មីស៊ីលការពារអាកាស S-300 របស់រុស្ស៊ីទៅដល់អ៊ីរ៉ង់ហើយ

អន្តរជាតិ

នយោបាយអន្តរជាតិ

មីស៊ីលការពារអាកាស S-300 របស់រុស្ស៊ីទៅដល់អ៊ីរ៉ង់ហើយ

12, Apr 2016 , 11:59 am

រូបភាព

ដោយ: ថ្មីៗ

ប្រព័ន្ធការពារដែនអាកាស S-300 បានបញ្ជូនទៅដល់អ៊ីរ៉ង់ហើយបើតាមការប្រកាសរបស់ក្រសួងការបរទេសអ៊ីរ៉ង់ ថ្ងៃចន្ទ ទី ១១ ខែ មេសា នេះ។ ការបញ្ជូនប្រព័ន្ធការពារដែនអាកាសនេះធ្វើឡើងតាមសមុទ្រកាព្យែនដែលនៅជាប់ព្រំដែនរុស្ស៊ីនិងអ៊ីរ៉ង់ ហើយការបញ្ជូននេះធ្វើឡើងក្រោយអ៊ីរ៉ង់និងមហាអំណាច ៥បូក១ សម្រេចបានកិច្ចព្រមព្រៀងនុយក្លេអ៊ែររួមគ្នា។

អ្នកនាំពាក្យក្រសួងការបរទេសអ៊ីរ៉ង់ Jaberi Ansari ត្រូវបានស្រង់សម្តីដោយសារព័ត៌មានរុស្ស៊ី RT ថា មីស៊ីលប្រភេទ S-300 ក្រុមទីមួយត្រូវបានបញ្ជូនមកដល់ទឹកដីអ៊ីរ៉ង់ហើយ។ នេះជាការបញ្ជូនសព្វាវុធរបស់រស្ស៊ីដំបូងបំផុតរាប់ចាប់តាំងពីភាគីចុះកិច្ចព្រមព្រៀងទិញលក់សព្វាវុធនេះរួមគ្នាតាំងពីឆ្នាំ ២០០៧មកនោះ និងក្រោយមានការផ្លាស់ប្តូរកាលបរិច្ឆេទនៃការបញ្ជូនអាវុធនេះច្រើនដងកន្លងមក។

អ្នកនាំពាក្យខាងលើបានបញ្ជាក់ថា៖«យើងបានប្រកាសហើយថា ទោះបីជាមានការផ្លាស់ប្តួរកាលបរិច្ឆេទច្រើនដងកន្លងមកក៏ដោយ កិច្ចព្រមព្រៀងនឹងស្ថិតក្នុងដំណាក់កាលអនុវត្តដដែល ហើយថ្ងៃនេះខ្ញុំគួរប្រកាសឲ្យហើយថា សព្វាវុធក្រុមទី១បានមកដល់អ៊ីរ៉ង់ហើយ»។លោក Jaberi Ansari បានបន្តទៀតថា ការបញ្ជូនសព្វាវុធមកអ៊ីរ៉ង់ធ្វើដំណើរតាមសមុទ្រកាព្យែន ដែលជាព្រំដែននៃប្រទេសទាំងពីររុស្ស៊ីនិងអ៊ីរ៉ង់នោះ។

តាមពិតទៅការនាំចូលអាវុធការពារអាកាសនេះ មិនមែនជាគម្រោងថ្មីរបស់រដ្ឋាភិបាលអ៊ីរ៉ង់នោះឡើយ។ អ៊ីរ៉ង់សម្រេចចុះកិច្ចព្រមព្រៀងទិញអាវុធទំហំ ៨០០លានដុល្លារ ជាមួយក្រុងម៉ូស្គូតាំងពីឆ្នាំ ២០០៧ ដើម្បីទិញប្រព័ន្ធមីស៊ីលនេះ ទុកគ្រាន់ការពារសត្រូវនៅមជ្ឈិមបូព៌ា។ ក្រោយមកអ៊ីរ៉ង់បង់លុយឲ្យរុស្ស៊ី ១៦៦លានដុល្លារសម្រាប់កិច្ចព្រមព្រៀងនេះ ប៉ុន្តែអ៊ីរ៉ង់មិនបានទទួលអាវុធនេះសោះ ព្រោះក្នុងឆ្នាំ ២០១០ គេឃើញទណ្ឌកម្មថ្មីត្រូវដាក់ប្រឆាំងក្រុងតេហេអ៊ីរ៉ង់ ដោយហាមឃាត់ការលក់អាវុធមីស៊ីលដល់ប្រទេសនេះ។ ក្នុងពេលជាមួយគ្នានោះ រដ្ឋាភិបាលក្រុងម៉ូស្គូ បានសម្រេចចេញក្រឹត្យព្រមព្រៀងឈប់លក់អាវុធឲ្យអ៊ីរ៉ង់ស្របតាមចំណុចមានកំណត់ក្នុងកញ្ចប់ទណ្ឌកម្មនេះ ហើយរស្ស៊ីសុខចិត្តបង់លុយ១៦៦លានដុល្លារវិញឲ្យអ៊ីរ៉ង់។

ក្រោយមក ក្នុងខែមេសាឆ្នាំមុន ស្រាប់តែលោក វ្ល៉ាឌីមៀ ពូទីន ចេញក្រឹត្យដករាល់ការហាមឃាត់ទាំងអស់លើអ៊ីរ៉ង់ដើម្បីបើកផ្លូវឲ្យមានការផ្គត់ផ្គង់អាវុធដល់ក្រុងតេហេរ៉ង់វិញ។ សហគមន៍អន្តរជាតិភ្ងាក់ផ្អើល ហើយអ៊ីស្រាអែល និងអារ៉ាប៊ីសាអូឌីតព្រួយបារម្ភកាន់តែខ្លាំង។

ការបញ្ជូនអាវុធទៅអ៊ីរ៉ង់នេះកើតឡើង ក្រោយពេលដែលមហាអំណាច ៦សម្រេចបានកិច្ចព្រមព្រៀងជាមួយអ៊ីរ៉ង់ក្នុងសំណុំរឿងកម្មវិធីនុយក្លេអ៊ែរ ។ គេមិនឃើញមានការកំណត់ឈ្មោះអាវុធប្រភេទនេះនៅក្នុងកិច្ចព្រមព្រៀងនុយក្លេអ៊ែរអ៊ីរ៉ង់ជាមួយមហាអំណាច ៦ឡើយ។ នេះមានន័យថា អ៊ីរ៉ង់នៅមានសិទ្ធិពេញលេញក្នុងការទទួលបានអាវុធស៊េរីទំនើបនេះ ក្នុងរយៈពេលដ៏ខ្លីដោយគ្មានការរឹតត្បិតពីរុស្ស៊ី។ បើអ៊ីរ៉ង់មានអាវុធប្រភេទនេះ នឹងបង្កការលំបាកខ្លាំងដល់ការអន្តរាគមន៍យោធា បើសិនចាំបាច់។ អាវុធប្រភេទនេះមានឥទ្ធិពលខ្លាំង ដែលវាអាចកម្ទេចយន្តហោះចម្បាំងហើយវាអាចរារាំងការវាយប្រហារតាមផ្លូវអាកាសបានយ៉ាងមានប្រសិទ្ធិភាព៕