ប្រពន្ធល្អ តែងតែធ្វើឲ្យប្តី រីករាយសប្បាយចិត្ត។ ងារជាប្រពន្ធល្អ មិនមែនងាយស្រួលធ្វើឡើយ ប៉ុន្តែ បើអ្នកចង់ វាក៏មិនពិបាកដែរ។ បើអ្នកធ្វើល្អ ចំពោះស្វាមីរបស់អ្នក ពិតណាស់ គេប្រាកដជាស្រឡាញ់ និងថ្នាក់ថ្នមអ្នក ជាងអ្នកស្រឡាញ់គេទៅទៀត។
ចង់ដឹងពីវិធីសាស្ត្រ ដើម្បីធ្វើឲ្យ ស្វាមីរបស់អ្នក រីករាយមែនទេ? ចូរស្វែងរកគុណសម្បត្តិរបស់អ្នក តាមរយៈគន្លឹះខាងក្រោមនេះ ៖
១. ធ្វើជាមនុស្សរួសរាយ រីករាយ និងសប្បាយចិត្ត
បើចង់ឲ្យប្តីអ្នកស្រឡាញ់ អ្នកត្រូវបង្ហាញនូវកាយវិការរាក់ទាក់ រួសរាយ និងមិនមើលងាយប្តី។ ព្យាយាមយកចិត្តទុកដាក់ និងបំពេញចិត្តស្វាមីខ្លួន ជាពិសេស ពេលគេជួបទុក្ខលំបាក។
២. គោរពប្តី
បើអ្នកចង់ឲ្យប្តីគោរព អ្នកត្រូវគោរពប្តីវិញដែរ។ ជាប្តីម្នាក់ ពិតណាស់ គេមិនចង់ឲ្យប្រពន្ធ មើលងាយ ឬបង្ហាញកាយវិការ មិនសមរម្យណាមួយ ចំពោះមិត្តភក្តិ ឬក្រុមគ្រួសារគេឡើយ។
៣. ទំនាក់ទំនង
ទំនាក់ទំនង គឺជាកូនសោរសំខាន់ សម្រាប់ជីវិតគូ ដូច្នេះ អ្នកត្រូវចេះបើកទូលាយ កុំលាក់លៀម និងសួរនូវអ្វីដែលឆ្ងល់។ ភាពស្មោះត្រង់ ក៏ជាដង្ហើមរស់ របស់អាពាហ៍ពិពាហ៍។
៤. គាំទ្រ
ក្នុងនាមជាប្រពន្ធ អ្នកត្រូវចេះគាំទ្រ ការសម្រេចចិត្ត និងការងាររបស់ស្វាមី ប៉ុន្តែ អ្នកក៏ត្រូវស្វែងយល់ អំពីរឿងហេតុនោះ ឲ្យបានច្បាស់លាស់ដែរ។ ហើយបើអ្នកយល់ថា មិនសមរម្យ អ្នកអាចពន្យល់ប្រាប់ស្វាមី ដោយសន្សឹមៗ និងចិត្តត្រជាក់ មិនមែនប្រកែក យកឈ្នះឡើយ ទោះបីជាអ្នក ត្រូវក៏ដោយ។
៥. កុំនិយាយច្រំដែល
មនុស្សប្រុសស្អប់បំផុត គឺការនិយាយច្រំដែល ម្តងហើយម្តងទៀត។
៦. ផ្តល់កន្លែងទំនេរ ឬពេលវេលាផ្ទាល់ខ្លួន
អ្នកមិនចាំបាច់ ដើរតាមប្តីរហូតនោះទេ។ ស្វាមីអ្នកមានគ្រួសារ មានមិត្តភក្តិ និងមិត្តរួមការងារ ដូច្នេះ ចូរផ្តល់ពេលវេលាខ្លះ សម្រាប់ស្វាមី ដើម្បីរីករាយ ជាមួយគ្នីគ្នារបស់គេផង។ ហើយអ្នកក៏ដូច្នេះដែរ។
៧. រឿងលើគ្រែ គួរតែឥតខ្ចោះ
ជីវិតសិច ដូចជីវិតស្នេហា បើកាលណាធ្លាក់ចុះហើយ ធានាថា រឿងរ៉ាវគ្រួសារ អាចនឹងកើតឡើង គ្រប់ពេលវេលាទាំងអស់៕
ត្រួតពិនិត្យដោយ www.health.com.kh