ឈាវ បូរ៉ា ថា ហូយ សុខណា សក្តិសមសម្រាប់តំណែងស្តេចអុកឆ្នាំ២០១៦

កីឡាជាតិ

ជាតិ

ឈាវ បូរ៉ា ថា ហូយ សុខណា សក្តិសមសម្រាប់តំណែងស្តេចអុកឆ្នាំ២០១៦

14, Apr 2016 , 5:30 pm

រូបភាព

កីឡាករ ហូយ សុខណា នាពេលប្រកួតជម្រុះនៅ NOCC ។ ថតដោយ សឿន វណ្ណឌេត

ដោយ: ធឿន បញ្ញាឬទិ្ធ

ស្ដេចអុកពីរឆ្នាំជាប់គ្នាលោក ឈាវ បូរ៉ា បានរបូតតំណែងស្ដេចអុក ក្រោយពីធ្លាក់ក្នុងវគ្គជម្រុះ១៦ក្រុមចុងក្រោយ ខណៈដែលកីឡាករចំនួន៨រូប កំពុងត្រៀមខ្លួនប្រកួតគ្នានៅក្នុងពិធីអង្គសង្រ្កាននេះ ដើម្បីគ្រងតំណែងស្ដេចអុកឆ្នាំ២០១៦ ។

មុនពេលការប្រកួតគ្រងតំណែងស្ដេចអុកក្នុងពិធីអង្គសង្រ្កានឆ្នាំ២០១៦នេះចាប់ផ្ដើមនោះ អតីតសេ្ដចអុកពីរឆ្នាំជាប់គ្នាលោក ឈាវ បូរ៉ា បានសម្លឹងឃើញកីឡាករអុកដែលមានសមត្ថភាពខ្ពស់ជាងគេ តែពីររូបប៉ុណ្ណោះក្នុងចំណោម៨រូបនោះ គឺកីឡាករ ហូយ សុខណា និងកីឡាករ ម៉េង សេរីសម្បត្តិ ដែលអាចឆ្លងកាត់វគ្គផ្ដាច់ព្រាត់។ តែយ៉ាងណាក្នុងចំណោមកីឡាករពីររូបនេះ លោក ឈាវ បូរ៉ា បានសម្លឹងឃើញកីឡាករ ហូយ សុខណា ដែលជាកីឡាករឆ្នើមសក្តិសមគ្រងតំណែងស្តេចអុកបន្តពីខ្លួនសម្រាប់ឆ្នាំ២០១៦នេះ។

ស្ដេចអុកពីរឆ្នាំជាប់គ្នារូបនេះ បានសរសេរលើហ្វេសប៊ុកខ្លួនដូច្នេះថា៖«ខ្ញុំបានបាត់បង់ងារជាតំណែងជើងឯកស្ដេចអុកបាត់ទៅហើយ។ ក្នុងចំណោមកីឡាករទាំង ៨ នាក់មានតែមនុស្ស ២ នាក់ប៉ុណ្ណោះដែលរំពឹងឆ្លងដល់វគ្គផ្ដាច់ព្រាត់បាន នោះគឺកីឡាករ ហូយ សុខណា និង ម៉េង សេរីសម្បត្តិ ។ តែបើខ្ញុំមើលមិនច្រឡំទេ កីឡាករហូយ សុខណា ប្រាកដជាមានឱកាសលើកពានច្រើនជាងគេ »។

លោកបន្តថា៖«លោកហូយ សុខណា គឺជាក្ដីរំពឹងតែមួយគត់របស់ខ្ញុំ ក៏ជាមនុស្សដែលសាកសមនឹងទទួលពានរង្វាន់នេះជាងគេដែរ សង្ឃឹមថាគាត់មិនធ្វើអោយខ្ញុំខកចិត្តឡើយ រង់ចាំតាមដានទាំងអស់គ្នាណា ជួយចែករំលែក និង អោយបានច្រើនផងដើម្បីជាការលើកទឹកចិត្តដល់គាត់»។

គួរបញ្ជាក់ថា កីឡាករ ហូយ សុខណា បានទម្លាក់កីឡាករ ឆយ វីវ៉ា ម្ចាស់ជើងឯកអុកចត្រង្គនៃពានរង្វាន់សម្តេច ហ៊ុន សែន ឆ្នាំ២០១០ ។ ចំណែកស្តេចអុកចត្រង្គពីរឆ្នាំ (២០១៤-២០១៥) ដែលទើបតែរៀបការថ្មីថ្មោងលោក ឈាវ បូរ៉ា បានប្រកួតចាញ់កីឡាករ ហេង សៅឌី ដោយនាទីនៅវគ្គ១៦នាក់ចុងក្រោយ កាលពីព្រឹកថ្ងៃទី៨ ខែមេសា នៅទីស្នាក់ការគណៈកម្មាធិការជាតិអូឡាំពិកកម្ពុជា។

កីឡាករដែលត្រូវរួមដំណើរទៅប្រកួតដំណាក់កាលចុងក្រោយក្នុងព្រឹត្តិការណ៍អង្គរសង្ក្រាន្ត ខេត្តសៀមរាប ជាមួយ ហេង សៅឌី និង ហូយ សុខណា រួមមាន កីឡាករ រៀម វាសនា កីឡាករ នូ ច័ន្ទផានិត កីឡាករ សៅ ប៉ិចសុភា កីឡាករ សេង សុធា កីឡាករ រស់ រិទ្ធីយ៉ា និង ម៉េង សេរីសម្បត្តិ ។

គួរបញ្ជាក់ថា ថ្ងៃទី១៥ ខែមេសា ជាថ្ងៃប្រកួតជម្រុះសម្រាប់កីឡាករទាំង៨នាក់ និងថ្ងៃទី១៦ ជាថ្ងៃប្រកួតវគ្គផ្តាច់ព្រ័ត្រ។ ការប្រកួតជើងឯកអុកចត្រង្គអង្គរសង្ក្រាន្តឆ្នាំ២០១៦ ម្ចាស់ជើងឯកទទួលបានប្រាក់រង្វាន់ ១២លានរៀល រីឯម្ចាស់ជើងឯករងទទួលបាន ៨លានរៀល និងចំណាត់ថ្នាក់លេខ៣ ទទួលបាន ៤លានរៀល៕