អន្តរជាតិ
នយោបាយអន្តរជាតិ
លោក ប្រាយុទ្ធ មិនខ្វល់នឹងការជំទាស់របស់បក្សនយោបាយរឿងសេចក្តីព្រាងរដ្ឋធម្មនុញ្ញថ្មី
× នាយករដ្ឋមន្ត្រីថៃលោកឧត្តមសេនីយ៍ ប្រាយុទ្ធ ច័ន្ទអូចា បានបដិសេធការប្រឆាំងរបស់គណបក្សនយោបាយថៃចំពោះពង្រាងរដ្ឋធម្មនុញ្ញថ្មី។ លោកថែមទាំងអះអាងថា លោកមិនខ្វល់នោះទេ បើទោះជាគណបក្សនយោបាយទាំងនោះមិនចូលរួមការបោះឆ្នោតលើក្រោយក៏ដោយចុះ។
ប្រមុខរដ្ឋាភិបាលយោធាថៃលោក ប្រាយុទ្ធ ច័ន្ទអូចា មិនអើពើនឹងការតវ៉ារបស់បក្សនយោបាយដែលមិនសប្បាយចិត្តនឹងរដ្ឋធម្មនុញ្ញថ្មីដែលបានពង្រាងរួចរាល់ហើយនោះទេ។ លោកប្រតិកម្មតបវិញថា លោកមិនថាអ្វីនោះទេ ប្រសិនបើពួកគេមិនចូលរួមបោះឆ្នោតដែលគ្រោងធ្វើនៅឆ្នាំ២០១៧ខាងមុខ។ លោក ប្រាយុទ្ធបញ្ជាក់ដូចនេះ បន្ទាប់ពីលោកដឹកនាំមន្ត្រីសំខាន់ៗទាំងយោធា ស៊ីវិល និងឯកជន ទៅសួរសុខទុក្ខលោក ព្រេម ទីនស៊ូឡាណុន ដែលជាប្រធានក្រុមប្រឹក្សាស្ដេចថៃ។
លោកឧត្តមសេនីយ៍ ប្រាយុទ្ធ និយាយដែរថា ក្រុមបក្សនយោបាយទាំងនោះអាចប្រឆាំងនឹងពង្រាងរដ្ឋធម្មនុញ្ញបាន ប៉ុន្តែប្រជាជនឯណោះទេ ដែលជាអ្នកសម្រេចលើរឿងនេះនៅថ្ងៃទី៧ ខែសីហាខាងមុខ។ ប្រធានក្រុមប្រឹក្សាជាតិដើម្បីសន្តិភាពនិងសណ្ដាប់ធ្នាប់ (NCPO) រូបនេះបន្តថា លោកជឿថា នឹងមានមនុស្សមួយចំនួនដែលនៅខាងលើ ដូចជាគណបក្សនយោបាយមានអ្នកគាំទ្រពួកគេដូច្នោះដែរ។
បើតាមកាសែត Bangkok Post នាយករដ្ឋមន្ត្រីរូបនេះឆ្លើយបកវិញថា ពួកគេបារម្ភថា ពួកគេនឹងមិនមានអំណាចដូចមុន និងមិនអាចធ្វើអ្វីដូចពីមុនទេ។ លោកសួរថា តើពួកគេធ្លាប់ប្រើប្រាស់អំណាចត្រឹមត្រូវដែរឬទេពីមុនមក។
គណបក្សប្រជាធិបតេយ្យរបស់អតីតនាយករដ្ឋមន្ត្រីលោក អាប់ភីស៊ីត វ៉េចាជីវ៉ា បានទាមទារឲ្យ NCPO បញ្ចេញជំហានបន្ទាប់ ប្រសិនបើប្រជាជនបដិសេធលើពង្រាងរដ្ឋធម្មនុញ្ញថ្មី។ យ៉ាងណាមិញលោក ប្រាយុទ្ធ និយាយថា បើសិនដូច្នោះមែន លោកគឺមានអំណាចសម្រេចកំណត់ថា នឹងត្រូវធ្វើអ្វីនៅពេលបន្ទាប់។ លោកបន្ថែមថា ៖«ហេតុអ្វីបានជាពួកគេចង់ដឹងពីរឿងនឹងម្លេះ។ បញ្ហាដែលពួកគេគួរតែចាប់អារម្មណ៍គឺរឿងធ្វើប្រជាមតិទៅវិញទេ»។
សូមបញ្ជាក់ថា រដ្ឋាភិបាលយោធាបានកំណត់យកថ្ងៃទី៧ ខែសីហា សម្រាប់ធ្វើប្រជាមតិលើពង្រាងរដ្ឋធម្មនុញ្ញថ្មី។ ប៉ុន្តែគណបក្សនយោបាយធំៗ ដូចជាបក្សប្រជាធិបតេយ្យនិងបក្សភឿថៃរបស់ក្រុមអាវក្រហមជាដើម ចង់ដឹងពីផែនការបន្ទាប់របស់ក្រុមយោធានៅក្រោយការធ្វើប្រជាមតិ ដ្បិតមានការព្រួបារម្ភថា យោធានឹងនៅតែស្ថិតក្នុងអំណាចនេះ។
យ៉ាងណាក្ដី ក្រុមយោធាដែលក្ដោបអំណាចពេញដៃ មិនបានប្រាប់ពីផែនការជាក់ច្បាស់នោះទេ ខណៈពួកគេនៅតែបន្តគាបសង្កត់សេរីភាពនយោបាយក្នុងប្រទេស។ ជាក់ស្ដែងនោះ បក្សនយោបាយមិនមានសិទ្ធធ្វើសន្និសីទកាសែតអ្វីទេ ហើយលោក ប្រាយុទ្ធក៏គំរាមដែរថា ប្រសិនបើពួកគេបន្តប្រឆាំងនឹងពង្រាងរដ្ឋធម្មនុញ្ញថ្មី ពួកគេអាចនឹងជាប់គុកមិនខាន៕
Tag:
ថៃ
ប្រាយុទ្ធ ច័ន្ទអូចា
© រក្សាសិទ្ធិដោយ thmeythmey.com