រញ្ជួយដីជប៉ុន៖ ប្រជាជនដង្ហើយរកជំនួយស្បៀង ខណៈរោងចក្រធំៗបិទទ្វារ

អន្តរជាតិ

រញ្ជួយដីជប៉ុន៖ ប្រជាជនដង្ហើយរកជំនួយស្បៀង ខណៈរោងចក្រធំៗបិទទ្វារ

18, Apr 2016 , 12:05 pm

រូបភាព

ដោយ: ថ្មីៗ

មនុស្សយ៉ាងហោចណាស់ ៤២ នាក់បានស្លាប់ដោយសារគ្រោះរញ្ជួយដីបន្តបន្ទាប់គ្នាវាយប្រហារប្រទេសជប៉ុនកាលពីថ្ងៃព្រហស្បតិ៍សប្តាហ៍មុនមកនោះ។ មនុស្សជាច្រើននៅបន្តបាត់ខ្លួន ហើយប្រជាជននៅតំបន់រងគ្រោះក៏ប្រឈមការខ្វះខាតជំនួយនិងស្បៀងអាហារថែមទៀត។ ចំណែករោងចក្រឧស្សាហកម្មជាច្រើនត្រូវបានបិទ តែសំណាងល្អរោងចក្រនុយក្លេអ៊ែរមិនរងការខូចខាតឡើយ។

អាជ្ញាធរជប៉ុនកំពុងដុតដៃដុតជើងជួយសង្គ្រោះប្រជាជនដែលរងគ្រោះដោយសារគ្រោះមហន្តរាយរញ្ជួយដីធ្ងន់ធ្ងរដែលកើតមានជាបន្តបន្ទាប់ ដែលកើតចាប់ពីថ្ងៃព្រហស្បតិ៍នៅតំបន់ភាគខាងត្បូងប្រទេសជប៉ុន។ យោងតាម ទីភ្នាក់ងារព័ត៌មាន Reuters មនុស្សជាច្រើននៅបាត់ខ្លួននៅឡើយ ហើយមនុស្សយ៉ាងហោចណាស់ ៤២នាក់បានស្លាប់ដោយសារគ្រោះមហន្តរាយធម្មជាតិនេះ។

ថ្ងៃចន្ទទី១៨ មេសានេះ នាយករដ្ឋមន្ត្រីជប៉ុន ស៊ីនហ្សូ អាបេ (Shinzo Abe) បានថ្លែងប្រាប់ សភាថា មនុស្សជាច្រើននាក់ទៀតដែលកំពុងបាត់ខ្លួន ហើយលោកចង់បង្កើនការរុករកនិងសង្គ្រោះប្រជាជនទាំងនោះ។ ស្របពេលជាមួយគ្នានោះលោកក៏ចង់ប្រកាសដាក់តំបន់ដែលរងគ្រោះនោះថាជាតំបន់រងគ្រោះមហន្តរាយធ្ងន់ធ្ងរ។

យោងតាមទីភ្នាក់ងារព័ត៌មានខាងលើដដែល ក្រុមសង្គ្រោះប្រហែល ៣ម៉ឺននាក់បានចូលរួមក្នុងប្រតិបត្តិការស្វែងរកជនរងគ្រោះ ហើយនិងចែកចាយស្បៀងអាហារដល់ប្រជាជនដែលរងគ្រោះថ្នាក់។ ប៉ុន្តែប្រជាជនច្រើនដែរ កំពុងដង្ហើយរកជំនួយជាស្បៀងអាហារ ព្រោះផ្លូវថ្នល់ត្រូវបានកាត់ផ្តាច់ដោយសារគ្រោះរញ្ជួយដីនេះ ហើយក្រុមសង្គ្រោះមិនអាចដឹកជញ្ជូនស្បៀងអាហារទៅដល់។

ប្រជាជននៅក្នុងតំបន់ដែលរងគ្រោះនៅក្រុង Kumamoto នោះថ្លែងថា អ្វីដែលពួកគាត់ព្រួយបារម្ភខ្លាំងបំផុតនោះគឺចំណីអាហារ ព្រោះពួកគេកំពុងប្រឈមការខ្វះខាតស្រាប់នោះ។ ហើយគ្មានអគ្គិសនី និងទឹកសម្រាប់ប្រើប្រាស់ដែរ។

តំបន់Kumamotoជា តំបន់ប្រមូលផ្តុំរោងចក្រឧស្សាហកម្មសំខាន់បំផុតមួយរបស់ជប៉ុន ហើយការកើតមាននូវគ្រោះមហន្តរាយរញ្ជួយដីធ្ងន់ធ្ងរនេះបង្កផលប៉ះពាល់ខ្លាំងដល់សកម្មភាពសេដ្ឋកិច្ចនិងពាណិជ្ជកម្ម ហើយវាក៏ធ្វើឲ្យទីផ្សារភាគហ៊ុនជប៉ុនធ្លាក់ចុះគួរឲ្យកត់សម្គាល់។ ការខូចខាតដោយគ្រោះរញ្ជួយដីនេះអាចមានតម្លៃរហូតដល់ ១០ពាន់លានដុល្លារអាមេរិកឯណោះ។

ក្រុមហ៊ុន រថយន្តតូយូតា បានប្រកាសបិទរោងចក្របណ្តោះអាសន្នសិន ហើយក្រុមហ៊ុន ហុងដា ក៏ប្រកាសផ្អាកដំណើរការរោងចក្រខ្លួននៅភាគខាងត្បូងបណ្តោះអាសន្នផងដែរតាំងពីថ្ងៃសុក្រមកនោះ។

ប៉ុន្តែយ៉ាងណាមិញ រោងចក្រអគ្គិសនីដើរដោយថាមពលនុយក្លេអ៊ែរចំនួនបីកន្លែងដែលស្ថិតក្នុងតំបន់ខាងលើនោះមិនមានគ្រោះថ្នាក់អ្វីឡើយ ។ តែអាជ្ញាធរគ្រប់គ្រងថាមពលនុយក្លេអ៊ែរជប៉ុនបានបើកកិច្ចប្រជុំបន្ទាន់មួយដើម្បីពិភាក្សាគ្រោះមហន្តរាយនេះ និងចាត់វិធានការទប់ស្កាត់គ្រោះថ្នាក់ដែលអាចកើតមានឡើងជាយថាហេតុ។

សូមបញ្ជាក់ថា កាលពីឆ្នាំ ២០១១ ជប៉ុនរងគ្រោះដោយសាររលកយក្សស៊ូណាមិ ដោយគ្រោះមហន្តរាយនេះសម្លាប់ប្រជាជនជប៉ុនអស់ប្រហែលជិត ២ម៉ឺននាក់។ ហើយមិនត្រឹមតែប៉ុណ្ណោះទេ រលកយក្សស៊ូណាមិកាលនោះបានបង្កឲ្យមានវិបត្តិនុយក្លេអ៊ែរធ្ងន់ធ្ងរបំផុតមួយមិនធ្លាប់មាន រាប់ចាប់ពីវិបត្តិនុយក្លេអ៊ែរ Chernobyl នៅអ៊ុយក្រែន ឆ្នាំ ១៩៨៦៕