មេសហជីព មិនស្នើឲ្យព្រឹទ្ធសភាកែប្រែច្បាប់សហជីព តែសុំឲ្យពន្យារការអនុវត្តរយៈពេល២ឆ្នាំ

ជាតិ

សង្គមជាតិ

មេសហជីព មិនស្នើឲ្យព្រឹទ្ធសភាកែប្រែច្បាប់សហជីព តែសុំឲ្យពន្យារការអនុវត្តរយៈពេល២ឆ្នាំ

11, Apr 2016 , 5:02 pm

រូបភាព

ដោយ: ម៉ៅ សុផា

ឲ្យតែរាជរដ្ឋាភិបាលឬរដ្ឋសភា បើកកិច្ចពិភាក្សាពីសេចក្តីព្រាងច្បាប់ស្តីពីសហជីព តំណាងកម្មករ តែងសុំអន្តរាគមន៍ជានិច្ច។ ប៉ុន្តែ ពួកគេបែរជាព្រងើយកន្តើយចំពោះស្ថាប័នព្រឹទ្ធសភា ខណៈពេលដែលស្ថាប័នកំពូលមួយនេះកំពុងប្រជុំពីសេចក្តីព្រាងច្បាប់ស្តីពីសហជីព នៅថ្ងៃទី១១ ខែមេសា ឆ្នាំ២០១៦ នេះ។

នៅថ្ងៃទី១១ ខែមេសានេះ គណៈកម្មាធិការអចិន្ត្រៃយ៍ព្រឹទ្ធសភា បើកកិច្ចប្រជុំ លើរបៀបវារៈមួយចំនួន ដោយក្នុងនោះ ក៏មានការពិនិត្យនិងការសម្រេចលើសំណើរបស់គណៈកម្មការទី៨ព្រឹទ្ធសភា ដើម្បីសុំដាក់សេចក្តីព្រាងច្បាប់ស្តីពីសហជីពទៅក្នុងរបៀបវារៈសម័យប្រជុំលើកទី៨ នីតិកាលទី៣ ផងដែរ។ បើទោះបីជាស្ថាប័ននេះ បើកកិច្ចពិភាក្សាជុំវិញសេចក្តីព្រាងច្បាប់ស្តីពីសហជីព ដែលរដ្ឋសភាបានបញ្ជូនទៅក៏ដោយ តែមេសហជីព មិនបានសុំចំណាត់ការណាមួយនោះទេ។

ថ្លែងប្រាប់សារព័ត៌មានថ្មីៗនៅរសៀលនេះ ប្រធានសហព័ន្ធសហជីពមិត្តភាពកម្មករ លោក សៀង សម្បត្តិ បានលើកឡើងថា ការមិនសុំអន្តរាគមន៍ពីស្ថាប័នព្រឹទ្ធសភា ជុំវិញសេចក្តីព្រាងច្បាប់ស្តីពីសហជីព ដោយសារតែមេសហជីពហាក់ដូចជាអស់ជំនឿលើស្ថាប័នរដ្ឋទៅហើយ។ លោកថា កន្លងមក ក្រុមសហជីព បានស្ទុះស្ទារត់ទៅពឹងពាក់ស្ទើរគ្រប់ស្ថាប័ន ដើម្បីឲ្យមានការកែប្រែខ្លឹមសារមួយចំនួនក្នុងសេចក្តីព្រាងច្បាប់នេះ តែទីបំផុតរដ្ឋសភានៅតែអនុម័ត ដោយធ្វើតាមសំណើររបស់តំណាងកម្មករដ៏តិចតួចប៉ុណ្ណោះ។

មេសហជីពរូបនេះបានបញ្ជាក់បែបនេះថា៖«ការពិតទៅ ពួកយើងដូចជាអស់សង្ឃឹមលើស្ថាប័នរដ្ឋហើយ។ យើងស្នើសុំជាច្រើនលើកច្រើនសាហើយ តាំងពីរដ្ឋាភិបាល និងរដ្ឋសភា តែស្ថាប័នទាំងនោះនៅតែមិនធ្វើតាមសំណើរបស់ពួកយើង។ យើង ដឹងថា ច្បាប់នេះ ប្រាកដជាត្រូវអនុម័តហើយ ព្រោះមើលទៅរាជរដ្ឋាភិបាល ដូចមានឆន្ទៈខ្លាំងក្នុងការបង្កើតច្បាប់នេះ»។

លោក សៀង សម្បត្តិ បន្ថែមទៀតថា បើទោះបីជា ក្រុមសហជីព មិនបានសរសេរលិខិតសុំអន្តរាគមន៍ពីព្រឹទ្ធសភាក៏ដោយ ប៉ុន្តែពួកគេ នៅតែព្យាយាមស្នើឲ្យរាជរដ្ឋាភិបាល និងរដ្ឋសភាពន្យារពេលនេះការអនុវត្តិច្បាប់នេះ។ លោក ថា រដ្ឋសភា គួរតែពន្យាពេលរយៈពេល២ឆ្នាំ នៃការអនុវត្តច្បាប់ស្តីពីសហជីព ដើម្បីមេសហជីព មានពេលវេលា ក្នុងការអប់រំ ដល់កម្មករ ឲ្យយល់ពីច្បាប់នេះ៕