អន្តរជាតិ
នយោបាយអន្តរជាតិ
លោក ជុងអ៊ុន ប្រកាសបាញ់រុកក្កែតបាលីស្ទីកអន្តរទ្វីបដោយជោគជ័យ
×
បើទោះជាបីសហគមន៍អន្តរជាតិ បន្តដាក់ទណ្ឌកម្មធ្ងន់ធ្ងរប្រឆាំងនឹងកូរ៉េខាងជើងយ៉ាងណាក៏ដោយ វិធានការក្តៅនោះ មិនបានធ្វើឲ្យមេដឹកនាំកំពូលលោក គីម ជុងអ៊ុន បញ្ឈប់មហិច្ឆតាអភិវឌ្ឍន៍កម្មវិធីនុយក្លេអ៊ែរដែរ។ ហើយនេះ លោក ក៏បានប្រកាសពីការបាញ់សាកល្បងដោយជោគជ័យនូវមីស៊ីលប្រភេទថ្មី មួយទៀត។
លោកប្រធានាធីបតីកូរ៉េខាងជើង គីម ជុងអ៊ុន បានប្រកាសពីភាពជោគជ័យជាថ្មីក្នុងការបាញ់សាកល្បងប្រភេទថ្មីនៃរុកក្កែតបាលីស្ទីកអន្តរទ្វីប នៅឯមូលដ្ឋាន Sohae Space ដែលមានទីតាំងនៅភាគខាងជើងនៃខេត្ត Pyangan នៃប្រទេសកូរ៉េខាងជើង។ ។ នេះបើយោងតាមការរាយការណ៍របស់ភ្នាក់ងារព័ត៌មានកូរ៉េខាងជើង KCNA នៅផ្សាយបន្តដោយសារព័ត៌មានចិន People’s Daily នៅថ្ងៃទី០៩ ខែមេសានេះ។
ការបាញ់សាកល្បងនេះ បានបង្ហាញពីភាពជោគជ័យ និងជារឿងគួរកត់សម្គាល់មួយក្នុងការពង្រឹងឥទ្ធិពលយោធា និងសមត្ថភាពការពារជាតិផងដែរ។ នេះបើយោងតាមប្រភពព័ត៌មានដដែលដែល បានបន្ថែមដែលថា កម្លាំងនៃរុកក្កែតបាលីស្ទីកអន្តរទ្វីបនោះ ក៏ស្ថិតនៅក្នុងស្តង់ដារនៃចំណាត់ថ្នាក់វិទ្យាសាស្ត្រ និងបច្ចេកវិទ្យាសកលផងដែរ។
ជុំវិញការបាញ់សាកល្បងនេះដែរ ប្រមុខកំពូលកូរ៉េខាងជើង លោក គីម ជុងអ៊ុនក៏បានសម្តែងរីករាយ ចំពោះភាពជោគជ័យនេះដែរ ដោយលោកបានថ្លែងថា ជោគជ័យនោះ ក៏បានបង្ហាញពីភាពរឹងម៉ាំរបស់ កូរ៉េខាងជើងក្នុងទម្រង់មួយដែលអាចវាយប្រហារចក្រពត្តិអាមេរិក។ លោក ក៏បានបន្ថែមដែរថា ពេលនេះកូរ៉េខាងជើងអាចមានលទ្ធភាពបាញ់រុកក្កែតបាលីស្ទីកអន្តរទ្វីបជាមួយនឹងអាវុធនុយក្លេអ៊ែរ និងអាច តម្រង់ទៅអាមេរិកបានហើយ។
សូមញ្ជាក់ផងដែរថា ក្នុងដើមឆ្នាំ២០១៦នេះ កូរ៉េខាងជើង បានបាញ់សាកល្បងមីស៊ីល និងអាវុធបរមា ណូរបស់ខ្លួនម្តងហើយម្តងហើយ ដែលផ្គើននឹងបម្រាមរបស់សហគមន៍អន្តរជាតិ។ ហើយនៅថ្ងៃទី០២ ខែមីនាកន្លងទៅ ក្រុមប្រឹក្សាសន្តិសុខអង្គការសហប្រជាតិ បានអនុម័តជាឯកច្ឆ័នលើសេចក្តីសម្រេចថ្មីមួយទៀតប្រឆាំងសកម្មភាពដ៏គឃ្លើនរបស់កូរ៉េខាងជើងក្នុងការបាញ់សាកល្បងគ្រាប់បែកមីស៊ីលតាំងពីឆ្នាំ២០១៤ និង២០១៥ និងជាពិសេសនោះការបាញ់គ្រាប់បែកបរមាណូនៅថ្ងៃទី០៦ ខែមករា និងនៅថ្ងៃទី០៧ ខែកុម្ភៈ ឆ្នាំ២០១៦នេះ។ សេចក្តីសម្រេចលេខ២២៧០ ដែលបានបញ្ញាត្តិ៥២ចំណុចនោះ ត្រូវបានចាត់ទុកថាជាទណ្ឌកម្មមួយដ៏ធ្ងន់ធ្ងរបន្ថែមលើទណ្ឌកម្មដែលបានអនុម័តដោយក្រុមប្រឹក្សាសន្តិសុខកន្លងមក។
អ្វីគួរកត់សម្គាល់នោះសូម្បីតែរដ្ឋាភិបាលក្រុងប៉េកាំងដែលធា្លប់ជាសម្ព័ន្ធមិត្តជិតស្និទនឹងគ្នា ក៏បានប្រកាសអនុវត្តទណ្ឌកម្មសេដ្ឋកិច្ចប្រឆាំងនឹងសកម្មភាពដ៏គឃ្លើនរបស់ក្រុងព្យុងយ៉ាងផងដែរ។ រដ្ឋាភិបាលក្រុងប៉េកាំង នៅថ្ងៃទី០៥ ខែមេសា កន្លងទៅ បានប្រកាសរឹតត្បិតលើការនាំចូលដោយ ហាមមិនឲ្យមានការទិញធ្យូងថ្ម មាស រ៉ែ និងវត្ថុធាតុដើមមួយចំនួនផ្សេងទៀតពីកូរ៉េខាងជើង។ រីឯការ នាំចេញវិញ គឺមិនមានសាំងយន្តហោះ នាំចេញទៅកូរ៉េខាងជើងឡើយ៕
Tag:
កូរ៉េខាងជើង
មីស៊ីល
© រក្សាសិទ្ធិដោយ thmeythmey.com