និងការបែងចែកភារកិច្ចរបស់ឧបនាយករដ្ឋមន្ត្រី ទេសរដ្ឋមន្ត្រី ដែលទទួលបន្ទុកបេសកកម្មពិសេស។

យោងតាមសេចក្តីសេចក្តី លោក ហោ ណាំហុង ដែលទើបតែចាកចេញពីតំណែងរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ហើយនៅមានតួនាទីជាឧបនាយករដ្ឋមន្ត្រីនោះ ទទួលបន្ទុកផ្តល់យោបល់នាយករដ្ឋមន្ត្រីអំពីក្របខណ្ឌគោលនយោបាយក្រៅប្រទេស និងការងារផ្សេងទៀតដែលនាយករដ្ឋមន្ត្រីប្រគល់ជូន។

លោក ប៊ិន ឈិន ឧបនាយករដ្ឋមន្ត្រីប្រចាំការ មានតួនាទីដោះស្រាយការងារប្រចាំថ្ងៃជំនួសនាយករដ្ឋមន្ត្រី ក្នុងការពិនិត្យ និងសម្រេចលើការងារ «ច្រកចេញ-ចូលតែមួយ» នៃក្រុមប្រឹក្សាអភិវឌ្ឍន៍កម្ពុជា ការពិនិត្យ និងសម្រេចលើសំណើស្មុំកូន និងការសុំលាសញ្ជាតិ និងដឹកនាំផ្ទាល់អាជ្ញាធរជាតិដោះស្រាយទំនាស់ដីធ្លី ថែមទាំងជួយនាយករដ្ឋមន្ត្រីលើការងារបង្ការ ទប់ស្កាត់ និងប្រឆាំងអំពើពុករលួយ។

ចំពោះទេសរដ្ឋមន្ត្រី ទទួលបន្ទុកបេសកកម្មពិសេស លោក សេរី កុសល មានតួនាទីជាអនុប្រធានទី១ អាជ្ញាធរកម្ពុជាគ្រប់គ្រងសកម្មភាពកម្ចាត់មីន និងសង្គ្រោះជនពិការដោយសារមីន រីឯលោក លី ធុច ជាអនុប្រធានទី២ ។ បន្ថែមពីលើនេះ លោក លី ធុច ក៏ទទួលបន្ទុកជាអនុប្រធានទី២ នៃគណៈកម្មាធិការជាតិគ្រប់គ្រងគ្រោះមហន្តរាយ និងជាប្រធានគណៈកម្មាធិការជាតិ ESCAP ផងដែរ។

រីឯទេសរដ្ឋមន្ត្រីបីរូបទៀត លោក ជិន ប៊ុនស៊ាន ទទួលបន្ទុកជាអនុប្រធានក្រុមប្រឹក្សាអភិវឌ្ឍន៍កម្ពុជា លោក មិន ឃិន ទទួលបន្ទុកជាអនុប្រធានគណៈកម្មាធិការរៀបចំបុណ្យជាតិ និងអន្តរជាតិ ហើយជួយនាយករដ្ឋមន្ត្រីអំពីការងារវប្បធម៌ ខណៈអតីតប្រធានគណៈកម្មាធិការជាតិរៀបចំការបោះឆ្នោត លោក អ៊ឹម សួស្តី មានតួនាទីជាអនុប្រធានអាជ្ញាធរជាតិដោះស្រាយទំនាស់ដីធ្លី។

ឧបនាយករដ្ឋមន្ត្រី១រូបៗ មានទីប្រឹក្សា៤រូប (២រូបឋានៈស្មើរដ្ឋលេខាធិការ និង២រូបឋានៈស្មើអនុរដ្ឋលេខាធិការ) និងជំនួយការ៥រូប (១រូបឋានៈស្មើអគ្គនាយក ២រូបឋានៈស្មើអគ្គនាយករង និង២រូបឋានៈស្មើប្រធាននាយកដ្ឋាន) រីឯទេសរដ្ឋមន្ត្រីទទួលបន្ទុកបេសកកម្មពិសេស មានជំនួយការ៥រូប (២រូបឋានៈស្មើអគ្គនាយក ១រូបឋានៈស្មើអគ្គនាយករង និង២រូបឋានៈស្មើប្រធាននាយកដ្ឋាន)៕