លោកព្រឹទ្ធាចារ្យ ហុក ឈាងគីម ឆ្នាំនេះនឹងមានការសម្តែងល្បុក្កតោដ៏ប្លែក

កីឡាជាតិ

ជាតិ

លោកព្រឹទ្ធាចារ្យ ហុក ឈាងគីម ឆ្នាំនេះនឹងមានការសម្តែងល្បុក្កតោដ៏ប្លែក

11, Apr 2016 , 8:39 pm

រូបភាព

ដោយ:

កីឡាអត្តសញ្ញាណជាតិ ក្បាច់គុនល្បុក្កតោ និងអុកចត្រង្គ ត្រូវបានគណៈកម្មាធិការជាតិអូឡាំពិកកម្ពុជា(NOCC)ដាក់ឲ្យសម្តែង និងប្រកួត ដើម្បីអបអរក្នុងថ្ងៃបុណ្យចូលឆ្នាំថ្មីប្រពៃណីខ្មែរ នាទឹកដីខេត្តសៀបរាប មុខប្រាសាទអង្គរវត្ត ចាប់ពីថ្ងៃទី១៣ ដល់ថ្ងៃទី១៦ ខែមេសាខាងមុខនេះ។

ក្បាច់គុនល្បុក្កតោ និងចំបាប់បុរាណ នឹងធ្វើការសម្តែងរួមគ្នានាទឹកដីអង្គរ ខេត្តសៀមរាប ដើម្បីអបអរថ្ងៃបុណ្យចូលឆ្នាំថ្មីប្រពៃណីខ្មែរ រយៈពេល៤ថ្ងៃចាប់ពីថ្ងៃទី១៣ ដល់ថ្ងៃទី១៦ ខែមេសា។ នេះបើយោងតាមលោក វ៉ាត់ ចំរើន អគ្គលេខាធិការានៃគណៈកម្មាធិការជាតិអូឡាំពិកកម្ពុជា និងជាអនុរដ្ឋលេខាធិការក្រសួងទេសចរណ៍។

លោកអគ្គលេខាធិការ NOCC បានបន្ថែមទៀតថា ក្នុងឱកាសបុណ្យខ្មែរនេះដែរក៏មានការសម្តែងកីឡាជាច្រើនប្រភេទផងដែរនៅក្នុងទឹកដីនៃខេត្តសៀមរាប ប៉ុន្តែមានតែកីឡាពីរប្រភេទប៉ុណ្ណោះដែលជាបន្ទុករបស់គណៈកម្មាធិការជាតិអូឡាពិកកម្ពុជាគឺ អុកចត្រង្គ និងល្បុក្កតោ។

លោកតាព្រឹទ្ធាចារ្យកីឡា ហុក ឈាងគីម បានមានប្រសាសន៍ថា ចាប់តាំងពីឆ្នាំ២០១២ មក នេះជាលើកទី៥ហើយ សម្រាប់ការបង្ហាញវត្តមានក្បាច់គុនល្បុក្កតោ ដែលកេរតំណែលរបស់បុព្វបុរសខ្មែរ ក្នុងព្រឹត្តិការណ៍អង្គរសង្ក្រាន្ត និងដើម្បីអបអរក្នុងឱកាសបុណ្យចូលឆ្នាំខ្មែរនេះ។ ហើយសម្រាប់ឆ្នាំនេះលោកនឹងដាក់កីឡាករកីឡាការិនីឲ្យចូលរួមសម្តែងចំនួន១២០នាក់ ដែលមកពីរាជធានីភ្នំពេញ និងក្លិប សមាគមទាំង៩នៅខេត្តសៀមរាប។

ទោះបីឆ្នាំនេះជាការបង្ហាញវត្តមានលើកទី៥ក៏ដោយ ប៉ុន្តែ លោកព្រឹទ្ធាចារ្យរូបនេះ បានបង្ហាញពីគោលជំហរថា នឹងធ្វើឲ្យប្លែកជាងឆ្នាំមុនៗ ជាពិសេសនឹងរៀបចំព្រឹត្តិការណ៍សំខាន់ៗជាច្រើនទៀតនៅក្នុងនោះ ដើម្បីបង្កើនការទាក់ទាញឲ្យកាន់តែខ្លាំងថែមទៀត។ ហើយអ្វីដែលសំខាន់ លោក នឹងរៀបចំកម្មវិធីទេសនា ពន្យល់ពីបណ្តាំដូនតាខ្មែរ ដល់ភ្ញៀវទេសចរណ៍ជាតិ និងអន្តរជាតិដែលសម្តែងដោយរូបលោកផ្ទាល់ នាឱកាសនោះផងដែរ៕