ពីនេះ ពីនោះ
នយោបាយជាតិ
តើនរណាជាអ្នកធ្វើឲ្យវប្បធម៌សន្ទនាប្រេះឆា? CPP ឬ CNRP?
× ភ្នំពេញ៖ នៅក្នុងប្រវត្តិនយោបាយកម្ពុជា គឺទើបតែនៅក្នុងអាណត្តិទី៥កន្លងមកនេះទេ ដែលគណបក្សប្រឆាំង និងគណបក្សកាន់អំណាចបានបង្កើតទស្សនៈមួយដែលគេហៅថា«វប្បធម៌សន្ទនា»។ នេះគឺជាទស្សនទានថ្មីមួយដែលត្រូវបានអ្នកខ្លះសាទរផង រីឯអ្នកខ្លះទៀត រិះគន់ទៅវិញ។ តែទោះជាយ៉ាងណាក៏ដោយ ក៏វប្បធម៌សន្ទនាកើតឡើងបានតែក្នុងរយៈពេលមួយខ្លីប៉ុណ្ណោះ។ តើភាគីណាជាអ្នកធ្វើឡើងវប្បធម៌សន្ទនាប្រេះឆា?
សូមអញ្ជើញស្តាប់បទសម្ភាសន៍ខ្លីជាភាសាបារាំងរវាងលោក គី សុខលីម អគ្គនាយកសារព័ត៌មានអេឡិចត្រូនិកថ្មីៗ និងលោក Raoul-Marc Jennar បច្ចុប្បន្នជាទីប្រឹក្សានៃរាជរដ្ឋាភិបាលកម្ពុជា ដូចតទៅ៖
នេះគឺជាសំណួរដែលគេពិបាករកចម្លើយពិតប្រាកដណាស់។ ប៉ុន្តែបើយោងតាមលោក Raoul-Marc Jennar បច្ចុប្បន្នជាទីប្រឹក្សានៃរាជរដ្ឋាភិបាលកម្ពុជា ការប្រេះឆានៃវប្បធម៌សន្ទនាអាចបណ្តាលមកពីភាគីឯកឧត្តម សម រង្ស៊ី ប្រធានគណបក្សសង្គ្រោះជាតិ។ ទីប្រឹក្សារាជរដ្ឋាភិបាលជនជាតិបរទេសរូបនេះ បានរម្លឹកថា គ្រួសារឯកឧត្តម សម រង្ស៊ី បានអញ្ជើញទៅពិសាអាហារជាមួយគ្រួសារសម្តេចនាយករដ្ឋមន្ត្រីក្នុងន័យមិត្តិភាពល្អបំផុត ដូចជា ថតសែលហ្វីជាមួយគ្នា។ល។ នៅទីក្រុងភ្នំពេញ ប៉ុន្តែបន្ទាប់ពីនេះទៅ នៅក្រៅប្រទេស ឯកឧត្តម សម រង្ស៊ី បាននិយាយនៅកាន់សារព័ត៌មានបរទេសថា សម្តេចនាយករដ្ឋមន្ត្រី គឺជាជនបផ្តាច់ការ។
ផ្តោតលើទង្វើនេះ លោក Raoul-Marc Jennar អត្ថាធិប្បាយថា៖«មិនមានភក្តីភាព ហើយអានេះមិនមែនវប្បធម៌សន្ទនាទេ»។ លោក Raoul-Marc Jennar និយាយបន្តទៀតថា លោកអាចយល់បានថា ហេតុអ្វីបានជាសម្តេចនាយករដ្ឋមន្ត្រី ហ៊ុន សែន ខឹងនឹងរឿងនេះ ពីព្រោះ សម្តេច ហ៊ុន សែន បានបង្ហាញបំណងល្អទទួលទានអាហាររួមគ្នាជាមួយគ្រួសារឯកឧត្តម សម រង្ស៊ី តែបន្ទាប់មកសម្តេចមើលកាសែត Liberation បារាំង បែរជាឯកឧត្តមប្រមាថ និងបង្ខូចកេរ្តិ៍សម្តេចទៅវិញ។ លោក Raoul-Marc Jennar បានបន្តទៀតថា៖«មិនត្រូវមានភាសាមួយនៅភ្នំពេញ និងភាសាផ្សេងទៀតនៅទីក្រុងប៉ារីស ឬនៅទីក្រុងវ៉ាស៊ីនតោនឡើយ។ ត្រូវនិយាយភាសាតែមួយ»។ លោក Raoul-Marc Jennar បានរម្លឹកទៀតថា លោកគឺជាបុគ្គលទី១ដែរ ដែលអបអរសាទរគំនិតបង្កើតវប្បធម៌សន្ទនា ព្រោះថា បើភាគីទាំងពីរប្រឈមមុខដាក់គ្នា ឈ្លោះគ្នា វានឹងនាំឲ្យមានការគុំកួន ការសងសឹក ឬអនុស្សាវរីយ៍មិនល្អ។ «វប្បធម៌សន្ទនា គឺជាគំនិតល្អ។ ប៉ុន្តែ វប្បធម៌សន្ទានាត្រូវតែគោរពគោលការណ៍មួយចំនួន»។ នេះគឺជាអ្វីដែលលោក Raoul-Marc Jennar លើកឡើងបន្ថែមទៀត។
ឆ្លើយតបទៅនឹងអ្វីដែលលោក Raoul-Marc Jennar លើកឡើងនោះ លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានអត្ថាធិប្បាយជាលក្ខណៈទូទៅថា លោកមិនចង់ស្វែងរកថា តើនរណាជាអ្នកបង្កឲ្យប្រេះឆាវប្បធម៌សន្ទនានោះទេ។ តែលោកបង្ហាញអារម្មណ៍ចង់ឲ្យវប្បធម៌សន្ទនាកើតឡើងវិញ។ វប្បធម៌សន្ទនាកើតឡើងវិញ, បើតាមលោក យឹម សុវណ្ណ, កើតឡើងសម្រាប់ថ្ងៃនេះ ថ្ងៃស្អែក និងថ្ងៃអនាគត។ លោកបញ្ជាក់ថា៖«យើងត្រូវការការសន្ទនា យើងមិនត្រូវការសង្គ្រាមនោះទេ។ យើងចង់បានវប្បធម៌សន្ទនាដែលឈរលើគោលការណ៍យុត្តិធម៌ ពោលគឺមិនមែនវប្បធម៌សន្ទនាបិទភ្នែក ឬបិទត្រចៀកបក្សប្រឆាំងនោះទេ»។
សូមបញ្ជាក់ថា កាលពីឆ្នាំមុន តាមរយៈវប្បធម៌សន្ទនា សម្តេចនាយករដ្ឋមន្ត្រី ហ៊ុន សែន និងឯកឧត្តម សម រង្ស៊ី មានវត្តមានរួមគ្នានៅក្នុងពិធីអង្គរសង្ក្រាន្តនៅក្នុងខេត្តសៀមរាប។ តែនៅឆ្នាំនេះ ឯកឧត្តម សម រង្ស៊ី នឹងអវត្តមានដោយសារតែឯកឧត្តមហ៊ុំព័ទ្ធទៅដោយបណ្តឹងផ្សេងៗ៕
© រក្សាសិទ្ធិដោយ thmeythmey.com