ជាតិ
នយោបាយជាតិ
លោក ឈាង វុន៖ លោក អ៊ុំ សំអាន ត្រឡប់មកកម្ពុជាវិញចំពេលនះ ហាក់គ្មានបំណងល្អទេ លោក ឈាង វុន នៅខាងឆ្វេង លោក យឹម សុវណ្ណ នៅកណ្តាល លោក សុក សំអឿន នៅខាងស្តាំ
×
អ្នកនាំពាក្យរដ្ឋសភាមកពីគណបក្សប្រជាជនកម្ពុជា លោក ឈាង វុន មួហ្មងក្នុងចិត្តជុំវិញ ការវិលត្រឡប់មកកម្ពុជារបស់លោក អ៊ុំ សំអាន តំណាងរាស្ត្រគណបក្សសង្គ្រោះជាតិ ដែលត្រូវអាជ្ញាធរចាប់ខ្លួនកាលពីយប់រំលងអធ្រាតឈានចូលថ្ងៃទី ១១ ខែមេសា។ លោកថា ការវិលត្រឡប់របស់លោក អ៊ុំ សំអាន ចំពេលព្រឹត្តិការណ៍អង្គរសង្ក្រាន្តពេលនេះ ទំនងជាមិនមានបំណងល្អនោះទេ។ អ្នកនាំពាក្យគណបក្សសង្គ្រោះជាតិ មិនសប្បាយចិត្តនឹងការលើកឡើងរបស់លោក ឈាង វុន នោះឡើយ។
ក្នុងចិត្តរបស់ លោក ឈាង វុន មិនមែនជារឿងធម្មតាឡើយ ដែលលោក អ៊ុំ សំអាន តំណាងរាស្ត្រគណបក្សសង្គ្រោះជាតិ សម្រេចចូលមកកម្ពុជា ហើយត្រូវអាជ្ញាធរចាប់ខ្លួននៅពេលនេះ។ លោក យល់ថា លោក អ៊ុំ សំអាន អាចមានបំណងណាមួយមិនល្អហើយ ដែលត្រឡប់មកកម្ពុជា ចំពេលដែលនៅកម្ពុជា រៀបចំព្រឹត្តិការណ៍អង្គរសង្ក្រាន្ត។ លោក ឈាង វុន បញ្ជាក់ប្រាប់សារព័ត៌មានថ្មីៗបែបនេះថា ៖« ខ្ញុំគិតថា គាត់មកពេលនេះ ហាក់មិនមានបំណងល្អនោះទេ។ ខ្ញុំនិយាយបានតែប៉ុណ្ណឹង។ ព្រោះយើងកំពុងរៀបចំព្រឹត្តិការណ៍អង្គរសង្ក្រាន្ត គាត់មក»។ លោក ឈាង វុន បដិសេធមិនចោទឲ្យចំៗថា លោក អ៊ុំ សំអាន មានបំណងមិនល្អណាមួយឲ្យពិតប្រាកដទេ។
ការលើកឡើងរបស់លោក ឈាង វុន ធ្វើឲ្យលោក យឹម សុវណ្ណ មិនអាចទទួលយកបាននោះទេ។ លោកថា លោក អ៊ុំ សំអាន ជាពលរដ្ឋ និងតំណាងរាស្ត្ររបស់កម្ពុជា ចង់ចូលប្រទេសកម្ពុជាពេលណាក៏បានដែរ ហើយលោកគ្មានបំណងអាក្រក់ណាមួយសម្រាប់ប្រទេសជាតិខ្លួនឯងដូចការលើកឡើងរបស់លោក ឈាង វុន ទេ។ « ខ្ញុំមិនយល់ថា គាត់ដឹងពីណា ហើយចេះតែចោទប្រកាន់គេ។ កម្ពុជា ជាប្រទេសគាត់ បើមិនឲ្យគាត់ចូល ទុកឲ្យនរណានៅ»។ នេះជាការបញ្ជាក់របស់លោក យឹម សុវណ្ណ ទន្ទឹមនឹងសោកស្តាយនឹងចំណាត់ការរបស់អាជ្ញាធរ ហើយស្នើឲ្យរដ្ឋាភិបាលដោះលែងលោក អ៊ុំ សំអាន ជាបន្ទាន់។
