អន្តរជាតិ
លោក ឃេរី នឹងមិនសុំទោសជប៉ុនរឿងទម្លាក់គ្រាប់នុយក្លេអ៊ែរក្នុងដំណើរទៅហ៊ីរ៉ូស៊ីម៉ា
× រដ្ឋមន្ត្រីការបរទេសអាមេរិកលោក ចន ឃេរី នឹងមិនសុំទោសអ្វីឡើយចំពោះការទម្លាក់គ្រាប់បែកនុយក្លេអ៊ែរទៅលើជប៉ុនក្នុសម័យសង្គ្រាមលោកលើកទីមួយ នៅពេលលោកធ្វើដំណើរទៅកាន់ទីក្រុងហ៊ីរ៉ូស៊ីម៉ានៅថ្ងៃទី១០ ខែមេសា។ លោកក៏នឹងក្លាយជារដ្ឋមន្ត្រីការបរទេសអាមេរិកទីមួយ ដែលនឹងទៅកាន់សារមន្ទីរចងចាំសន្តិភាពហ៊ីរ៉ូស៊ីម៉ាផងដែរ។
សូមស្ដាប់ព័ត៌មានលម្អិត៖
មន្ត្រីជាន់ខ្ពស់អាមេរិកនិយាយថា លោក ឃេរី ដែលកំពុងស្ថិតនៅទីក្រុងហ៊ីរ៉ូស៊ីម៉ា នឹងមិនសុំទោសចំពោះទង្វើអាមេរិកដែលទម្លាក់គ្រាប់បែកលើទីក្រុងនេះនោះទេ។ លោកនឹងទៅសារមន្ទីរចងចាំសន្តិភាព ជាទីកន្លែងរម្លឹកដល់ជនរងគ្រោះជាងមួយសែននាក់ដែលបាត់បង់ជីវិតដោយសារការទម្លាក់គ្រាប់បែកប្រល័យលោកនេះ។
មន្ត្រីដដែលនោះបញ្ជាក់ប្រាប់អ្នករាយការណ៍សារព័ត៌មាននៅថ្ងៃទី១០ ខែមេសាថា ប្រសិនបើសួរថារដ្ឋមន្ត្រីការបរទេសទៅហ៊ីរ៉ូស៊ីម៉ាដើម្បីសុំទោសនោះ ចម្លើយគឺមិនមែនទេ។ លោកបន្តទៀតថា បើលោកអ្នកសួរថា លោករដ្ឋមន្ត្រីគិតថា ប្រជាជនអាមេរិកនិងជប៉ុនសោកសង្រេងនឹងសោកនាដកម្មដែលកើតឡើងឬអត់ ចម្លើយគឺពិតមែន។
ការលើកឡើងរបស់មន្ត្រីជាន់ខ្ពស់ធ្វើឡើង ស្របពេលដែលលោក ចន ឃេរី កំពុងតែស្នាក់នៅទីក្រុងហ៊ីរ៉ូស៊ីម៉ា ដើម្បូចូលរួមកិច្ចប្រជុំរដ្ឋមន្ត្រីការបរទេសនៃមហាអំណាចG7 ដែលជប៉ុនធ្វើជាម្ចាស់ផ្ទះនៅឆ្នាំ២០១៦នេះ។ នៅថ្ងៃទី១១ ខែមេសា លោក ឃេរី រួមនឹងរដ្ឋមន្ត្រីការបរទេសនៃG7 នឹងទៅដាក់កម្រងផ្កានៅសារមន្ទីរចងចាំសន្តិភាព ជាទីរម្លឹកដល់ជនរងគ្រោះពីការទម្លាក់គ្រាប់បែកកាលពីថ្ងៃទី៦ ខែសីហា ឆ្នាំ១៩៤៥។
លើសពីនេះទៅទៀត ដំណើររបស់លោក ឃេរី ក៏ជាការបើកផ្លូវដល់ដំណើរទស្សនកិច្ចរបស់លោកប្រធានាធិបតី បារ៉ាក់ អូបាម៉ា មកកាន់ទីក្រុងហ៊ីរ៉ូស៊ីម៉ានៅខែឧសភាខាងមុខដែរ។ លោក អូបាម៉ា ក៏នឹងក្លាយជាប្រធានាធិបតីក្នុងតំណែងដំបូងគេមកកាន់ទីក្រុងនេះ ខណៈលោកនឹងមកចូលរួមប្រជុំប្រជុំកំពូលG7 នៅជប៉ុន។
ទាក់ទិននឹងការប្រជុំG7 របៀបវារៈសំខាន់នៃកិច្ចប្រជុំដែលបើកនៅថ្ងៃទី១០ ខែមេសាម្សិលមិញនេះ មាន ការបញ្ឈប់អាវុធនុយក្លេអ៊ែរ ការប្រឆាំងភេរវកម្ម ការបញ្ចប់សង្គ្រាមស៊ីវិលស៊ីរី និងបញ្ហាកូរ៉េខាងជើងជាដើម។ សន្តិសុខដែនសមុទ្រ ក៏ជាប្រធានបទសំខាន់មួយដែរ ក្នុងជំនួបមហាយក្សសេដ្ឋកិច្ចនេះ ជាពិសេសសកម្មភាពរបស់ចិននៅតំបន់ជម្លោះសមុទ្រចិនខាងត្បូង ដែលចិនកំពុងតែពង្រីកកោះ និងធ្វើសកម្មភាពយោធានៅទីនោះ។
សូមបញ្ជាក់ថា ជប៉ុនគឺជាប្រទេសតែមួយគត់ដែលរងគ្រោះដោយសារគ្រាប់បែកនុយក្លេអ៊ែរ។ ទាហានអាមេរិកបានទម្លាក់គ្រាប់បែកនុយក្លេអ៊ែរមួយគ្រាប់លើទីក្រុងហ៊ីរ៉ូស៊ីម៉ា នៅថ្ងៃទី៦ ខែមេសា ឆ្នាំ១៩៤៥ ដែលបណ្ដាលឲ្យមនុស្សជាង១៥ម៉ឺននាក់បាត់បង់ជីវិតក្នុងឆ្នាំនោះ។ បីថ្ងៃបន្ទាប់ អាមេរិកក៏ទម្លាប់មួយគ្រាប់ទៀតនៅណាហ្កាសាគី ដែលធ្វើមនុស្សប្រមាណ៧ម៉ឺននាក់បាត់បង់ជីវិត ហើយជប៉ុនក៏ប្រកាសចុះចាញ់សង្គ្រាមនៅ៦ថ្ងៃបន្ទាប់មក៕
Tag:
អាមេរិក
ជប៉ុន
ចន ឃេរី
© រក្សាសិទ្ធិដោយ thmeythmey.com