យ៉ាងណា ថ្វីបើលោក យឹម សុវណ្ណ សោកស្តាយចំពោះទង្វើរបស់អាជ្ញាធរចាប់ខ្លួនតំណាងរាស្ត្ររួមបក្សជាមួយគ្នាក្តី តែលោក ឈាង វុន តំណាងរាស្ត្រគណបក្សប្រជាជនកម្ពុជា ហាក់ដូចជាមិនសោកស្តាយ ដែលអាជ្ញាធរចាប់ខ្លួន លោក អ៊ុំ សំអាន ជាសហការីរួមអាជីពជាមួយខ្លួនជាតំណាងរាស្ត្រដូចគ្នា ក្នុងន័យការពារលោក អ៊ុំ សំអាន នោះទេ តែផ្ទុយទៅវិញ អ្នកនាំពាក្យរដ្ឋសភា មកពីគណបក្សប្រជាជនកម្ពុជារូបនេះ សោកស្តាយចំពោះទង្វើរបស់លោក អ៊ុំ សំអាន ទំនងជាក្នុងន័យដាក់បន្ទុកបន្ថែមទៅវិញ។ លោក ឈាង វុន អះអាងថា កន្លងមក លោក អ៊ុំ សំអាន បានយកផែនទីក្លែងក្លាយបង្ហោះនៅលើបណ្តាញសង្គមហ្វេសប៊ុក ដែលលោកចាត់ទុកថា វាជាបទល្មើសព្រហ្មទណ្ឌជាក់ស្តែង។ លោកថា សកម្មភាពរបស់លោក អ៊ុំ សំអាន ធ្វើឲ្យប៉ះពាល់ដល់កិត្តិយសរដ្ឋសភាជាតិ។
សូមបញ្ជាក់ថា លោក អ៊ុំ សំអាន បានធ្វើដំណើរមកដល់ប្រទេសកម្ពុជាវិញ កាលពីថ្ងៃទី ១០ ខែមេសា ឆ្នាំ ២០១៦ នេះ ។ តំណាងរាស្រ្តបក្សប្រឆាំងដែលរិះគន់រដ្ឋាភិបាលមិនសំចៃមាត់រូបនេះ មកដល់ខេត្តសៀមរាប ទាំងអះអាងថា ខ្លួនមិនខ្លាចរដ្ឋាភិបាលកម្ពុជាចាប់ខ្លួននោះទេ។ លោក អះអាងប្រាប់សារព័ត៌មានថ្មីៗថា លោកមិនខ្លាចការចាប់ខ្លួន ដោយសារលោក យល់ថា រូបលោក មិនបានធ្វើអ្វីខុសនោះទេ។
ជុំវិញការចាប់ខ្លួនលោក អ៊ុំ សំអាន នេះ លោកមេធាវី សុក សំអឿន ហាក់ស្ទាក់ស្ទើរមិនចង់អត្ថាធិប្បាយអំពីបញ្ហានេះ ពីព្រោះតែលោកមិនដឹងរឿងនេះឲ្យស៊ីជំរៅ។ តែមេធាវីរូបនេះ គ្រាន់តែបកស្រាយក្នុងន័យច្បាប់ថា ការចោទប្រកាន់ថា បុគ្គលណាមួយប្រើប្រាស់របស់ក្លែងក្លាយ លុះត្រាតែបុគ្គលអ្នកប្រព្រឹត្តបានដឹងថា វត្ថុដែលខ្លួនប្រើក្លែងក្លាយ។ ជាមួយគ្នានេះ លោកសុក សំអឿន ក៏រិះគន់ពីការបកស្រាយបទល្មើសជាក់ស្តែងកន្លងមកដែរ។ លោកថា កន្លងមកបទល្មើសនេះ ត្រូវគេបកស្រាយក្នុងន័យទូលាយពេក ដែលធ្វើឲ្យមិនសូវមានយុត្តិធម៌។ បើតាមលោកមេធាវី តាមច្បាប់ បទល្មើសជាក់ស្តែង លុះត្រាតែ នគរបាលយុត្តិធម៌មានភស្តុតាងជាក់ស្តែងដែរ៕
Tag:
ឈាង វុន
អ៊ុំ សំអាន
យឹម សុវន្ណ
© រក្សាសិទ្ធិដោយ thmeythmey.com